NSO Health Survey 2025 | దేశంలోనే అత్యంత ఖరీదైన వైద్యం తెలంగాణలోనే.. ప్రైవేట్ ఆసుపత్రుల్లో జేబులకు చిల్లులు

-సర్కార్ దవాఖానాల్లో మాత్రం ఊరట
-ప్రైవేట్ వర్సెస్ ప్రభుత్వ ఆసుపత్రుల రియాలిటీ ఇదే..

NSO Health Survey 2025 | త్రినేత్ర.న్యూస్ : హైదరాబాద్ ఇప్పుడు గ్లోబల్ హెల్త్‌కేర్ హబ్. ఎన్నో అత్యాధునిక వైద్య సదుపాయాలకు కేరాఫ్ అడ్రస్. కానీ, ఆసుపత్రికి వెళ్తే జబ్బు తగ్గుతుందో లేదో కానీ, రోగుల జీవితకాల పొదుపునకు మాత్రం భారీ గండి పడుతోంది. కేంద్ర గణాంకాల మంత్రిత్వ శాఖ ఆధ్వర్యంలోని నేషనల్ స్టాటిస్టిక్స్ ఆఫీస్(ఎన్ఎస్‌వో) విడుదల చేసిన తాజా 'హౌస్‌హోల్డ్ సోషల్ కన్సంప్షన్: హెల్త్ - 2025' సర్వే ఈ చేదు నిజాన్ని బట్టబయలు చేసింది. ఆసుపత్రిలో చేరితే అయ్యే సగటు ఖర్చులో తెలంగాణ రాష్ట్రం దేశంలోనే తొలి స్థానంలో నిలిచింది.

జాతీయ సగటును మించిన భారం

ఎన్ఎస్‌వో సర్వే ప్రకారం, తెలంగాణలో సగటున ఒక్కో రోగి ఆసుపత్రిలో చేరినందుకు (హాస్పిటలైజేషన్) రూ.52,743 ఖర్చు అవుతోంది. ఇది జాతీయ సగటు రూ.37,858 కంటే దాదాపు 39% ఎక్కువ. పొరుగున ఉన్న ఇతర దక్షిణాది రాష్ట్రాలు తమిళనాడు (రూ.48,288), ఆంధ్రప్రదేశ్ (రూ.42,517) కూడా జాతీయ సగటు కంటే పైనే ఉన్నప్పటికీ, తెలంగాణ దరిదాపుల్లో లేవు.

ప్రైవేట్ ఆసుపత్రులు.. పగటి దోపిడీ

తెలంగాణలో వైద్య ఖర్చులు ఇంతలా పెరిగిపోవడానికి ప్రధాన కారణం కార్పొరేట్, ప్రైవేట్ ఆసుపత్రులే. రాష్ట్రంలో ప్రైవేట్ ఆసుపత్రుల్లో సగటు వైద్య ఖర్చు ఏకంగా రూ.72,561 గా ఉంది.

పట్టణాల్లో : అర్బన్ ప్రాంతాల్లోని ప్రైవేట్ ఆసుపత్రుల్లో ఈ సగటు మరింత ఎక్కువగా రూ.79,783 కు చేరుకుంది.

గ్రామీణ ప్రాంతాల్లో : పల్లెల్లో కూడా ప్రైవేట్ ఆసుపత్రుల్లో రూ.66,757 వరకు వసూలు చేస్తున్నారు. విచిత్రంగా, రాష్ట్రంలోని కొన్ని ఛారిటబుల్ (స్వచ్ఛంద) ఆసుపత్రుల్లో పట్టణ ప్రాంతాల్లో సగటున రూ.1,03,920 ఖర్చు కావడం సర్వేలో వెల్లడైన మరో ఆశ్చర్యకరమైన విషయం.

సీనియర్ పబ్లిక్ హెల్త్ ఎక్స్‌పర్ట్, ఇన్‌ఫెక్షన్ కంట్రోల్ అకాడమీ ఆఫ్ ఇండియా ప్రెసిడెంట్ డాక్టర్ బుర్రి రంగారెడ్డి ఈ పరిస్థితిని విశ్లేషిస్తూ, "కార్పొరేట్ ఆసుపత్రుల ఆధిపత్యం పెరగడమే ఈ అధిక ఖర్చులకు కారణం. ప్రైవేట్ ఈక్విటీ మద్దతు ఉన్న ఆసుపత్రుల చైన్‌లు దూకుడుగా విస్తరిస్తున్నాయి. సాధారణ ద్రవ్యోల్బణం కంటే వైద్యరంగంలో ద్రవ్యోల్బణం రెట్టింపు వేగంతో పెరుగుతోంది," అని ఆందోళన వ్యక్తం చేశారు.

ప్రముఖ ఆరోగ్య నిపుణులు డాక్టర్ కిరణ్ మాదాల మాట్లాడుతూ, "కార్పొరేట్ ఆసుపత్రులు వెంచర్ క్యాపిటల్ నమూనాలోకి మారడం వల్ల రోగులపై భారం పడుతోంది. తాజా సర్వే ప్రకారం తెలంగాణలో 10 శాతం గృహ అవసరాల కోసం తీసుకునే రుణాలు కేవలం వైద్య ఖర్చుల కోసమే తీసుకుంటున్నారు. ఇది చాలా కుటుంబాలను అప్పుల ఊబిలోకి నెట్టేస్తోంది," అని పేర్కొన్నారు.

ఆశ్చర్యపరిచే నిజం: సర్కార్ దవాఖానాల్లో అతి తక్కువ ఖర్చు

ప్రైవేట్ ఆసుపత్రుల ఫీజులు ఆకాశాన్ని తాకుతుంటే, తెలంగాణలోని ప్రభుత్వ ఆసుపత్రులు మాత్రం పేదలకు నిజమైన అండగా నిలుస్తున్నాయి. దేశంలోని పేద రాష్ట్రాలతో పోలిస్తే తెలంగాణలోని ప్రభుత్వ ఆసుపత్రుల్లో రోగుల జేబులోంచి అయ్యే ఖర్చు చాలా తక్కువ.

తెలంగాణ ప్రభుత్వ ఆసుపత్రుల్లో సగటు ఖర్చు కేవలం రూ.5,856. ఇందులో పట్టణ ప్రాంతాల్లో సగటున అత్యల్పంగా రూ.2,384 మాత్రమే కావడం విశేషం.

అదే యూపీ, బీహార్ లాంటి రాష్ట్రాల్లో ప్రభుత్వ ఆసుపత్రుల్లోనే సగటున రూ. 12,878, రూ.10,553 చొప్పున వసూలు అవుతుండటం గమనార్హం. తెలంగాణలో ఔట్ ఆఫ్ పాకెట్ ఖర్చు ప్రభుత్వ ఆసుపత్రుల్లో కేవలం రూ.3,711 గా నమోదైంది.

ప్రభుత్వ ఆసుపత్రుల్లో వైద్యం ఇంత చౌకగా ఉన్నప్పటికీ, ప్రజలు ప్రైవేట్ వైపు ఎందుకు వెళ్తున్నారనే ప్రశ్నకు డాక్టర్ రంగారెడ్డి బదులిస్తూ.. "ప్రభుత్వ రంగంలో అత్యాధునిక టెర్షియరీ కేర్ సదుపాయాలు సరిపోను లేకపోవడం వల్లే రోగులు ఖరీదైన ప్రైవేట్ ఆసుపత్రులను ఆశ్రయించాల్సి వస్తోంది," అని స్పష్టం చేశారు.

పరిష్కారం దిశగా అడుగులు

తెలంగాణలో ఆరోగ్య బీమా కవరేజ్ 44% - 47% కి పెరిగినప్పటికీ, జేబులోంచి పెట్టే ఖర్చు భారీగా ఉండటం ఆందోళన కలిగించే అంశం.

దీనికి పరిష్కారంగా తెలంగాణ ప్రభుత్వం తెలంగాణ ఇన్‌స్టిట్యూట్ ఆఫ్ మెడికల్ సైన్సెస్ లాంటి సూపర్ స్పెషాలిటీ ఆసుపత్రులను విస్తరిస్తోంది. "ప్రభుత్వం ఆరోగ్య బడ్జెట్‌ను ప్రస్తుతమున్న 4.2% నుండి కనీసం 8% కి పెంచాలి. అప్పుడే ప్రైవేట్ ఆసుపత్రులపై ఆధారపడటం తగ్గి, ప్రజలకు నాణ్యమైన, ఉచిత వైద్యం పూర్తి స్థాయిలో అందుబాటులోకి వస్తుంది," అని తెలంగాణ సీనియర్ రెసిడెంట్ డాక్టర్స్ అసోసియేషన్ ప్రెసిడెంట్ డాక్టర్ డి.శ్రీనాథ్ సూచించారు.