Apple Pay in India | భారత్‌లో ‘యాపిల్ పే’: యూపీఐ పేమెంట్స్ కోసం బ్యాంక్‌లతో యాపిల్ చర్చలు.. ఎప్పుడు రానుందంటే?

Apple Pay in India | ఐఫోన్ (iPhone) యూజర్లకు ఇది నిజంగా తీపి కబురే. భారతదేశంలో డిజిటల్ పేమెంట్స్ రంగంలోకి సగర్వంగా ప్రవేశించేందుకు టెక్ దిగ్గజం యాపిల్ (Apple) సన్నాహాలు చేస్తోంది. మన దేశంలో ప్రతి ఒక్కరి దైనందిన జీవితంలో భాగమైన యూపీఐ (UPI) ద్వారానే 'యాపిల్ పే' (Apple Pay) సేవలను తీసుకురావడానికి రంగం సిద్ధం చేస్తోంది.

ప్రముఖ బ్యాంకులతో ముమ్మర చర్చలు

విశ్వసనీయ వర్గాల సమాచారం ప్రకారం.. యాపిల్ కంపెనీ ఇప్పటికే భారత్‌లోని ప్రముఖ బ్యాంకులైన ఐసీఐసీఐ బ్యాంక్ (ICICI Bank), హెచ్‌డీఎఫ్‌సీ బ్యాంక్ (HDFC Bank), యాక్సిస్ బ్యాంక్ (Axis Bank)లతో చర్చలు జరుపుతోంది. అన్నీ అనుకున్నట్లు జరిగితే 2026 మధ్య నాటికి యాపిల్ పే సేవలు భారత్‌లో అందుబాటులోకి వచ్చే అవకాశం ఉంది. యూపీఐతో పాటు వీసా (Visa), మాస్టర్ కార్డ్ (Mastercard) నెట్‌వర్క్‌ల ద్వారా కార్డ్ బేస్డ్ పేమెంట్స్ అందించేందుకు కూడా యాపిల్ ఆసక్తి చూపుతోంది.

పిన్ అవసరం లేదు.. ఫేస్ ఐడీ, టచ్ ఐడీతోనే పేమెంట్స్!

ఇప్పటివరకు మనం యూపీఐ పేమెంట్స్ కోసం పిన్ (PIN) లేదా ఎస్ఎంఎస్ ద్వారా వచ్చే ఓటీపీ (OTP)లపై ఆధారపడుతున్నాం. కానీ, 2025 చివర్లో రిజర్వ్ బ్యాంక్ ఆఫ్ ఇండియా (RBI) డిజిటల్ చెల్లింపుల కోసం బయోమెట్రిక్ అథెంటికేషన్‌కు (వేలిముద్ర లేదా ఫేస్ రికగ్నిషన్) పచ్చజెండా ఊపింది. ఈ నేపథ్యంలో, యాపిల్ పే పూర్తిగా 'ఫేస్ ఐడీ' (Face ID) లేదా 'టచ్ ఐడీ' (Touch ID) ద్వారా పనిచేయనుంది. అంటే లావాదేవీని ఆమోదించడానికి కేవలం మీ ఐఫోన్ వైపు చూస్తే సరిపోతుంది.

గూగుల్ పే, ఫోన్‌పేలకు గట్టి పోటీ తప్పదా?

ఇండియాలో ఇప్పటికే ఆల్ఫాబెట్ కు చెందిన గూగుల్ పే (Google Pay), వాల్‌మార్ట్‌కు చెందిన ఫోన్‌పే (PhonePe)లతో పాటు దేశీయ సంస్థ పేటీఎం (Paytm)లు యూపీఐ మార్కెట్‌ను శాసిస్తున్నాయి. ఇప్పుడు యాపిల్ ఎంట్రీతో డిజిటల్ పేమెంట్స్ రంగంలో తీవ్ర పోటీ నెలకొననుంది. 750 మిలియన్లకు పైగా స్మార్ట్‌ఫోన్ యూజర్లు ఉన్న ఇండియా.. ప్రపంచంలోనే అత్యంత వేగంగా అభివృద్ధి చెందుతున్న డిజిటల్ పేమెంట్స్ మార్కెట్. ఈ లావాదేవీల ద్వారా యాపిల్ కొంత కమీషన్ తీసుకునే అవకాశం ఉన్నట్లు తెలుస్తోంది.

భారత్‌పై యాపిల్ స్పెషల్ ఫోకస్

భారత్‌లో యాపిల్ క్రమంగా తన మార్కెట్ వాటాను పెంచుకుంటోంది. ప్రస్తుతం ఇక్కడి స్మార్ట్‌ఫోన్ సేల్స్‌లో 10 శాతం వాటాను సొంతం చేసుకుంది. యాపిల్ వాచ్‌లు, ఐప్యాడ్‌లు, మ్యాక్‌బుక్స్‌లో యాపిల్ పే ఫీచర్ ఇన్‌బిల్ట్‌గా రానుంది కాబట్టి, యాపిల్ హార్డ్‌వేర్ ఉత్పత్తుల అమ్మకాలు మరింత పెరిగే ఛాన్స్ ఉంది.

మరోవైపు, చైనాలో డొనాల్డ్ ట్రంప్ విధించిన టారిఫ్‌ల దెబ్బకు.. యాపిల్ తన తయారీ కేంద్రాన్ని చైనా నుంచి క్రమంగా భారత్‌కు మారుస్తోంది. అమెరికాకు ఎగుమతి చేసే ఐఫోన్లను ఇక్కడే తయారు చేస్తోంది. అలాగే దేశంలో రిటైల్ స్టోర్లను కూడా వేగంగా విస్తరిస్తోంది. ఈ వారంలోనే ముంబైలో తమ ఆరో స్టోర్‌ను యాపిల్ ప్రారంభించింది. భారతదేశంలో అమ్మకాలు వేగంగా పెరుగుతున్నాయని, యాపిల్ వృద్ధికి ఇండియా అత్యంత కీలకమని ఆ సంస్థ సీఈవో టిమ్ కుక్ (Tim Cook) పదే పదే చెబుతుండటం గమనార్హం.