CM Revanth Reddy letter to PM Modi | ప్రధాని మోదీకి ముఖ్యమంత్రి రేవంత్ రెడ్డి బహిరంగ లేఖ: సీట్ల పెంపుపై ‘హైబ్రిడ్ మోడల్’ డిమాండ్ చేసిన సీఎం

CM Revanth Reddy letter to PM Modi | త్రినేత్ర.న్యూస్ : దేశ ప్రజాస్వామ్య భవిష్యత్తుపై తీవ్ర ప్రభావం చూపే జాతీయ పునర్విభజన (Delimitation), లోక్‌సభ స్థానాల పెంపు అంశాలపై ముఖ్యమంత్రి ఎ.రేవంత్ రెడ్డి ప్రధానమంత్రి నరేంద్ర మోదీకి మంగళవారం బహిరంగ లేఖ రాశారు. సీట్ల పెంపు విషయంలో దక్షిణాది రాష్ట్రాలకు జరుగుతున్న అన్యాయాన్ని ఎత్తిచూపుతూ.. దానికి సరైన పరిష్కారాలను ఆయన తన లేఖలో పొందుపరిచారు.

వేర్వేరు అంశాలను ముడిపెట్టొద్దు.. రిజర్వేషన్లు వెంటనే అమలు చేయాలి

ప్రస్తుతం దేశంలో మహిళా రిజర్వేషన్లు, నియోజకవర్గాల పునర్విభజన, లోక్‌సభ సీట్ల పెంపు అనే మూడు వేర్వేరు అంశాలను ఒకదానితో ఒకటి ముడిపెట్టి ప్రజల్లో గందరగోళం సృష్టిస్తున్నారని సీఎం రేవంత్ రెడ్డి తెలిపారు. మహిళా రిజర్వేషన్ బిల్లుకు భారత జాతీయ కాంగ్రెస్ పూర్తిగా మద్దతు ఇస్తుందని, దాన్ని ప్రస్తుతం ఉన్న 543 లోక్‌సభ సీట్లలోనే తక్షణమే అమలు చేయాలని ఆయన డిమాండ్ చేశారు. మహిళల రాజకీయ సాధికారత అనేది కేవలం చట్టపరమైన సంస్కరణ మాత్రమే కాదని, అది ప్రజాస్వామ్య నైతిక బాధ్యత అని స్పష్టం చేశారు. సీట్ల సంఖ్య పెంచకుండా కేవలం నియోజకవర్గాల సరిహద్దులను మాత్రమే మార్చే డిలిమిటేషన్ ప్రక్రియకు కూడా తమ మద్దతు ఉంటుందని తెలిపారు.

దక్షిణాది రాష్ట్రాలకు తీరని అన్యాయం

లోక్‌సభ సీట్లను 850కు పెంచాలనే ప్రతిపాదనే అసలైన వివాదాస్పద అంశమని సీఎం పేర్కొన్నారు. కేవలం జనాభా ప్రాతిపదికన (Pro Rata) సీట్లను పెంచితే, దేశ సమగ్రతకు ప్రమాదమని హెచ్చరించారు. దశాబ్దాలుగా జాతీయ ప్రాధాన్యాలకు అనుగుణంగా జనాభా నియంత్రణ పాటించి, మానవ అభివృద్ధిలో ముందున్న తెలంగాణ, తమిళనాడు, కర్ణాటక, ఆంధ్రప్రదేశ్, కేరళ వంటి దక్షిణాది రాష్ట్రాలకు తీవ్ర రాజకీయ అన్యాయం జరుగుతుందని ఆవేదన వ్యక్తం చేశారు.

కేంద్రం నుంచి నిధుల పంపిణీలో దక్షిణాది రాష్ట్రాలు ఇప్పటికే వివక్షను ఎదుర్కొంటున్నాయని, బీహార్, ఉత్తరప్రదేశ్ వంటి రాష్ట్రాలు ఎక్కువ నిధులు పొందుతుంటే జాతీయ ఆర్థిక వ్యవస్థకు అత్యధికంగా తోడ్పడుతున్న తెలంగాణ లాంటి రాష్ట్రాలకు తక్కువ నిధులు వస్తున్నాయని ఆయన గుర్తుచేశారు. ఇప్పుడు లోక్‌సభ సీట్ల పెంపుతో దక్షిణాది రాష్ట్రాల గొంతు నొక్కే ప్రయత్నం జరుగుతోందని, జనాభా నియంత్రణ పాటించిన రాష్ట్రాలను శిక్షించడం, జనాభా పెరిగిన ఉత్తరాది రాష్ట్రాలకు బహుమతులు ఇవ్వడం సమానత్వ సూత్రానికి విరుద్ధమన్నారు.

పరిష్కారం ఏంటి? 'హైబ్రిడ్ మోడల్'

ఈ అసమతుల్యతను నివారించి దక్షిణాదికి నష్టం జరగకుండా ఉండేందుకు సీఎం రేవంత్ రెడ్డి అద్భుతమైన 'హైబ్రిడ్ మోడల్' (Hybrid Model) ను ప్రతిపాదించారు. దీని ప్రకారం.. భవిష్యత్తులో పెంచబోయే కొత్త లోక్‌సభ స్థానాల్లో సగభాగం (50%) ప్రో-రాటా (జనాభా) ప్రాతిపదికన కేటాయించి, మిగిలిన సగభాగాన్ని ఆయా రాష్ట్రాల ఆర్థిక సహకారం (GSDP), పనితీరు ప్రమాణాల ఆధారంగా కేటాయించాలని సూచించారు. సుప్రీంకోర్టు రిజర్వేషన్లు వర్సెస్ మెరిట్ విషయంలో చెప్పిన 50-50 ఫార్ములాను ఇక్కడ స్ఫూర్తిగా తీసుకోవచ్చని పేర్కొన్నారు. ఈ మోడల్ వల్ల దేశాభివృద్ధికి తోడ్పడే ఏ రాష్ట్రానికీ నష్టం జరగదని వివరించారు.

అఖిలపక్షం ఏర్పాటు చేయాలి.. స్టాలిన్‌కు మరో లేఖ

భారతదేశ బలం భిన్నత్వంలో ఏకత్వమని, ఈ అత్యంత సున్నితమైన అంశంపై ఏకాభిప్రాయం సాధించేందుకు తక్షణమే అన్ని రాష్ట్రాల ప్రతినిధులు, రాజకీయ పార్టీలతో 'అఖిలపక్ష సమావేశం' నిర్వహించాలని రేవంత్ రెడ్డి ప్రధానిని కోరారు.

ఇదిలా ఉండగా.. లోక్‌సభ సీట్ల పెంపుతో దక్షిణాది రాష్ట్రాలకు జరుగుతున్న అన్యాయంపై సమష్టిగా పోరాడాలని కోరుతూ తమిళనాడు ముఖ్యమంత్రి ఎంకే స్టాలిన్‌కు కూడా ముఖ్యమంత్రి రేవంత్ రెడ్డి మరో లేఖ రాయడం జాతీయ రాజకీయాల్లో తీవ్ర చర్చనీయాంశంగా మారింది. అభివృద్ధిలో భాగస్వామ్యమయ్యే రాష్ట్రాలు నష్టపోకుండా ఉండేందుకు అన్ని రాష్ట్రాలు ఐక్యంగా ముందుకు రావాలని ఆయన పిలుపునిచ్చారు.