Haldwani Purification Controversy | దళితులను అవమానించారు

• హల్ద్వానిలో ఖర్గేకు అవమానం
• రాహుల్ పై FIR
• బీజేపీ కులవాద రాజకీయాలపై మంత్రి ఉత్తమ్ ఫైర్

Haldwani Purification Controversy | త్రినేత్ర.న్యూస్ : ఉత్తరాఖండ్‌లోని హల్ద్వానిలో కాంగ్రెస్ జాతీయ అధ్యక్షుడు మల్లికార్జున ఖర్గే సభ అనంతరం జరిగిన 'శుద్ధీకరణ' (Purification) వివాదం దేశ రాజకీయాల్లో వేడి రగిలిస్తోంది. దళిత నేత అయిన ఖర్గే కూర్చున్న వేదికను శుద్ధి చేయడం అనే అంటరానితనపు చర్యను ప్రశ్నించిన లోక్‌సభ ప్రతిపక్ష నేత రాహుల్ గాంధీపై ఉత్తరాఖండ్ పోలీసులు ఎఫ్ఐఆర్ (FIR) నమోదు చేయడం పట్ల తెలంగాణ నీటిపారుదల, పౌరసరఫరాల శాఖ మంత్రి ఎన్. ఉత్తమ్ కుమార్ రెడ్డి తీవ్రంగా మండిపడ్డారు. ఇదంతా బీజేపీ కులవాద, నిరంకుశ రాజకీయాలకు ప్రత్యక్ష నిదర్శనమని ఆయన దుయ్యబట్టారు. సెప్టెంబర్ 1న ఈ మేరకు ఆయన ఒక పత్రికా ప్రకటన విడుదల చేశారు.

అసలేం జరిగింది?

ఆగస్టు 8న హల్ద్వాని రాంలీలా మైదాన్‌లో ఖర్గే బహిరంగ సభ నిర్వహించారు. సభలో ఆయన ప్రజా సమస్యలు, ప్రభుత్వ వైఫల్యాలపైనే మాట్లాడారు తప్ప ఎవరినీ కించపరచలేదు. కానీ, సభ జరిగిన రెండు రోజుల తర్వాత (ఆగస్టు 10న) శ్రీరామ్ సేన ధార్మిక్ సేవా న్యాస్ కు చెందిన సభ్యులు ఖర్గే ప్రసంగించిన అదే వేదికపై 'శుద్ధీకరణ' హవనం నిర్వహించారు. ఆగస్టు 13న రాజ్యసభలో ఈ అంశాన్ని లేవనెత్తిన ఖర్గే.. ఈ చర్య ద్వారా తాను అంటరానితనం తాలూకు అవమానాన్ని ఎదుర్కొన్నానని ఆవేదన వ్యక్తం చేశారు. ఇది కేవలం ఖర్గేకు జరిగిన వ్యక్తిగత అవమానం కాదని, తరతరాలుగా వివక్షను ఎదుర్కొంటున్న కోట్లాది మంది దళితుల ఆత్మగౌరవంపై జరిగిన దాడి అని ఉత్తమ్ కుమార్ రెడ్డి పేర్కొన్నారు.

మరోవైపు, ఈ ఘటనను ఉత్తరాఖండ్ బీజేపీ అధ్యక్షుడు మహేంద్ర భట్ కవర్ చేస్తూ.. "సభ అనంతరం మైదానాన్ని శుద్ధి చేస్తే అందులో తప్పేముంది?" అని వ్యాఖ్యానించారు. ఇటువంటి బహిరంగ సమర్థనలు బీజేపీ-ఆర్ఎస్ఎస్ (BJP-RSS) వ్యవస్థలో కొనసాగుతున్న కులవాద, తిరోగమన మనస్తత్వాన్ని బట్టబయలు చేశాయని ఉత్తమ్ విమర్శించారు.

నిందితులను వదిలేసి రాహుల్ పై FIR..

ఈ దారుణమైన అంటరానితనపు చర్యను లోక్‌సభ ప్రతిపక్ష నేత రాహుల్ గాంధీ తీవ్రంగా వ్యతిరేకించారు. ఆగస్టు 29న న్యూఢిల్లీలో జరిగిన ఏఐసీసీ (AICC) సమావేశంలో రాహుల్ మాట్లాడుతూ, ఈ అంటరానితనానికి కారకులైన వారిపై ఎస్సీ, ఎస్టీ అట్రాసిటీ (SC/ST Atrocities) చట్టం కింద కఠిన చర్యలు తీసుకోవాలని డిమాండ్ చేశారు. కానీ, ఉత్తరాఖండ్ పోలీసులు నిందితులపై చర్యలు తీసుకోకుండా.. ఆగస్టు 30న రాహుల్ గాంధీపైనే ఎఫ్ఐఆర్ నమోదు చేశారు. ఈ కేసును అదే సంస్థకు చెందిన ఒక సభ్యుడు ఇచ్చిన ఫిర్యాదు ఆధారంగా బుక్ చేయడం గమనార్హం.

న్యాయాన్ని తలకిందులు చేశారు: ఉత్తమ్

ఈ పరిణామం న్యాయాన్ని పూర్తిగా తలకిందులు చేయడమేనని ఉత్తమ్ కుమార్ రెడ్డి 'అత్యంత దిగ్భ్రాంతికరమైన పరిణామం'గా అభివర్ణించారు. రాజ్యాంగ హక్కులను ప్రశ్నించే గొంతులను అణచివేయడానికి, ప్రతిపక్ష నాయకులను భయపెట్టడానికే బీజేపీ పాలిత రాష్ట్రాల్లో దర్యాప్తు సంస్థలను దుర్వినియోగం చేస్తున్నారని ఆయన ఆరోపించారు.

ఎన్ని అక్రమ కేసులు పెట్టినా, బెదిరింపులకు పాల్పడినా రాహుల్ గాంధీ భయపడరని ఉత్తమ్ స్పష్టం చేశారు. దళితులు, ఆదివాసీలు, మైనారిటీలు, వెనుకబడిన వర్గాల హక్కుల కోసం కాంగ్రెస్ పార్టీ ఎల్లప్పుడూ అండగా నిలుస్తుందని ఉద్ఘాటించారు. స్వేచ్ఛ, సమానత్వం, సామాజిక న్యాయం అనే రాజ్యాంగ విలువలకి, అలాగే వివక్షతో కూడిన బీజేపీ-ఆర్ఎస్ఎస్ నిరంకుశ సిద్ధాంతానికి మధ్య ప్రస్తుతం దేశంలో పోరాటం జరుగుతోందని ఆయన స్పష్టం చేశారు.

హల్ద్వాని “శుద్ధీకరణ”...
రాహుల్ గాంధీ జీ పై FIR...

బీజేపీ కులవాద, నిరంకుశ రాజకీయాలకు నిదర్శనం

--- మంత్రి ఉత్తమ్ కుమార్ రెడ్డి

• @UttamINC pic.twitter.com/SUrQJQnBrC

— Congress for Telangana (@Congress4TS) September 1, 2026