Himachal Pradesh Salary Deferment | ఆర్థిక కష్టాల్లో హిమాచల్ ప్రదేశ్: సీఎం, మంత్రులు సహా ఐఏఎస్, ఐపీఎస్‌ల జీతాలు కట్!

Himachal Pradesh Salary Deferment | త్రినేత్ర.న్యూస్ : తీవ్ర ఆర్థిక సంక్షోభాన్ని ఎదుర్కొంటున్న హిమాచల్ ప్రదేశ్ ప్రభుత్వం సంచలన నిర్ణయం తీసుకుంది. రాష్ట్ర ఖజానాపై భారాన్ని తగ్గించుకునేందుకు పొదుపు చర్యలు చేపట్టింది. ఇందులో భాగంగా ముఖ్యమంత్రి, మంత్రులు, ఎమ్మెల్యేలతో పాటు రాష్ట్రంలోని అత్యున్నత స్థాయి ప్రభుత్వ అధికారులు, పోలీసు బాస్‌ల జీతాల్లో 50 శాతం వరకు తాత్కాలిక కోత విధించింది. ఈ మేరకు రాష్ట్ర ఆర్థిక శాఖ ఏప్రిల్ 18, 2026న అధికారిక నోటిఫికేషన్ జారీ చేసింది. ఈ నిర్ణయం ఏప్రిల్ 2026 (మే నెలలో చెల్లించే) జీతం నుండి అమలులోకి వస్తుందని, రాబోయే ఆరు నెలల పాటు ఈ నిబంధన కొనసాగుతుందని నోటిఫికేషన్‌లో స్పష్టం చేశారు.

ఎవరి జీతంలో ఎంత శాతం కోత పడనుందంటే?

రాష్ట్ర ముఖ్యమంత్రి జీతంలో 50% కోత విధించనున్నారు.

30 శాతం కోత : ఉప ముఖ్యమంత్రి, క్యాబినెట్ మంత్రులు, అసెంబ్లీ స్పీకర్, డిప్యూటీ స్పీకర్‌తో పాటు ప్రభుత్వ ప్రధాన కార్యదర్శి (Chief Secretary), అదనపు ప్రధాన కార్యదర్శులు, ప్రిన్సిపల్ సెక్రటరీలు, డైరెక్టర్ జనరల్ ఆఫ్ పోలీస్ (DGP), ప్రిన్సిపల్ చీఫ్ కన్జర్వేటర్ ఆఫ్ ఫారెస్ట్స్.

20 శాతం కోత : ఎమ్మెల్యేలు (MLAs), సెక్రటరీలు, వివిధ శాఖల అధిపతులు (HoDs), ఇన్‌స్పెక్టర్ జనరల్ ఆఫ్ పోలీస్ (IGP), డీఐజీ, ఎస్పీ (SP) స్థాయి పోలీసు అధికారులు, డివిజనల్ ఫారెస్ట్ ఆఫీసర్ (DFO) స్థాయి వరకు ఉన్న అటవీ అధికారులు.

ప్రభుత్వ రంగ సంస్థలు, బోర్డులు, విశ్వవిద్యాలయాలు, స్వయంప్రతిపత్తి గల సంస్థలు కూడా ఇదే విధానాన్ని పాటించాలని రాష్ట్ర ప్రభుత్వం ఆదేశించింది.

ఉద్యోగులు తెలుసుకోవాల్సిన ముఖ్య విషయాలు ఇవే

ఇది శాశ్వత కోత కాదు: జీతాల చెల్లింపును మాత్రమే ప్రభుత్వం తాత్కాలికంగా ఆపివేసింది. రాష్ట్ర ఆర్థిక పరిస్థితి మెరుగుపడిన తర్వాత ఈ బకాయిలను తిరిగి చెల్లిస్తామని ప్రభుత్వం స్పష్టం చేసింది.

పారదర్శకత: ఇ-శాలరీ సిస్టమ్ (e-salary system), పే స్లిప్‌లలో ఎంత జీతం చెల్లిస్తున్నారు, ఎంత మొత్తం వాయిదా వేశారు అనే వివరాలను స్పష్టంగా చూపిస్తారు.

పెన్షన్, ఇతర ప్రయోజనాలపై ప్రభావం ఉండదు: కోత విధించిన మొత్తంతో కలుపుకుని, పూర్తి జీతం (Gross Salary) ఆధారంగానే పెన్షన్, లీవ్ ఎన్‌క్యాష్‌మెంట్ వంటి ప్రయోజనాలను లెక్కిస్తారు.

పన్నులు, లోన్ ఈఎంఐల పరిస్థితి ఏంటి?

ఆదాయపు పన్ను (Income Tax), NPS/UPS/GPF వంటి చట్టబద్ధమైన తగ్గింపులు ఎప్పటిలాగే పూర్తి జీతం మీదనే లెక్కిస్తారు. బ్యాంక్ లోన్లు తీసుకున్న ఉద్యోగులకు, వారి ఈఎంఐ (EMI) కట్ అయిన తర్వాత మిగిలిన జీతంపై ఈ 20% లేదా 30% కోతను లెక్కిస్తారు.

ఈ నిర్ణయం ఎందుకు తీసుకోవాల్సి వచ్చింది?

కేంద్ర ప్రభుత్వం నుంచి రాష్ట్రానికి రావాల్సిన 'రెవెన్యూ లోటు గ్రాంట్' (RDG) నిలిచిపోవడమే ఈ పరిస్థితికి ప్రధాన కారణం. 16వ ఆర్థిక సంఘం సిఫార్సుల మేరకు హిమాచల్ ప్రదేశ్ తో సహా 17 రాష్ట్రాలకు ఈ గ్రాంట్ నిలిపివేయడంతో, హిమాచల్ ప్రదేశ్ ఏటా దాదాపు రూ. 8,000 కోట్ల ఆదాయాన్ని కోల్పోతోంది. ఈ విషయాన్ని ముఖ్యమంత్రి సుఖ్విందర్ సింగ్ సుఖు మార్చి 21న ప్రవేశపెట్టిన 2026-27 బడ్జెట్ సమావేశాల్లోనే ప్రస్తావించారు. రాష్ట్రం గడ్డుకాలాన్ని ఎదుర్కొంటోందని, కఠిన నిర్ణయాలు తప్పవని అప్పట్లోనే ఆయన సంకేతాలు ఇచ్చారు. దానికి అనుగుణంగానే ఈ తాజా నిర్ణయం వెలువడింది.