Telangana Lok Sabha Seats 26 | తెలంగాణలో 26కు పెరగనున్న ఎంపీ సీట్లు: డీలిమిటేషన్, కులగణనపై అమిత్ షా సంచలన ప్రకటన

Telangana Lok Sabha Seats 26 | త్రినేత్ర.న్యూస్ : నియోజకవర్గాల పునర్విభజన (డీలిమిటేషన్) జరిగితే దక్షిణాది రాష్ట్రాలు తీవ్రంగా నష్టపోతాయన్న ఆందోళనల మధ్య కేంద్ర హోంమంత్రి అమిత్ షా పార్లమెంట్ వేదికగా కీలక ప్రకటన చేశారు. డీలిమిటేషన్ తర్వాత దక్షిణాది రాష్ట్రాల ప్రాతినిధ్యం ఏమాత్రం తగ్గబోదని, పైగా స్థానాల సంఖ్య పెరుగుతుందని ఆయన స్పష్టం చేశారు. పార్లమెంట్ ప్రత్యేక సమావేశాల్లో మహిళా రిజర్వేషన్, డీలిమిటేషన్ బిల్లులపై జరుగుతున్న చర్చలో అమిత్ షా పాల్గొని మాట్లాడారు.

ముఖ్యంగా తెలుగు రాష్ట్రాలకు సంబంధించి.. తెలంగాణలో ప్రస్తుతం ఉన్న 17 లోక్‌సభ స్థానాలు 26కు పెరగనున్నాయని అమిత్ షా వెల్లడించారు. అలాగే ఏపీకి సంబంధించి ఎంపీ సీట్ల సంఖ్య 25 నుంచి 38కి పెరుగుతుందని స్పష్టం చేశారు.

దక్షిణాది రాష్ట్రాల్లో పెరిగే సీట్ల వివరాలు ఇవే

సవరించిన ప్రతిపాదనల ప్రకారం, జనాభా ప్రాతిపదికన దేశవ్యాప్తంగా లోక్‌సభ స్థానాలు దామాషా పద్ధతిలో పెరగనున్నాయి. దక్షిణాది రాష్ట్రాలకు సంబంధించి ఏ రాష్ట్రానికి సీట్లు తగ్గవని అమిత్ షా భరోసా ఇచ్చారు.

• తెలంగాణ: 17 నుంచి 26 సీట్లకు (3.18% వాటా)
• ఆంధ్రప్రదేశ్: 25 నుంచి 38 సీట్లకు (4.65% వాటా)
• కర్ణాటక: 28 నుంచి 42 సీట్లకు (5.14% వాటా)
• తమిళనాడు: 39 నుంచి 59 సీట్లకు (7.23% వాటా)
• కేరళ: 16 నుంచి 20 సీట్లకు (3.67% వాటా)

దక్షిణాది ప్రాతినిధ్యంపై అపోహలు వద్దు

డీలిమిటేషన్ తర్వాత దక్షిణాది రాష్ట్రాల ప్రాతినిధ్యం పడిపోతుందంటూ తప్పుడు ప్రచారం జరుగుతోందని అమిత్ షా అన్నారు. మొత్తం ఎంపీల సంఖ్య పెరిగినప్పుడు దక్షిణాది రాష్ట్రాల వాటా శాతం గతంలో ఉన్న 24% నుంచి 19% కి మారవచ్చని, కానీ సంఖ్యాపరంగా చూసుకుంటే మాత్రం ఏ రాష్ట్రంలోనూ ఉన్న సీట్లు తగ్గవని, పైగా పెరుగుతాయని వివరించారు. జనాభా మార్పులకు అనుగుణంగా న్యాయబద్ధంగా ఈ కసరత్తు జరుగుతోందన్నారు.

850 సీట్ల ఫార్ములా ఏంటి?

మహిళా రిజర్వేషన్లను అమలు చేసేందుకు కేంద్రం రూపొందించిన 850 సీట్ల ఫార్ములాను అమిత్ షా సభకు వివరించారు. ప్రస్తుతం ఉన్న ఏ ఒక్క ఎంపీ (ఓపెన్ కేటగిరీ) స్థానాన్ని తగ్గించకుండా, మహిళలకు 33% కోటా కల్పించాలంటే సభలో మొత్తం స్థానాలను 50% పెంచాల్సిన అవసరం ఉందన్నారు. ఇలా పెంచిన సభలో మూడో వంతు స్థానాలను మహిళలకు కేటాయించడం సులువవుతుందని చెప్పారు. 850 అనేది ఒక రౌండ్ ఫిగర్ అని, ఖచ్చితమైన సంఖ్య బహుశా 816 కు కొంచెం అటూ ఇటూ ఉండవచ్చని.. దీనిపై పూర్తి వివరాలను సభ ముందు ఉంచుతామని తెలిపారు.

జాతీయ స్థాయిలో కులగణన ఖాయం

ఇదే సమయంలో ప్రతిపక్షాలు ఎప్పటినుంచో డిమాండ్ చేస్తున్న 'కులగణన' (Caste Census) పై కూడా అమిత్ షా స్పష్టతనిచ్చారు. జాతీయ స్థాయిలో నిర్వహించబోయే తదుపరి జనాభా లెక్కల సేకరణలో కులాల వారీగా కూడా లెక్కలు తీస్తామని సంచలన ప్రకటన చేశారు. సభలో రిజర్వేషన్లు, డీలిమిటేషన్‌పై చర్చ జరుగుతున్న తరుణంలో హోంమంత్రి ఈ ప్రకటన చేయడం దేశ రాజకీయాల్లో అత్యంత ప్రాధాన్యత సంతరించుకుంది. రాబోయే సెన్సస్‌లో కులాల డేటాను పొందుపరచడంపై కేంద్రం తన వైఖరిని ఈ ప్రకటన ద్వారా స్పష్టం చేసింది.