Free HPV Vaccine in Telangana | తెలంగాణలో బాలికలకు ఫ్రీగా క్యాన్సర్ వ్యాక్సిన్.. అర్హతలు ఇవే!

Free HPV Vaccine in Telangana | త్రినేత్ర.న్యూస్ : తెలంగాణలోని ఆడపిల్లల తల్లిదండ్రులకు రాష్ట్ర ప్రభుత్వం శుభవార్త చెప్పింది. మహిళల ఆరోగ్యంపై ప్రత్యేక దృష్టి సారించిన ప్రభుత్వం.. గర్భాశయ ముఖద్వార క్యాన్సర్ (Cervical Cancer) నివారణకు కీలక అడుగు వేసింది. ఇందులో భాగంగా 14 నుంచి 15 ఏళ్ల వయసున్న బాలికలకు ఉచితంగా హెచ్‌పీవీ (HPV) వ్యాక్సిన్‌ను పంపిణీ చేయాలని నిర్ణయించింది.

ఎందుకీ వ్యాక్సిన్ తీసుకోవాలి?

భారతదేశంలో మహిళల మరణాలకు కారణమవుతున్న క్యాన్సర్లలో 'సెర్వికల్ క్యాన్సర్' రెండో స్థానంలో ఉంది. హ్యూమన్ పాపిలోమా వైరస్ (HPV) వల్ల ఈ క్యాన్సర్ వస్తుంది. ఇది రాకుండా ఉండాలంటే యుక్తవయసులోనే బాలికలకు టీకా వేయించడం అత్యంత సురక్షితమైన మార్గం.

ప్రైవేటులో వేల ఖర్చు.. సర్కార్ దవాఖానలో ఉచితం

ప్రైవేట్ ఆసుపత్రుల్లో ఈ హెచ్‌పీవీ వ్యాక్సిన్ వేయించాలంటే ఒక్కో డోసుకూ రూ.2,000 నుంచి రూ.4,000 వరకు ఖర్చు అవుతుంది. సామాన్యులకు ఇది భారం. కానీ, తెలంగాణ ప్రభుత్వం ఇప్పుడు ఈ ఖరీదైన టీకాను ప్రభుత్వ ఆసుపత్రులు, పాఠశాలల ద్వారా ఉచితంగా అందించేందుకు ప్రణాళికలు సిద్ధం చేసింది.

ఎక్కడ లభిస్తుంది?

14 నుంచి 15 ఏళ్ల వయసున్న బాలికలకు గర్భాశయ ముఖద్వార క్యాన్సర్ నుంచి రక్షణ కోసం త్వరలోనే ఉచిత హెచ్‌పీవీ వ్యాక్సిన్ సేవలు ప్రభుత్వ పాఠశాలలు, ప్రాథమిక ఆరోగ్య కేంద్రాల్లో అందుబాటులోకి రానున్నాయి. తల్లిదండ్రులు ఈ అవకాశాన్ని సద్వినియోగం చేసుకుని, తమ పిల్లల భవిష్యత్తుకు ఆరోగ్య భరోసా కల్పించాలని వైద్య నిపుణులు సూచిస్తున్నారు.