Radhan Pandit Astrologer | ఆయన జాతకం చెప్పాడు.. దళపతి సీఎం అయ్యాడు: దళపతి గెలుపును ముందే అంచనా వేసిన రాధన్ పండిట్ ఎవరు?

• టీవీకేకు 140 నుంచి 170 సీట్లు పక్కాగా వస్తాయని, విజయ్ సీఎంగా ప్రమాణస్వీకారం చేస్తారని బల్లగుద్ది మరీ చెప్పిన పండిట్
• 40 ఏళ్ల అనుభవం ఉన్న ప్రముఖ జ్యోతిష్యుడు, న్యూమరాలజిస్ట్ రాధన్ పండిట్
• ఆయన టీవీకే పార్టీకి అధికార ప్రతినిధి కూడా
• గతంలో దివంగత సీఎం జయలలితకు దశాబ్దాల పాటు ఆధ్యాత్మిక గురువుగా సేవలందించిన ట్రాక్ రికార్డ్
• విజయ్ జాతకం, ఆయన పార్టీ పేరు (TVK) సంఖ్యాశాస్త్రం ప్రకారం అద్భుతంగా సరిపోయాయని 2024లోనే వీడియో ద్వారా వెల్లడి
• మే 4న కౌంటింగ్ రోజున విజయ్ నివాసానికి వెళ్లి పూలబొకే, శాలువాతో శుభాకాంక్షలు తెలిపిన రాధన్ పండిట్

Radhan Pandit Astrologer | త్రినేత్ర.న్యూస్ : తమిళనాడు అసెంబ్లీ ఎన్నికల ఫలితాలు (2026) రాష్ట్ర రాజకీయ ముఖచిత్రాన్ని పూర్తిగా మార్చేశాయి. దశాబ్దాలుగా పాతుకుపోయిన ద్రావిడ పార్టీలు డీఎంకే, అన్నాడీఎంకేలను మట్టికరిపించి దళపతి విజయ్ స్థాపించిన టీవీకే (TVK - త‌మిళ‌గ వెట్రి క‌జ‌గం) పార్టీ ప్రభంజనం సృష్టించింది. అయితే, ఈ అద్భుత గెలుపును అందరికంటే ముందే కచ్చితంగా ఊహించిన ఒక వ్యక్తి ఇప్పుడు సోషల్ మీడియాలో హాట్ టాపిక్‌గా మారారు. ఆయనే ప్రముఖ జ్యోతిష్యుడు, టీవీకే అధికార ప్రతినిధి రాధన్ పండిట్.

ఎన్నికల ఫలితాలకు ముందు ఎగ్జిట్ పోల్స్ అంచనాలను పక్కనపెడుతూ ఆయన చేసిన ఓ ప్రకటన ఇప్పుడు వైరల్ అవుతోంది. "మేము ఎగ్జిట్ పోల్స్‌ను ఏమాత్రం పట్టించుకోవడం లేదు. మాకు 45% ఓట్ షేర్‌తో 140 నుంచి 170 సీట్లు ఖచ్చితంగా వస్తాయి. కౌంటింగ్‌కు ఇంకా 108 గంటల సమయం ఉంది; 109వ గంటలో మేము ప్రమాణ స్వీకారం చేయబోతున్నాం. దళపతి విజయ్ సీఎం కావడం పక్కా" అని ఆయన చేసిన సవాల్ నిజం కావడంతో అంతా ఆయన గురించే వెతుకుతున్నారు.

ఎవరీ రాధన్ పండిట్?

రాధన్ పండిట్ భారత్‌లోనే ఫేమస్ సెలబ్రిటీ, పొలిటికల్ జ్యోతిష్యులలో ఒకరు. వేద జ్యోతిష్యం, న్యూమరాలజీలో ఆయనకు 40 ఏళ్లకు పైగా అనుభవం ఉంది. వాస్తవానికి ఆయన అసలు పేరు 'పండిట్ వెట్రివేల్'. ఆయన మూలాలు దక్షిణ భారతదేశంలోనే ఉన్నప్పటికీ, 2008లో ఢిల్లీకి మకాం మార్చిన తర్వాత తన పేరును రాధన్ పండిట్‌గా మార్చుకున్నారు.

బీజేపీ, కాంగ్రెస్, డీఎంకే, అన్నాడీఎంకే తదితర పార్టీలలోని ఎందరో అగ్రశ్రేణి రాజకీయ నాయకులు ఆయనకు క్లయింట్లుగా ఉన్నారు. ముఖ్యంగా బీజేపీ కురువృద్ధుడు ఎల్.కే. అద్వానీని ఆయన తన గురువుగా భావిస్తారు. కార్పొరేట్ సీఈవోలు, ఉన్నతాధికారుల కోసం ఆయన "365 డేస్ ప్రిడిక్షన్స్" అనే ప్రత్యేక సేవలను కూడా అందిస్తుంటారు.

జయలలితకు ఆధ్యాత్మిక గురువు

తమిళ రాజకీయాలకు రాధన్ పండిట్ కొత్త కాదు. ఆయన గతంలో దివంగత ముఖ్యమంత్రి జయలలితకు ఆధ్యాత్మిక సలహాదారుగా పనిచేశారు. 1991లో జయలలిత సాధించిన అఖండ విజయాన్ని ఆయన ముందే అంచనా వేశారు. అయితే 1994లో ఆమెకు కష్టకాలం మొదలవుతుందని ఆయన హెచ్చరించడం, ఆ తర్వాత వారి మధ్య వృత్తిపరమైన దూరం పెరగడం జరిగిపోయాయని సమాచారం.

విజయ్ జాతకం ఒక 'సునామీ'

కేవలం జ్యోతిష్యుడిగా మాత్రమే కాకుండా, టీవీకే పార్టీకి అధికార ప్రతినిధిగా కూడా రాధన్ పండిట్ చురుకైన పాత్ర పోషించారు. 2024లో విడుదల చేసిన ఓ యూట్యూబ్ వీడియోలో దళపతి విజయ్ రాజకీయ భవిష్యత్తుపై ఆయన సంచలన వ్యాఖ్యలు చేశారు. విజయ్ జాతకానికి 'సునామీ' లాంటి శక్తి ఉందని ఆయన అభివర్ణించారు. విజయ్ పుట్టిన తేదీకి, పార్టీ పేరు "త‌మిళ‌గ వెట్రి క‌జ‌గం" (TVK) కి సంఖ్యాశాస్త్రం (Numerology) ప్రకారం అద్భుతమైన సమన్వయం ఉందని వివరించారు. తమిళనాడు రాజకీయ నేతలు ఎడప్పాడి పళనిస్వామి, ఓ పన్నీరుసెల్వం జాతకాలతో విజయ్ జాతకాన్ని పోల్చి, విజయ్‌లో భవిష్యత్ సీఎంకి కావాల్సిన 'రాజ లక్షణాలు' మెండుగా ఉన్నాయని పండిట్ స్పష్టం చేశారు.

ఫలితాల రోజున విజయ్ ఇంట్లో సందడి

మే 4న అసెంబ్లీ ఎన్నికల ఫలితాల ట్రెండ్స్ టీవీకే వైపు మొగ్గు చూపుతున్న సమయంలోనే.. చెన్నై నీలాంకరైలోని విజయ్ నివాసానికి రాధన్ పండిట్ చేరుకున్నారు. పూలబొకే, శాలువాతో కాబోయే ముఖ్యమంత్రికి ఆయన ఘనంగా శుభాకాంక్షలు తెలిపారు. అంచనాలకు తగ్గట్టుగానే ఆయన చెప్పిన జోస్యం నిజం కావడంతో, రాజకీయాల్లో కేవలం వ్యూహాలే కాదు జాతకాలు, నమ్మకాలు కూడా పనిచేస్తాయని రాధన్ పండిట్ మరోసారి నిరూపించారని టీవీకే శ్రేణులు సంబరాలు చేసుకుంటున్నాయి.