Pune Doctor Scammed | 11 రోజుల్లో డబ్బు డబుల్.. స్టాక్ మార్కెట్ మోసగాళ్ల వలలో చిక్కి రూ.12 కోట్లు పోగొట్టుకున్న డాక్టర్!

Pune Doctor Scammed | త్రినేత్ర.న్యూస్ : ఆన్‌లైన్‌లో పరిచయం లేని వ్యక్తులు చెప్పే మాటలు విని పెట్టుబడులు పెడితే జీవితకాలపు సంపాదన ఎలా ఆవిరైపోతుందో చెప్పడానికి ఈ ఘటనే ఒక ఉదాహరణ. స్టాక్ మార్కెట్‌లో పెట్టుబడులు పెడితే కేవలం 11 రోజుల్లోనే మీ డబ్బు రెట్టింపు అవుతుందన్న సైబర్ నేరగాళ్ల మాటలు నమ్మి పుణెకు చెందిన ఓ 75 ఏళ్ల వృద్ధ వైద్యుడు ఏకంగా రూ.12.31 కోట్లు పోగొట్టుకున్నాడు.

సైబర్ మోసగాళ్లు ఆ వృద్ధుడికి మాయమాటలు చెప్పి.. వారి ద్వారా పెట్టుబడి పెడితే 11 రోజుల్లో రూ.54 కోట్ల వరకు లాభాలు వస్తాయని నమ్మించారు. తక్కువ వ్యవధిలో భారీ లాభాలు వస్తాయన్న ఆశతో బాధితుడు కొన్ని వారాల పాటు వారు చెప్పిన బ్యాంకు ఖాతాలకు డబ్బు బదిలీ చేస్తూనే ఉన్నాడు.

వాట్సాప్ గ్రూప్‌తో మొదలైన మోసం

ఈ ఏడాది జనవరిలో బాధితుడికి ఒక గుర్తుతెలియని నంబర్ నుంచి మెసేజ్ వచ్చింది. స్టాక్ మార్కెట్ పెట్టుబడుల ద్వారా అధిక లాభాలు వస్తాయని అందులో ఉంది. దీనిపై డాక్టర్ ఆసక్తి చూపడంతో.. సైబర్ మోసగాళ్లు వెంటనే అతన్ని "వీఐపీ స్టాక్ 24" (VIP Stock 24) అనే వాట్సాప్ గ్రూప్‌లో యాడ్ చేశారు. ఈ గ్రూప్ ద్వారా నిందితులు ఆకర్షణీయమైన, అత్యంత లాభదాయకంగా కనిపించే ఇన్వెస్ట్‌మెంట్ ప్లాన్‌లను పంచుకున్నారు. తాము చెప్పినట్లుగా పెట్టుబడులు పెడితే కేవలం 11 రోజుల్లోనే డబ్బు అనేక రెట్లు పెరుగుతుందని పదే పదే నమ్మించారు.

నకిలీ ట్రేడింగ్ యాప్.. ఫేక్ లాభాలు

పోలీసులు తెలిపిన వివరాల ప్రకారం.. డాక్టర్ ఆసక్తి కనబరచగానే, పేరున్న ఒక అంతర్జాతీయ సంస్థ పేరును పోలి ఉండే ఒక నకిలీ (ఫేక్) ట్రేడింగ్ యాప్‌ను డౌన్‌లోడ్ చేసుకోమని సూచించారు. బాధితుడి వ్యక్తిగత, ఆర్థిక వివరాలను తీసుకున్న తర్వాత, వివిధ బ్యాంకు ఖాతాలకు నిధులను బదిలీ చేయమని అడిగారు. డాక్టర్ పంపిన ఆ భారీ మొత్తాలను ఆ నకిలీ యాప్‌లో పెట్టుబడులుగా చూపించారు. అంతేకాకుండా, ఆ పెట్టుబడులపై భారీ లాభాలు వస్తున్నట్లు అందులో ఫేక్ నంబర్లను చూపించడంతో బాధితుడు అది నిజమేనని గుడ్డిగా నమ్మేశాడు.

8 లావాదేవీల్లో రూ. 12.31 కోట్ల బదిలీ

మార్చి 7 నుంచి మార్చి 18 మధ్య వ్యవధిలో.. బాధితుడు ఎనిమిది సార్లు ఆర్థిక లావాదేవీలు జరిపాడు. మోసగాళ్లు అందించిన ఎనిమిది వేర్వేరు బ్యాంకు ఖాతాలకు మొత్తం రూ.12.31 కోట్లు బదిలీ చేశాడు. ఒక దశలో మరింత డబ్బు పెట్టుబడి పెట్టేందుకు డాక్టర్ వెనుకాడగా.. డబ్బులు ఇవ్వకపోతే ఆస్తులను జప్తు చేస్తామని నిందితులు బెదిరింపులకు దిగినట్లు పోలీసులు తెలిపారు. దీంతో భయపడిన బాధితుడు నిధులు బదిలీ చేయడం కొనసాగించాడు.

సుమారు మూడు నెలల పాటు, తాను ఆశించిన లాభాలు వస్తాయన్న ఉద్దేశంతో బాధితుడు డబ్బులు పంపుతూనే ఉన్నాడు. అయితే, ఎంతకీ డబ్బులు తిరిగి రాకపోవడం, పైగా మోసగాళ్లు ఇంకా పెట్టుబడులు డిమాండ్ చేస్తుండటంతో.. తాను మోసపోయానని గ్రహించాడు. వెంటనే సైబర్ పోలీసులను ఆశ్రయించి ఫిర్యాదు చేశాడు.

డాక్టర్ ఇచ్చిన ఫిర్యాదు ఆధారంగా, సైబర్ పోలీస్ స్టేషన్‌లో ఎఫ్ఐఆర్ (FIR) నమోదు చేశారు. నిందితులను పట్టుకునేందుకు, వారు కాజేసిన డబ్బు ఎక్కడికి వెళ్లిందనే దానిపై పోలీసులు దర్యాప్తు ప్రారంభించినట్లు వార్తా సంస్థ పీటీఐ (PTI) తెలిపింది.