Punjab Haryana High Court | భార్యపై దాడి చేసిన భర్తకు బెయిల్ ఇచ్చి.. ఊహించని షరతు విధించిన హైకోర్టు!

Punjab Haryana High Court | త్రినేత్ర.న్యూస్ : కడుపులో పెరుగుతున్న బిడ్డ ఆడో, మగో తెలుసుకునేందుకు లింగ నిర్ధారణ పరీక్ష (Ultrasound Examination for Foetal Determination) చేయించుకోవాలని ఒత్తిడి తెచ్చి.. ఆమె నిరాకరించినందుకు గర్భవతి అయిన భార్యపై క్రూరంగా దాడి చేసిన కేసులో నిందితుడికి పంజాబ్ అండ్ హర్యానా హైకోర్టు బెయిల్ మంజూరు చేసింది. అయితే బెయిల్ ఇస్తూనే.. సదరు వ్యక్తికి న్యాయస్థానం కీలక సూచనలు చేసింది. తాగుడు అలవాటును మానడానికి ప్రయత్నించాలని, కుటుంబాన్ని జాగ్రత్తగా చూసుకోవాలని హితవు పలికింది.

మూడు నెలల జైలు శిక్ష, పూర్తయిన విచారణ

ఈ కేసు విచారణ సందర్భంగా జస్టిస్ సంజయ్ వశిష్ఠ్ ధర్మాసనం వ్యాఖ్యానిస్తూ.. "భార్యాభర్తల మధ్య తలెత్తిన దాంపత్య వివాదం (Matrimonial Dispute) వల్ల ఈ ఘటన జరిగింది. నిందితుడు చేసిన పని ఖండించదగినదే అయినప్పటికీ.. అతడు 2026 ఏప్రిల్ 21 నుంచి అంటే మూడు నెలలకు పైగా జైలు శిక్ష అనుభవించాడు. విచారణ పూర్తయింది, కేసు తుది తీర్పు రావడానికి ఇంకా సమయం పడుతుంది" అని పేర్కొన్నారు.

హైకోర్టు కీలక వ్యాఖ్య

"పిటిషనర్ తన తాగుడు అలవాటు నుంచి బయటపడి, తన వృద్ధురాలైన తల్లిని, కుటుంబ బాధ్యతలను సక్రమంగా చూసుకుంటే అది కుటుంబానికే శ్రేయస్కరం." అని జస్టిస్ సంజయ్ వశిష్ఠ్ హితవు పలికారు.

ఘటన వివరాలు ఏంటి?

బాధితురాలికి 2019 మే 5న పిటిషనర్‌తో వివాహమైంది. వీరికి ఇప్పటికే ఇద్దరు కుమార్తెలు (ఐదున్నర ఏళ్లు, 2 ఏళ్లు) ఉన్నారు. ఆ సమయంలో బాధితురాలు మూడు నెలల గర్భవతి. ఇప్పటికే ఇద్దరు ఆడపిల్లలు ఉన్నందున, మూడోసారి కూడా ఆడపిల్లే పుడుతుందేమోనన్న భయంతో నిందితుడు మద్యం తాగి ప్రతిరోజూ గొడవ పడేవాడు.

కడుపులోని బిడ్డ లింగ నిర్ధారణ కోసం స్కానింగ్ తీయించుకోవాలని భార్యపై ఒత్తిడి తెచ్చాడు. దానికి ఆమె నిరాకరించడంతో జుట్టు పట్టుకుని గోడకేసి కొట్టి, కూరగాయలు కోసే కత్తితో ఆమె చేతులపై దాడి చేసి తీవ్రంగా గాయపరిచాడు. దీంతో బాధితురాలు పోలీసులను ఆశ్రయించగా, భారతీయ నాయ సంహిత (BNS), 2026 సెక్షన్ల ప్రకారం కేసు నమోదు చేశారు.

పుట్టింట్లోనే ఉండొచ్చని స్పష్టం చేసిన కోర్టు

సాక్షులను బెదిరించకూడదని, విచారణ కోర్టు విధించే షరతులకు లోబడి నడుచుకోవాలని నిందితుడిని ఆదేశిస్తూ హైకోర్టు బెయిల్ మంజూరు చేసింది.

అదే సమయంలో, ఈ సమయంలో కాన్పు అయ్యేంత వరకు.. ఆమె శారీరకంగా, మానసికంగా కోలుకునే వరకు బాధితురాలు తన పుట్టింట్లోనే ఉండవచ్చని కోర్టు స్పష్టం చేసింది. భర్త ఇంట్లో ఉన్నప్పుడు మళ్లీ ఎలాంటి అసౌకర్యం లేదా అవాంఛనీయ ఘటనలు జరగకుండా ఉండేందుకే ఈ నిర్ణయం తీసుకున్నట్లు హైకోర్టు తెలిపింది.