Sunita Williams Retirement | అంతరిక్ష ప్రయాణానికి సునీతా విలియమ్స్ ముగింపు.. రిటైర్మెంట్ ప్రకటించిన నాసా లెజెండ్

Sunita Williams Retirement | భారత సంతతికి చెందిన ప్రముఖ నాసా (NASA) వ్యోమగామి సునీతా విలియమ్స్ తన సుదీర్ఘ అంతరిక్ష ప్రయాణానికి ముగింపు పలికారు. నాసాలో సుదీర్ఘకాలం పాటు విశిష్ట సేవలందించిన సునీతా విలియమ్స్ అంతరిక్ష ప్రయాణానికి రిటైర్మెంట్ ప్రకటించారు. తన పదవీ విరమణను నాసా జనవరి 20, 2026న అధికారికంగా ప్రకటించింది. 27 ఏళ్ల పాటు నాసాలో అంతరిక్ష పరిశోధనలు చేసిన సునీత పదవీ విరమణ గత సంవత్సరం క్రిస్మస్ తర్వాత డిసెంబర్ 27, 2025 నుంచే అమలులోకి వచ్చిందని నాసా వెల్లడించింది. జూన్ 2024న చివరి మిషన్ సునీతా తన చివరి నాసా మిషన్ను జూన్ 2024న బోయింగ్ స్టార్లైనర్ ద్వారా ప్రారంభించారు. కేవలం 8 రోజుల కోసం ఆమె స్పేస్ స్టేషన్కి వెళ్లినా సాంకేతిక కారణాల వల్ల ఆమె 9 నెలల పాటు అంతరిక్ష కేంద్రంలోనే ఉండాల్సి వచ్చింది. ఆమెను భూమ్మీదికి తీసుకురావడానికి నాసా విశ్వ ప్రయత్నాలు చేసింది. చివరికి స్పేస్ఎక్స్ డ్రాగన్ క్యాప్సూల్ ద్వారా మార్చి 18, 2025న సురక్షితంగా భూమి మీదికి చేరుకున్నారు. 608 రోజులు అంతరిక్షంలోనే తన 27 ఏళ్ల అంతరిక్ష కెరీర్లో సునీత విలియమ్స్ మూడు మిషన్ల ద్వారా 608 రోజులు అంతరిక్షంలోనే గడిపారు. నాసా వ్యోమగాముల్లో అత్యధిక రోజులు స్పేస్ స్టేషన్లో గడిపిన రెండో వ్యక్తిగా సునీతా రికార్డు నెలకొల్పారు. అలాగే 9 సార్లు ఆమె స్పేస్ వాక్ చేశారు. 9 సార్లు అంటే 62 గంటలకు పైగా స్పేస్ వాక్ చేసిన మహిళా అస్ట్రోనాట్గా ప్రపంచ రికార్డు క్రియేట్ చేశారు. అంతరిక్షంలో మారథాన్ 2007 లో అంతరిక్ష కేంద్రంలో ఉన్నప్పుడు ట్రెడ్మిల్పై పరుగెత్తి బోస్టన్ మారథాన్ను పూర్తి చేశారు. అంతరిక్షంలో మారథాన్ పూర్తి చేసిన తొలి వ్యక్తిగానూ సునీతా రికార్డు సృష్టించారు. 2012 లో అంతరిక్షంలో స్విమ్మింగ్, సైక్లింగ్, రన్నింగ్ చేసి ట్రయాథ్లాన్ కూడా పూర్తి చేసి మరో రికార్డు నెలకొల్పారు. బోయింగ్ స్టార్లైనర్ లాంటి కొత్త అంతరిక్ష నౌకను నడిపిన తొలి మహిళగానూ విలియమ్స్ చరిత్ర సృష్టించారు. అలాగే, అంతరిక్ష కేంద్రానికి కమాండర్గా వ్యవహరించిన రెండో మహిళగా సునీతా విలియమ్స్ నిలిచారు.