No UPI Day October 2 | అక్టోబర్ 2న దేశవ్యాప్తంగా ‘నో యూపీఐ డే’ : ఆన్‌లైన్ పేమెంట్స్ బంద్.. షాపుల్లో కేవలం క్యాష్ మాత్రమే!

No UPI Day October 2 | త్రినేత్ర న్యూస్ : నిత్యం టీ కొట్టు నుంచి పెద్ద మాల్స్ వరకు జేబులో రూపాయి నోటు లేకుండా కేవలం స్మార్ట్‌ఫోన్‌తోనే లావాదేవీలు పూర్తిచేసే పౌరులకు కీలక అలర్ట్. గాంధీ జయంతి రోజైన అక్టోబర్ 2వ తేదీన దేశవ్యాప్తంగా ‘నో యూపీఐ డే’ (No UPI Day) నిర్వహించనున్నట్లు ట్రేడర్స్, బిజినెస్ అసోసియేషన్లు పిలుపునిచ్చాయి. ఆ ఒక్క రోజూ యూపీఐ, డిజిటల్ లావాదేవీలను పూర్తిగా బహిష్కరించి, కేవలం నగదు (Cash) ద్వారా మాత్రమే క్రయవిక్రయాలు జరపాలని నిర్ణయించారు.

అసలు వివాదం ఏమిటి? వ్యాపారుల నిరసన ఎందుకు?

యూపీఐ చెల్లింపులపై విధిస్తున్న మర్చంట్ డిస్కౌంట్ రేట్ (MDR) ఛార్జీలను చిన్న, మధ్యతరహా వ్యాపారులు తీవ్రంగా వ్యతిరేకిస్తున్నారు. డిజిటల్ ఇండియాను ప్రోత్సహించి, ఇప్పుడు లావాదేవీలపై రుసుములు బాదడం వల్ల తమ లాభాలపై తీవ్ర ప్రభావం పడుతోందని వారు ఆవేదన వ్యక్తం చేస్తున్నారు. ప్రభుత్వ మార్గదర్శకాలకు, అదనపు ఛార్జీల విధానానికి వ్యతిరేకంగా తమ నిరసన గళాన్ని బలంగా వినిపించేందుకే ఈ ఒక్కరోజు యూపీఐ బాయ్‌కాట్‌కు శ్రీకారం చుట్టారు.

క్యూఆర్ కోడ్‌లు, సౌండ్‌బాక్స్‌లకు నల్ల గుడ్డలు

ఈ వినూత్న నిరసనలో భాగంగా వ్యాపారులు కింది నిబంధనలు పాటించనున్నారు.

దుకాణాలు, వ్యాపార సంస్థల్లో ఉండే గూగుల్ పే, ఫోన్‌పే, పేటీఎం వంటి క్యూఆర్ (QR) కోడ్ స్టాండ్‌లు, పేమెంట్ సౌండ్‌బాక్స్‌లపై నల్లటి గుడ్డను (Black Cloth) కప్పి ఉంచుతారు.

ఎలాంటి యూపీఐ స్కానింగ్‌లు, నెట్ బ్యాంకింగ్ లేదా డిజిటల్ ట్రాన్స్‌ఫర్ల ద్వారా పేమెంట్స్‌ను అంగీకరించరు.

ప్రతి కొనుగోలుకు వినియోగదారుల నుంచి కేవలం నగదును మాత్రమే స్వీకరిస్తారు.

ప్రజలు ముందుగానే క్యాష్ సిద్ధం చేసుకోవాలి

అక్టోబర్ 2న మార్కెట్లు, కిరాణా దుకాణాలు, కూరగాయల మార్కెట్లలో డిజిటల్ స్కానర్లు పనిచేయకపోవడంతో సామాన్యులు తీవ్ర ఇబ్బందులు పడే అవకాశముంది. చివరి నిమిషంలో ఏటీఎంల వద్ద రద్దీ పెరిగే ప్రమాదం ఉన్నందున.. నిత్యావసర సరుకులు, ప్రయాణాలు, అత్యవసర ఖర్చుల కోసం ప్రజలు ముందస్తుగానే తగినంత నగదును డ్రా చేసి అందుబాటులో ఉంచుకోవాలని అసోసియేషన్ వర్గాలు కోరుతున్నాయి.