Jantar Mantar Protest Site Denotified | జంతర్ మంతర్ వద్ద ఇక ధర్నాలు బంద్: నిరసనలకు 3 కొత్త వేదికలను ఖరారు చేసిన ఢిల్లీ పోలీసులు

దశాబ్దాల చరిత్ర కలిగిన జంతర్ మంతర్ వద్ద ఇకపై నిరసనలకు అనుమతి లేదు. కేంద్ర హోంశాఖ సిఫార్సులతో ఢిల్లీ పోలీసులు 3 కొత్త వేదికలను ఖరారు చేశారు.

Jagadeesh

National | Published On Oct 12, 2026, 4.29 pm IST

Jantar Mantar Protest Site Denotified | జంతర్ మంతర్ వద్ద ఇక ధర్నాలు బంద్: నిరసనలకు 3 కొత్త వేదికలను ఖరారు చేసిన ఢిల్లీ పోలీసులు

సంక్షిప్త సారాంశం

దేశ రాజధాని ఢిల్లీలో నిరసనలకు కేంద్ర బిందువుగా ఉన్న జంతర్ మంతర్‌ను ఆ జాబితా నుంచి పోలీసులు అధికారికంగా తొలగించారు (డీనోటిఫై చేశారు). కేంద్ర హోంశాఖ కమిటీ సిఫార్సుల మేరకు నిరసనలు, ధర్నాల కోసం 3 కొత్త వేదికలను (రాంలీలా మైదానం, బురారీ గ్రౌండ్, తూర్పు ఢిల్లీలోని CBD గ్రౌండ్) కేటాయించారు. హై-సెక్యూరిటీ జోన్ కావడంతో పాటు ట్రాఫిక్ ఇబ్బందులను దృష్టిలో ఉంచుకుని ఢిల్లీ పోలీస్ కమిషనర్ అనురాగ్ కుమార్ ఈ ఉత్తర్వులు జారీ చేశారు. కొత్త వేదికల్లో ఆందోళనలు చేపట్టేందుకు త్వరలోనే ప్రత్యేక మార్గదర్శకాలను విడుదల చేయనున్నారు.

Jantar Mantar Protest Site Denotified | త్రినేత్ర న్యూస్ : దేశ రాజధాని నడిబొడ్డున ఎన్నో చారిత్రక ప్రజా ఉద్యమాలకు, నిరసనలకు కేంద్ర బిందువుగా నిలిచిన జంతర్ మంతర్ వద్ద ఇకపై ఎలాంటి ధర్నాలకు తావులేదు. దశాబ్దాలుగా ఉద్యమకారులు, రైతులు, విద్యార్థులు తమ గొంతు వినిపించిన ఈ ప్రాంతాన్ని అధికారిక నిరసన వేదికల జాబితా నుంచి ఢిల్లీ పోలీసులు తొలగించారు (డీనోటిఫై చేశారు). కేంద్ర హోంశాఖ ఆధ్వర్యంలోని కమిటీ చేసిన సిఫార్సుల ఆధారంగా ఈ నిర్ణయం తీసుకున్నారు.

ఈ మేరకు ఢిల్లీ పోలీస్ కమిషనర్ అనురాగ్ కుమార్ అధికారిక ఉత్తర్వులు జారీ చేశారు. జంతర్ మంతర్ స్థానంలో నిరసనలు, ప్రదర్శనల నిర్వహణ కోసం మూడు కొత్త వేదికలను ప్రభుత్వం ఖరారు చేసింది.

ఢిల్లీలో కొత్తగా ప్రకటించిన నిరసన వేదికలు

రాంలీలా గ్రౌండ్ (Ramlila Ground): సెంట్రల్ ఢిల్లీ పరిధిలోని ప్రముఖ గ్రౌండ్.

బురారీ గ్రౌండ్ (Burari Ground): ఉత్తర ఢిల్లీ ప్రాంతం.

సీబీడీ గ్రౌండ్ (CBD Ground): తూర్పు ఢిల్లీలోని కరకర్‌దూమా సమీపంలో ఉన్న గ్రౌండ్.

ఈ మూడు ప్రాంతాల్లో ధర్నాలు, సభలు నిర్వహించుకునేందుకు అనుమతులు, భద్రతా నిబంధనలతో కూడిన ప్రత్యేక కార్యాచరణ ప్రణాళికను త్వరలోనే విడుదల చేయనున్నట్లు పోలీస్ శాఖ స్పష్టం చేసింది.

Jantar Mantar Denotified as Protest Site Delhi Designates 3 New Venues

ట్రాఫిక్ కష్టాలకు చెక్.. రాజకీయ దుమారం

జంతర్ మంతర్ అతిపెద్ద హై-సెక్యూరిటీ జోన్‌లో ఉండటంతో పాటు అనేక కీలక ప్రభుత్వ భవనాలు, పార్లమెంటు, ప్రధాన కార్యాలయాలకు సమీపంలో ఉంది. తరచూ జరిగే ఆందోళనల వల్ల సాధారణ ప్రజలు తీవ్ర ట్రాఫిక్ సమస్యలను ఎదుర్కొంటున్నారు. ఈ నేపథ్యంలో తీసుకున్న నిర్ణయం వల్ల సాధారణ ప్రయాణికులకు ట్రాఫిక్ కష్టాలు తీరనున్నాయి.

అయితే, ఎన్నికల సంఘం చుట్టూ రాజకీయ విమర్శలు, విపక్ష ఇండియా కూటమి ఆందోళనలు తీవ్రమవుతున్న సమయంలోనే ఈ ఉత్తర్వులు రావడం చర్చనీయాంశంగా మారింది. ప్రజాస్వామ్యబద్ధంగా నిరసన తెలిపే హక్కులను అణచివేసేందుకే కేంద్రం ఈ నిర్ణయం తీసుకుందంటూ విపక్షాల నుంచి విమర్శలు వ్యక్తమయ్యే అవకాశముంది.

ఖగోళ అద్భుతం నుంచి నిరసనల అడ్డా వరకు

మహారాజా సవాయ్ జై సింగ్ II 1724లో నక్షత్రాలు, కాలగమనాన్ని పరిశీలించేందుకు ఖగోళ వేధశాలగా (ఆస్ట్రానామికల్ అబ్జర్వేటరీ) జంతర్ మంతర్‌ను నిర్మించారు. దాదాపు మూడు శతాబ్దాల చరిత్ర కలిగిన ఈ కట్టడం సమీప రోడ్డు.. గత మూడు దశాబ్దాలుగా దేశంలోనే అత్యంత కీలకమైన ప్రజా ఉద్యమాలకు, రెజ్లర్లు, విద్యార్థుల ఆందోళనలకు అడ్డాగా మారింది. ఇప్పుడు ఆ దశాబ్దాల అధ్యాయానికి తెరదించుతూ, నిరసనలను శివారు ప్రాంతాల మైదానాలకు తరలించారు.

ఇదీ చదవండి | నిరసనలకు కేరాఫ్ అడ్రస్‌గా ఉన్న జంతర్ మంతర్ కాలం చెల్లిందా?

Join Our Whatsapp Channel

Find us on