13 November 2026 Doomsday | రేపే ప్రపంచానికి ఆఖరి రోజు? 66 ఏళ్ల కిందనే సైన్స్ చెప్పిన లెక్కలివే..!

• రేపే 'డూమ్స్ డే' నా?
• నవంబర్ 13, 2026న ప్రపంచం అంతమవుతుందా?
• 1960లో సైంటిస్టులు ఎందుకు చెప్పారు

13 November 2026 Doomsday | త్రినేత్ర న్యూస్ : నవంబర్ 13, శుక్రవారం (Friday the 13th) — రేపే ఆ రోజు! 66 ఏళ్ల క్రితం ప్రపంచ ప్రఖ్యాత 'సైన్స్' (Science) జర్నల్‌లో ప్రచురితమైన ఒక పరిశోధనా పత్రం ప్రకారం.. రేపటితో భూమిపై మనుషుల మనుగడ ప్రశ్నార్థకం కావాలి. కానీ, వాస్తవ పరిస్థితి అందుకు పూర్తి విరుద్ధంగా ఉంది. ప్రపంచ జనాభా అనంతానికి (Infinity) చేరడానికి బదులు, ప్రస్తుతం సుమారు 8.3 బిలియన్ల (830 కోట్లు) వద్ద స్థిరంగా ఉంది.

అసలు ఈ నవంబర్ 13 లెక్క ఎక్కడిది?

1960 నవంబర్‌లో హైంజ్ వాన్ ఫోర్స్టర్ (Heinz von Foerster), ప్యాట్రిసియా మోరా, లారెన్స్ అమియోట్ అనే ముగ్గురు పరిశోధకులు "డూమ్స్ డే: ఫ్రైడే, 13 నవంబర్, క్రీ.శ. 2026" అనే పేరుతో ఒక పేపర్‌ను ప్రచురించారు. క్రీస్తుశకం ఒకటో శతాబ్దం నుంచి 1950ల చివరి వరకు ఉన్న ప్రపంచ జనాభా గణాంకాలను వీరు విశ్లేషించారు.

సాధారణంగా జనాభా ఒక స్థిరమైన వేగంతో పెరుగుతుందని అంతా భావిస్తారు. కానీ, ప్రతి వంద కోట్ల జనాభా పెరగడానికి పట్టే సమయం శతాబ్దాలు గడుస్తున్న కొద్దీ తగ్గిపోతోందని (Hyperbolic growth) వీరు గుర్తించారు. ఈ గణిత సూత్రాన్ని గ్రాఫ్ రూపంలో వేసినప్పుడు, జనాభా రేఖ సరిగ్గా నవంబర్ 13, 2026 నాడు 'అనంతం' (Infinity) అనే బిందువును తాకుతుందని తేలింది.

అయితే, జనాభా నిజంగానే అనంతానికి చేరడం అసాధ్యమని ఆ పరిశోధకులు అప్పుడే స్పష్టం చేశారు. ఆ రోజు రాకముందే ఆహారం, నివాస స్థలం కొరత ఏర్పడి పెరుగుదలకు అడ్డుకట్ట పడుతుందని వారు హెచ్చరించారు.

హాస్యంతో కూడిన సీరియస్ హెచ్చరిక

వియన్నాలో జన్మించిన భౌతిక శాస్త్రవేత్త వాన్ ఫోర్స్టర్.. ఈ నివేదికను కాస్త వ్యంగ్యంగా, మరికాస్త సీరియస్‌గా రాశారు. అపశకునంగా భావించే 'శుక్రవారం 13వ తేదీని' (Friday the 13th) ఎంచుకోవడం వెనుక కూడా వారి ఉద్దేశం అదే. అప్పటికి ఉన్న జనాభా పెరుగుదల ధోరణి ఇలాగే కొనసాగితే సమాజం పెను ప్రమాదంలో పడుతుందని, మనుషులు తమ తీరు మార్చుకోవాలని చెప్పడమే వారి అసలు లక్ష్యం.

వాస్తవంగా ఏం జరిగింది?

పరిశోధకులు భయపడినట్లుగా జనాభా వృద్ధి జరగలేదు. 1960లలో ఏడాదికి 2 శాతంగా ఉన్న ప్రపంచ జనాభా పెరుగుదల రేటు, ఆ తర్వాత క్రమంగా తగ్గుతూ వచ్చింది.

ఆసియా, లాటిన్ అమెరికా దేశాల్లో పెరిగిన పట్టణీకరణ, విద్య, కుటుంబ నియంత్రణ పద్ధతుల వల్ల జననాల రేటు గణనీయంగా పడిపోయింది.

మరోవైపు, హరిత విప్లవం (Green Revolution) కారణంగా వ్యవసాయ ఉత్పత్తులు పెరిగి, 1960లలో భయపడినట్లుగా భారీ కరువు కాటకాలు రాకుండా అడ్డుకోగలిగారు.

ఐక్యరాజ్యసమితి (UN) అంచనాల ప్రకారం, ప్రపంచ జనాభా 2080ల నాటికి సుమారు 10 బిలియన్లకు చేరుకుని, ఆ తర్వాత తగ్గుముఖం పట్టే అవకాశం ఉంది.

నేటి ఏఐ (AI) యుగానికి ఇదొక పెద్ద గుణపాఠం

ఈ పరిశోధనా పత్రం విఫలమైనప్పటికీ.. నేటి ఆధునిక ఆర్థికవేత్తలు, టెక్ నిపుణులకు ఇదొక గొప్ప పాఠంగా మిగిలిపోయింది. రెండు వేల ఏళ్ల గణాంకాల ఆధారంగా వేసిన అంచనా కేవలం కొన్ని దశాబ్దాల్లోనే తలకిందులైంది. ఎందుకంటే.. మనుషులు, వ్యవస్థలు తమ పరిస్థితులకు అనుగుణంగా నియమాలను మార్చుకుంటాయి.

ప్రస్తుతం ఆర్టిఫిషియల్ ఇంటెలిజెన్స్ (AI) వృద్ధి కూడా ఇలాగే అదుపుతప్పి దూసుకుపోతుందని (Runaway acceleration) కొందరు నిపుణులు అంచనా వేస్తున్నారు. అలాంటి వారికి వాన్ ఫోర్స్టర్ పేపర్ ఒక హెచ్చరిక లాంటిది. ఏ వేగమైనా సరే.. ఒకానొక దశలో ఒక పరిమితిని చేరుకుంటుంది లేదా తనను తాను నియంత్రించుకుంటుంది. 2002 లో మరణించిన వాన్ ఫోర్స్టర్.. ఎప్పుడూ మనుషులను కొత్త అవకాశాలు పెరిగేలా పనిచేయాలని ఆయన చెప్పిన సూక్తి నేటికీ అప్పుడప్పుడు వినిపిస్తూనే ఉంటుంది.