Saleshwaram Jathara 2026 Begins | సలేశ్వరం జాతర ప్రారంభం.. తెలంగాణ ‘అమర్‌నాథ్‌’ యాత్ర విశిష్టత, రూట్ మ్యాప్ వివరాలివే..!

Saleshwaram Jathara 2026 Begins | శివ నామస్మరణతో నల్లమల అడవులు మార్మోగుతున్నాయి. "వస్తున్నాం లింగమయ్యా.." అంటూ భక్తులు అటవీ మార్గం గుండా అడుగులు వేస్తున్నారు. తెలంగాణ అమర్‌నాథ్‌ యాత్రగా పేరుగాంచిన 'సలేశ్వరం జాతర' ఏప్రిల్ 1 నుంచి ఘనంగా ప్రారంభమైంది. కేవలం మూడు రోజుల పాటు (ఏప్రిల్ 1 నుంచి 3 వరకు) మాత్రమే జరిగే ఈ అరుదైన జాతరకు తొలిరోజు నుంచే భక్తులు పోటెత్తారు. ప్రకృతి ఒడిలో, జలపాతాల మధ్య కొలువైన శివయ్యను దర్శించుకునేందుకు ప్రాణాలను సైతం పణంగా పెట్టి భక్తులు తరలివస్తుంటారు. గత 30 ఏళ్లుగా 'దక్షిణ అమర్‌నాథ్ యాత్ర'గా పిలువబడుతున్న ఈ సలేశ్వరం విశిష్టత ఏంటి? అక్కడికి ఎలా వెళ్లాలి? అటవీశాఖ నిబంధనలు ఏంటో ఇప్పుడు తెలుసుకుందాం.

సలేశ్వరం లింగమయ్య ఆలయ విశిష్టత

నాగర్ కర్నూల్ జిల్లా, లింగాల మండలంలోని అమ్రాబాద్ టైగర్ రిజర్వ్ (నల్లమల అడవులు) పరిధిలో సలేశ్వరం క్షేత్రం ఉంది. ఇది సగటు మనిషి చేసే సాదాసీదా యాత్ర కాదు, ఒక ఆధ్యాత్మిక సాహస యాత్ర.

జలపాతాల మధ్య శివయ్య: సుమారు 400 అడుగుల అగాథమైన లోయలోకి దిగి భక్తులు స్వామిని దర్శించుకోవాలి. ఇక్కడ 200 అడుగుల ఎత్తు నుంచి ఎగసిపడే జలపాతం నేరుగా లింగమయ్య (శివలింగం) పాదాలను తాకుతూ ప్రవహించడం ఇక్కడి అత్యంత విశేషం.

చెంచుల ఆరాధ్య దైవం: ఈ లింగమయ్య దట్టమైన అడవుల్లో నివసించే 'చెంచు' గిరిజనుల ఆరాధ్య దైవం.

ఏడాదికి మూడు రోజులే: ఏడాదంతా ప్రవహించే ఈ సలేశ్వరం జలపాతం వద్దకు వెళ్లేందుకు ప్రతిరోజూ అనుమతి ఉండదు. ఉగాది తర్వాత వచ్చే చైత్ర శుద్ధ పౌర్ణమి సందర్భంగా అటవీ శాఖ కేవలం మూడు రోజులు మాత్రమే భక్తులకు అనుమతి ఇస్తుంది. ఈ పౌర్ణమి నాడు స్వామిని దర్శించుకుంటే కోరిన కోరికలు నెరవేరుతాయని భక్తుల ప్రగాఢ విశ్వాసం.

నిజాం నవాబుల వేసవి విడిది

సలేశ్వరం ప్రకృతి సౌందర్యానికి నాటి నిజాం నవాబులు సైతం ముగ్ధులయ్యారు. ఈ ప్రాంతంలోని చల్లని వాతావరణం, ఎత్తైన కొండలు, జలపాతాలకు ఆకర్షితులైన నిజాం.. ఇక్కడ తన వేసవి విడిదిని ఏర్పాటు చేసుకోవడం విశేషం. దట్టమైన అటవీ ప్రాంతం కావడంతో 1973లో ఇక్కడ 'ప్రాజెక్ట్ టైగర్' (పులుల సంరక్షణ కేంద్రం)ను కూడా ఏర్పాటు చేశారు.

ఎలా వెళ్లాలి? (రూట్ మ్యాప్)

హైదరాబాద్ వాసులు ఎంజీబీఎస్ (MGBS) నుంచి శ్రీశైలం వెళ్లే బస్సు ఎక్కి మన్ననూర్ (అమ్రాబాద్ ఫారెస్ట్) వద్ద దిగాలి. ఇక్కడి నుంచి సలేశ్వరానికి ఆర్టీసీ స్పెషల్ సర్వీసులు, ప్రైవేటు వాహనాలు అందుబాటులో ఉంటాయి.

మార్గం: శ్రీశైలం - హైదరాబాద్ రహదారిలోని మన్ననూర్ నుంచి సుమారు 30 కిలోమీటర్ల దూరంలో ఉన్న ఫరహాబాద్ మీదుగా అటవీ మార్గంలో ప్రయాణించాలి.

కాలినడక తప్పనిసరి: సొంత వాహనాల్లో వెళ్లినా సరే, అడవిలో కేవలం 20 కిలోమీటర్లు మాత్రమే వాహనాలకు అనుమతి ఉంటుంది. అక్కడి నుంచి అత్యంత ఇరుకైన లోయలు, దట్టమైన అడవిలో ఏటవాలుగా ఉండే మార్గంలో కనీసం 5 కిలోమీటర్లు కాలి నడకన వెళ్లాల్సిందే. ఏమాత్రం కాలుజారినా ప్రాణాలకే ప్రమాదం. కాబట్టి అడుగడుగునా అప్రమత్తత అవసరం.

ముఖ్య సూచనలు

ప్లాస్టిక్ బ్యాన్: ఇది అభయారణ్యం (టైగర్ రిజర్వ్) కాబట్టి, ప్లాస్టిక్ కవర్లు, వాటర్ బాటిళ్లను అడవిలోకి తీసుకెళ్లడంపై అటవీశాఖ కఠిన ఆంక్షలు విధించింది.

ట్రాఫిక్ జామ్: లక్షలాదిగా భక్తులు తరలివస్తుండటంతో మన్ననూర్, ఫరహాబాద్ అటవీ దారుల్లో భారీగా ట్రాఫిక్ జామ్ అయ్యే అవకాశం ఉంది. భక్తులు సహనంతో అటవీ శాఖ, పోలీసు అధికారులకు సహకరించాలి.

జీవితంలో ఒక్కసారైనా ఈ ఎండాకాలంలో నల్లమల చల్లని అడవుల్లో సాగే ఈ 'సలేశ్వరం జాతర'ను దర్శించి తీరాల్సిందేనని భక్తులు చెబుతుంటారు.