Harish Rao | క‌రువొస్తుంద‌ని ప్ర‌జ‌ల‌ను భ‌య‌పెట్టేవాడు పాల‌కుడా?

• వారిని కాపాడేందుకు ఎంతకైనా సిద్ధమనేవాడే కదా నిజమైన పాలకుడు
• ప్ర‌చార ఆర్భాటాలు ప‌క్క‌నబెట్టి క‌రువును ఎదుర్కొనే కార్యాచ‌ర‌ణ‌ను ప్ర‌క‌టించు
• క‌రువు నివార‌ణ‌కు కేటాయించిన నిధుల‌పై శ్వేత‌ప‌త్రం విడుద‌ల చెయ్‌
• సీఎం రేవంత్‌పై మాజీ మంత్రి హ‌రీశ్‌రావు ఫైర్‌

Harish Rao | త్రినేత్ర న్యూస్: క‌రువొస్తుంద‌ని చేతులెత్తేసేవాడు పాల‌కుడు ఎలా అవుతాడ‌ని.. ప్ర‌జ‌ల‌ను భ‌య‌పెట్ట‌డం ఆపి క‌రువును ఎదుర్కొనే కార్యాచ‌ర‌ణ‌ను ప్ర‌క‌టించాల‌ని మాజీ మంత్రి, బీఆర్ఎస్ డిప్యూటీ ఫ్లోర్ లీడ‌ర్ హ‌రీశ్‌రావు (Harish Rao)|డిమాండ్ చేశారు. ప్ర‌జ‌ల‌ను కాపాడేందుకు ఎంత‌కైనా తెగించేవాడే నిజ‌మైన పాల‌కుడ‌వుతాడని చెప్పారు. రాష్ట్రంలోని ప్రాజెక్టుల వారీగా నీటి నిల్వలు, తాగునీటి అవసరాలు, సాగునీటి పరిస్థితి, కరువు నివారణకు కేటాయించిన నిధులపై శ్వేతపత్రం విడుదల చేయాల‌ని డిమాండ్ చేశారు. ఎల్‌నినోపై సీఎం రేవంత్ చేసిన వ్యాఖ్య‌ల‌పై శుక్ర‌వారం హ‌రీశ్ రావు తీవ్ర స్థాయిలో ఫైర‌య్యారు.

చేతులు కాలాక ఆకులు పట్టుకోవడమే

అసమర్థుడికి అధికారం అప్పగిస్తే.. ఇల్లు పీకి పందిరి వేసినట్టుగా ఉంది రేవంత్ పాలన! కరువు రాగానే చేతులెత్తేసిన చేతగాని సీఎంగా రేవంత్ చరిత్రలో మిగిలిపోతాడు. రంకెలు వేసినంత మాత్రాన నిజం అబద్ధం అయిపోదు రేవంత్ రెడ్డి. ఇది ప్రకృతి తెచ్చిన కరువు కాదు.. ముమ్మాటికీ కాంగ్రెస్ చేతగానితనం వల్ల వచ్చిన కరువే. మంత్రివర్గ ఉప సంఘం ఏర్పాటు చేతులు కాలాక ఆకులు పట్టుకోవడమే. రైతులకు, ప్రజలకు భరోసా ఇవ్వడం మానేసి భయభ్రాంతులకు గురిచేస్తావా రేవంత్ రెడ్డి? కరువు వస్తోంది.. నేనేం చేయలేనని చేతులెత్తేసేవాడా పాలకుడు? తాగునీళ్లు కూడా ఉండవని భయపెట్టడానికేనా రేవంత్‌కు సీఎం పదవి ఉన్నది?

మీ కార్యాచరణ ఏందో చెప్పు

ఇప్పుడు కేసీఆర్ సీఎంగా ఉంటే.. రేవంత్‌లాగా పనికిమాలిన, చేతగాని మాటలు చెప్పేవారా? వచ్చిన నీటిని వచ్చినట్టుగా ఒడిసిపట్టి.. తెలంగాణకు కరువు రాకుండా కేసీఆర్ చూసేవారు. ముందస్తు చర్యలు తీసుకొని కరెంటు కోతలు నివారించేవారు. ఎల్‌నినో గురించి ఆరు నెలలుగా ప్రజలను అప్రమత్తం చేస్తున్నామని చెబుతున్న మీరు.. ఈ ఆరు నెలల్లో కరువు నివారణకు తీసుకున్న ముందస్తు చర్యలేంటో చెప్పగలరా రేవంత్ రెడ్డి? కరువు ప్రకృతి సృష్టి కావచ్చు.. కానీ కరువును ఎదుర్కొనే ప్రణాళిక రూపొందించడం, ప్రజలకు భరోసా కల్పించడం ప్రభుత్వ బాధ్యత కాదా? ప్రజలను భయపెట్టడం కాదు.. భరోసా ఇవ్వాలి. నీటి నిల్వలు, విద్యుత్, ప్రత్యామ్నాయ పంటలు, పశుగ్రాసం, ఉపాధి అంశాలపై మీ కార్యాచరణ ఏంటి?

కరువు వస్తుందని ఆరు నెలలుగా తెలుసని చెబుతున్నారు.. మరి గోదావరి, కృష్ణా నదుల నుంచి నీళ్లను ఎందుకు ఎత్తిపోలేదు? ప్రాజెక్టుల్లో నీటి నిల్వలు ఎందుకు పెంచుకోలేదు? బొగ్గు నిల్వలు లేవు, కరెంట్ సంక్షోభం వస్తుందని మేం మొత్తుకుంటుంటే.. ఎందుకు ఫిడేలు వాయిస్తూ కూర్చున్నారు? ఈరోజు రాష్ట్రంలో నెలకొన్న కరువు పరిస్థితులకు మీ చేతగానితనం కారణం కాదా? ఎందుకు తప్పించుకునే ప్రయత్నం చేస్తున్నారు? ఎల్‌నినో ప్రపంచవ్యాప్త సమస్య అయితే.. పక్కనే ఉన్న ఆంధ్రప్రదేశ్‌లో ఎందుకు కరువు లేదు? అక్కడ ఎందుకు నీటి గలగలలు.. ఇక్కడ ఎందుకు రిజర్వాయర్లు వెలవెలబోతున్నాయి?

కరువు పేరుతో వ్యవసాయానికి నీళ్లు ఇవ్వలేమని ముందే చేతులెత్తేయడం పాలనా దక్షత కాదు.. రైతులను సంక్షోభంలోకి నెట్టడమే! 20 వేల మెగావాట్ల విద్యుత్ వినియోగాన్ని గొప్పగా చెబుతున్నారు.. అదే సమయంలో విద్యుత్ కోతలతో ఎండుతున్న పంటల గురించి ఎందుకు మాట్లాడటం లేదు? ట్యాంకర్లతో నీళ్లు పోసుకుంటున్న రైతుల గోస కనిపించడం లేదా? బియ్యం ధరలు అడ్డగోలుగా పెరిగి ప్రజలు ఇబ్బందులు పడుతుంటే.. దాన్ని కూడా తన ఘనతగా చెప్పుకునే భావదారిద్ర్యం రేవంత్ రెడ్డిది. ఇలాంటి వ్యక్తి కరువు నుండి ప్రజలను కాపాడతారా ప్రజలు ఆలోచించాలి.

ప్రజల సమస్యలపై ప్రశ్నిస్తే వ్యక్తిగత దూషణలు.. ప్రభుత్వ వైఫల్యాలను ఎత్తిచూపితే రాజకీయ విమర్శలు.. ఇదేనా మీ ప్రజాపాలన? కరోనా సమయంలో కేసీఆర్ తీసుకున్న చర్యలపై మాట్లాడే ముందు.. నేటి కరువు పరిస్థితిని ఎదుర్కొనేందుకు మీ ప్రభుత్వం ఏం చేసిందో చెప్పండి. కరోనా కాలంలో కేసీఆర్ తీసుకున్న చర్యలపై ప్రపంచమంతా ప్రశంసలు వెల్లువెత్తాయి. వ్యాక్సిన్ అందేలా చేసి, చేయడంతో పాటు తన మాటలు, చర్యలతో ప్రజలను భరోసా ఇచ్చారు. వలస కూలీలను కూడా తెలంగాణ బిడ్డలుగా భావించి కాపాడారు కేసీఆర్. కేసీఆర్ చర్యలను దేశమంతా కొనియాడింది. దాన్ని కూడా తప్పుగా చూపించేందుకు రేవంత్ దగుల్బాజీ మాటలు మాట్లాడుతున్నారు.

నా పొడుగును మాట్లాడితే ప్రాజెక్టుల్లో నీళ్లు పెరుగుత‌యా?

కేసీఆర్‌పై విమర్శలు చేయడానికి చూపిస్తున్న శ్రద్ధలో పావు వంతైనా రైతులకు, ప్రజలకు నీళ్లు అందించడంపై చూపించండి. కరువు నివారణకు చర్యలు తీసుకోలేని రేవంత్‌కు ముఖ్యమంత్రిగా ఉండే అర్హత ఎక్కడిది? రాజకీయాల కోసం పుట్టిన గడ్డనే కరువు రక్కసికి బలిపెట్టిన ప్రజా వ్యతిరేకి, రైతు వ్యతిరేకి రేవంత్ కాదా? ఇంతా చేసి సిగ్గులేకుండా బుకాయింపు మాటలతో ఎవరిని మోసం చేస్తావ్ రేవంత్? నన్ను, కేసీఆర్‌ను తిట్టినంత మాత్రాన, నా పొడుగు గురించి మాట్లాడినంత ప్రాజెక్టుల్లో నీళ్లు పెరగవు. కరెంట్ సమస్య తీరదు. రాష్ట్రంలోని ప్రాజెక్టుల వారీగా నీటి నిల్వలు, తాగునీటి అవసరాలు, సాగునీటి పరిస్థితి, కరువు నివారణకు కేటాయించిన నిధులపై శ్వేతపత్రం విడుదల చేయండి.

రైతులకు సాగునీరు, ప్రజలకు తాగునీరు, పశువులకు పశుగ్రాసం, కూలీలకు ఉపాధి కల్పించండి. నష్టపోయిన రైతులకు పరిహారం అందించండి. రైతులకు రైతు బీమా, పంటలకు పంట బీమా పథకాలను తక్షణ అమలు చేయండి. ప్రకృతి వైపరీత్యాన్ని రాజకీయాలకు వాడుకోవడం కాదు.. ప్రజలకు అండగా నిలవడం ప్రభుత్వ బాధ్యత అన్న విషయాన్ని ఇకనైనా గుర్తించండి అని హ‌రీశ్ రావు హిత‌వు ప‌లికారు.