India LPG Connections | దేశవ్యాప్తంగా 33 కోట్ల ఎల్‌పీజీ కనెక్షన్లు: గ్లోబల్ ఎనర్జీ సంక్షోభంతో భారతీయ వంటగదుల్లో ఆందోళన!

India LPG Connections | త్రినేత్ర.న్యూస్ : ప్రపంచవ్యాప్తంగా చమురు, సహజ వాయువుల మార్కెట్లలో తీవ్ర అస్థిరత నెలకొంది. ఈ 'గ్లోబల్ ఎనర్జీ షాక్స్' (Global Energy Shocks) ప్రభావం నేరుగా భారతీయ గృహాలపై పడే ప్రమాదం పొంచి ఉంది. ఎందుకంటే, భారతదేశంలో వంట గ్యాస్ (LPG) వినియోగం రికార్డు స్థాయిలో ఉంది. మన దేశం ఎల్‌పీజీ అవసరాల కోసం దిగుమతులపైనే ఎక్కువగా ఆధారపడుతుండటంతో, గ్లోబల్ మార్కెట్‌లో జరిగే మార్పులు నేరుగా సామాన్యుడి జేబుకు చిల్లులు పెట్టే అవకాశం ఉంది. పెట్రోలియం ప్లానింగ్ అండ్ అనాలసిస్ సెల్ (PPAC) అక్టోబర్ 2025 నాటికి విడుదల చేసిన తాజా గణాంకాల ప్రకారం, దేశవ్యాప్తంగా యాక్టివ్ ఎల్‌పీజీ కనెక్షన్ల సంఖ్య 33.06 కోట్లకు చేరుకుంది.

India LPG Connections | రాష్ట్రాల వారీగా ఎల్పీజీ కనెక్షన్ల వినియోగం

దేశంలో అత్యధిక జనాభా కలిగిన ఉత్తరప్రదేశ్ (UP) ఎల్‌పీజీ కనెక్షన్ల వినియోగంలోనూ ముందుంది. ఆ తర్వాతి స్థానాల్లో మహారాష్ట్ర, పశ్చిమ బెంగాల్ ఉన్నాయి. అత్యల్పంగా లక్షద్వీప్‌లో కేవలం 10 వేల కనెక్షన్లు మాత్రమే ఉన్నాయి.

ప్రధాన రాష్ట్రాల జాబితా ఇదే

• ఉత్తర ప్రదేశ్: 4.85 కోట్లు
• మహారాష్ట్ర: 3.18 కోట్లు
• పశ్చిమ బెంగాల్: 2.72 కోట్లు
• తమిళనాడు: 2.38 కోట్లు
• బీహార్: 2.30 కోట్లు
• రాజస్థాన్: 1.83 కోట్లు

తెలుగు రాష్ట్రాల లెక్కలు ఇవే..

మన తెలుగు రాష్ట్రాల్లోనూ వంట గ్యాస్ వినియోగం భారీగానే ఉంది. తెలంగాణలో మొత్తం 1.28 కోట్ల ఎల్‌పీజీ యాక్టివ్ కనెక్షన్లు ఉన్నాయి. ఏపీలో 1.6 కోట్ల యాక్టివ్ ఎల్‌పీజీ కనెక్షన్లు ఉన్నాయి.

ప్రపంచ పరిణామాలతో ముప్పు

ప్రస్తుతం పశ్చిమాసియాలో నెలకొన్న యుద్ధ వాతావరణం, ఇతర భౌగోళిక రాజకీయ ఉద్రిక్తతల వల్ల అంతర్జాతీయ మార్కెట్‌లో గ్యాస్ సరఫరా వ్యవస్థలకు అంతరాయం కలుగుతోంది. ఒకవేళ ఇంధన ధరలు పెరిగితే, ఆ భారాన్ని ప్రభుత్వాలు సబ్సిడీల రూపంలో భరించాలి, లేదంటే నేరుగా ఈ 33 కోట్ల మంది వినియోగదారుల పైనే ఆ భారం పడుతుంది. ఈ పరిస్థితులు ఇలాగే కొనసాగితే భవిష్యత్తులో వంట గ్యాస్ ధరల పెరుగుదల తప్పకపోవచ్చని ఆర్థిక నిపుణులు ఆందోళన వ్యక్తం చేస్తున్నారు.