Teacher Posts Vacant in Kendriya Vidyalayas | కేంద్రీయ, నవోదయ విద్యాలయాల్లో 13 వేలకు పైగా టీచర్ పోస్టులు ఖాళీ.. లోక్‌సభలో కేంద్రం కీలక ప్రకటన!

Teacher Posts Vacant in Kendriya Vidyalayas | త్రినేత్ర.న్యూస్ : దేశవ్యాప్తంగా ఉన్న అత్యంత ప్రతిష్టాత్మక విద్యాసంస్థలైన కేంద్రీయ విద్యాలయాలు (Kendriya Vidyalayas), జవహర్ నవోదయ విద్యాలయాల్లో (JNVs) ఉపాధ్యాయ కొరత భారీగానే ఉన్నట్లు తేలింది. ఈ రెండు విద్యాసంస్థల్లో కలిపి మొత్తం 13 వేలకు పైగా టీచర్ పోస్టులు ఖాళీగా ఉన్నట్లు కేంద్ర ప్రభుత్వం సోమవారం లోక్‌సభ వేదికగా అధికారికంగా వెల్లడించింది.

ఎక్కడెన్ని ఖాళీలు ఉన్నాయంటే?

లోక్‌సభలో ఓ ఎంపీ అడిగిన లిఖితపూర్వక ప్రశ్నకు కేంద్ర విద్యాశాఖ సహాయ మంత్రి జయంత్ చౌదరి (Jayant Chaudhary) సమాధానం ఇస్తూ పోస్టుల వివరాలను సభ ముందు ఉంచారు. దేశవ్యాప్తంగా ఉన్న స్కూళ్లలో..

కేంద్రీయ విద్యాలయాల్లో (KVs): 8618 ఉపాధ్యాయ పోస్టులు

జవహర్ నవోదయ విద్యాలయాల్లో (JNVs): 5083 ఉపాధ్యాయ పోస్టులు ఖాళీగా ఉన్నాయి.

ఈ స్థాయిలో వేకెన్సీలు ఎందుకు ఏర్పడుతున్నాయి?

ఉపాధ్యాయ ఖాళీలపై మంత్రి స్పందిస్తూ.. వేకెన్సీలు ఏర్పడటం, వాటిని భర్తీ చేయడం అనేది ఒక నిరంతర ప్రక్రియ అని తెలిపారు. ప్రధానంగా ఈ కింది కారణాల వల్ల ఎప్పటికప్పుడు ఖాళీలు ఏర్పడుతున్నాయని ఆయన సభకు వివరించారు.

• కొత్త పాఠశాలల ఏర్పాటు
• ఉపాధ్యాయుల పదవీ విరమణలు (Retirements)
• ఉద్యోగుల రాజీనామాలు, పదోన్నతులు (Promotions)
• ఇతర ప్రాంతాలకు బదిలీలు (Transfers)
• పాఠశాలల అప్‌గ్రేడేషన్, ఉద్యోగులు ఇతర డిపార్ట్‌మెంట్లకు వెళ్లడం

విద్యార్థుల చదువులకు ఇబ్బంది లేకుండా..

ఇన్ని వేల ఖాళీలు ఉన్నప్పటికీ, విద్యార్థుల చదువులకు ఎలాంటి ఆటంకం కలగకుండా కేంద్రం చర్యలు తీసుకుంటోందని మంత్రి జయంత్ చౌదరి స్పష్టం చేశారు. "ఖాళీగా ఉన్న రెగ్యులర్ ఉపాధ్యాయ పోస్టులను వీలైనంత త్వరగా భర్తీ చేసేందుకు సంబంధిత నిబంధనల ప్రకారం ప్రయత్నాలు ముమ్మరంగా జరుగుతున్నాయి. ఈలోపు బోధనా ప్రక్రియకు ఎలాంటి ఆటంకం కలగకుండా ఉండేందుకు, తాత్కాలిక ప్రాతిపదికన (కాంట్రాక్ట్ పద్ధతిన) టీచర్లను రిక్రూట్ చేసుకుంటున్నాం," అని ఆయన వెల్లడించారు.

కేంద్రీయ, నవోదయ విద్యాలయాలు ఏళ్ల తరబడి అత్యుత్తమ ఉత్తీర్ణత శాతాన్ని (High percentage results) నమోదు చేస్తున్నాయని గుర్తుచేసిన మంత్రి.. దీన్ని బట్టి అక్కడ విద్యా ప్రమాణాలు ఏమాత్రం తగ్గలేదని, విద్యార్థుల భవిష్యత్తుకు ఎలాంటి ఢోకా లేదని ధీమా వ్యక్తం చేశారు. త్వరలోనే ఈ ఖాళీల భర్తీకి సంబంధించి నోటిఫికేషన్లు వెలువడే అవకాశం ఉందని నిరుద్యోగ అభ్యర్థులు ఆశిస్తున్నారు.