IMD monsoon forecast 2026 | నైరుతి రుతుపవనాలపై ఎల్ నినో ప్రభావం: ఈ ఏడాది దేశవ్యాప్తంగా సాధారణం కంటే తక్కువే వర్షాలు.. వాతావరణ శాఖ అంచనా

IMD monsoon forecast 2026 | త్రినేత్ర.న్యూస్ : భారతదేశ వ్యవసాయానికి, ఆర్థిక వ్యవస్థకు జీవనాడి అయిన నైరుతి రుతుపవనాల (Southwest Monsoon) రాక, ప్రభావంపై భారత వాతావరణ శాఖ (IMD) కీలక అంచనాలను విడుదల చేసింది. 2026 ఏడాదికి సంబంధించి ఏప్రిల్ 13న మొదటి దశ దీర్ఘకాలిక సూచన (LRF)ను వెల్లడించింది. పసిఫిక్ మహాసముద్రంలో ఏర్పడుతున్న ఎల్ నినో (El Niño) పరిస్థితుల కారణంగా ఈ ఏడాది దేశవ్యాప్తంగా సాధారణం కంటే తక్కువ వర్షపాతం నమోదయ్యే అవకాశం ఉందని వాతావరణ శాఖ స్పష్టం చేసింది.

వర్షపాతం ఎంత నమోదు కావొచ్చు?

IMD అంచనాల ప్రకారం, జూన్ నుంచి సెప్టెంబర్ వరకు సాగే నైరుతి రుతుపవనాల కాలంలో దేశవ్యాప్తంగా వర్షపాతం దీర్ఘకాలిక సగటు (LPA)లో 92% (± 5% మోడల్ లోపంతో) ఉండే అవకాశం ఉంది. 1971-2020 గణాంకాల ప్రకారం దేశ దీర్ఘకాలిక సగటు వర్షపాతం 87 సెంటీమీటర్లు కాగా, ఈసారి అది 90-95% మధ్య అంటే సాధారణం కంటే తక్కువగా ఉండొచ్చని ఐఎండీ అంచనా వేసింది.

• లోటు వర్షపాతం (< 90%) నమోదయ్యే అవకాశం 35% 
• సాధారణం కంటే తక్కువ (90-95%) వర్షపాతం నమోదయ్యే అవకాశం 31%
• సాధారణ వర్షపాతం (96-104%) నమోదయ్యే అవకాశం 27%

ఎల్ నినో ప్రభావం

ప్రస్తుతం భూమధ్యరేఖ పసిఫిక్ మహాసముద్రం మీదుగా ఉన్న లా నినా (La Niña) పరిస్థితులు క్రమంగా బలహీనపడి, తటస్థ పరిస్థితులుగా మారుతున్నాయి. రాబోయే నైరుతి రుతుపవనాల కాలంలో ఇవి ఎల్ నినో (El Niño) గా అభివృద్ధి చెందే అవకాశం ఉందని మాన్‌సూన్ మిషన్ క్లైమేట్ ఫోర్‌కాస్ట్ సిస్టమ్ (MMCFS) హెచ్చరిస్తోంది. ఈ ఎల్ నినో ప్రభావంతోనే దేశంలో వర్షాలు ముఖం చాటేసే ప్రమాదం ఉంది. అయితే, హిందూ మహాసముద్ర ద్విధ్రువ (IOD) పరిస్థితులు సీజన్ ముగిసే సమయానికి సానుకూలంగా మారే అవకాశం ఉండటం కాస్త ఊరటనిచ్చే అంశం.

తెలంగాణలో ఎలా ఉండనుంది?

దేశవ్యాప్తంగా వర్షాలు తక్కువగా కురుస్తాయన్న అంచనాలు ఉన్నప్పటికీ.. తెలంగాణలో వాతావరణం కాస్త భిన్నంగా, ఆశాజనకంగా ఉండనుంది. ఉత్తర తెలంగాణలోని పలు ప్రాంతాల్లో సాధారణం కంటే తక్కువ వర్షపాతం నమోదయ్యే అవకాశం ఉంది. అయితే.. మధ్య, తూర్పు, దక్షిణ తెలంగాణ ప్రాంతాల్లో మాత్రం సాధారణం లేదా అంతకంటే కాస్త ఎక్కువ వర్షాలు కురిసే అవకాశం ఉంది. ఓవరాల్‌గా చూసుకుంటే, 2026 నైరుతి రుతుపవనాల సీజన్‌లో తెలంగాణ రాష్ట్రంలో సగటున సాధారణ స్థాయి వర్షపాతం నమోదయ్యే అవకాశం ఉందని ఐఎండీ నివేదికలు సూచిస్తున్నాయి.

మే చివరిలో తుది అంచనాలు

ఏప్రిల్ ప్రారంభ పరిస్థితుల ఆధారంగా రూపొందించిన ఈ ప్రాథమిక అంచనాల తర్వాత, వాతావరణంలో వచ్చే మార్పులను బట్టి మే చివరి వారంలో రుతుపవనాల సీజన్ వర్షపాతానికి సంబంధించిన నవీకరించబడిన (Updated) సూచనలను భారత వాతావరణ శాఖ (IMD) జారీ చేయనుంది. జూన్, జూలై, ఆగస్టు నెలల్లో కూడా నెలవారీ అంచనాలను ఎప్పటికప్పుడు విడుదల చేయనున్నట్లు వాతావరణ శాఖ అధికారులు పేర్కొన్నారు.