Central Vista Project | సెంట్రల్ విస్టా ప్రాజెక్టు కోసం పీకి, వేరే ప్రాంతాలకు తరలించిన చెట్లలో 43 శాతం మృత్యువాత

Central Vista Project | త్రినేత్ర.న్యూస్ : కేంద్ర ప్రభుత్వం అత్యంత ప్రతిష్టాత్మకంగా, దాదాపు రూ.20,000 కోట్లతో చేపట్టిన 'సెంట్రల్ విస్టా' (Central Vista) రీడెవలప్‌మెంట్ ప్రాజెక్టులో పర్యావరణ నష్టానికి సంబంధించిన కీలక గణాంకాలు వెలుగులోకి వచ్చాయి. నిర్మాణ పనుల కోసం వేరే ప్రాంతాలకు తరలించిన (Transplant) చెట్లలో ఏకంగా 43 శాతం చెట్లు చనిపోయినట్లు కేంద్ర ప్రభుత్వం లోక్‌సభకు తెలిపింది. తృణమూల్ కాంగ్రెస్ (TMC) ఎంపీ మహువా మొయిత్రా అడిగిన ప్రశ్నకు కేంద్ర గృహ, పట్టణ వ్యవహారాల శాఖ సహాయ మంత్రి తోఖాన్ సాహు ఈ మేరకు లిఖితపూర్వక సమాధానం ఇచ్చారు.

ఏ ప్రాంతం నుంచి ఎన్ని చెట్లను తరలించారంటే?

వివిధ హై-ప్రొఫైల్ నిర్మాణ ప్రాంతాల నుంచి చెట్లను పీకి, సురక్షిత ప్రాంతాల్లో నాటారు. అత్యధికంగా కామన్ సెంట్రల్ సెక్రటేరియట్ (ప్రస్తుతం కర్తవ్య భవన్) సైట్ల నుంచే చెట్లను తరలించారు. లోక్‌సభకు సమర్పించిన డేటా ప్రకారం తరలించిన చెట్ల వివరాలు ఇలా ఉన్నాయి:

• నిర్మాణ ప్రాంతం (సైట్) - తరలించిన చెట్ల సంఖ్య
• సెంట్రల్ సెక్రటేరియట్ (కర్తవ్య భవన్ 1, 2, 3) - 1,734
• సీసీఎస్ (CCS) 6, 7 సైట్లు - 458
• నూతన పార్లమెంట్ భవనం - 402
• ఉపరాష్ట్రపతి ఎన్‌క్లేవ్ (VP Enclave) - 390
• ప్రధాని కార్యాలయం, నివాసం (సేవా తీర్థ్) - 143

ప్రత్యామ్నాయ చర్యలు.. నిధుల వ్యయం

చనిపోయిన చెట్ల వల్ల జరిగిన పర్యావరణ నష్టాన్ని భర్తీ చేయడానికి తాము ప్రత్యామ్నాయ అటవీకరణ చర్యలు (Compensatory plantation) చేపట్టామని కేంద్ర ప్రభుత్వం వివరించింది.

కొత్త మొక్కలు: బదర్‌పూర్‌లోని ఎన్టీపీసీ ఎకో పార్క్ (NTPC Eco Park) లో 24,450 చెట్లను, గిటోర్నీలో 1,730 చెట్లను కొత్తగా నాటినట్లు మంత్రి తెలిపారు.

ఎగ్జిక్యూటివ్ ఎన్‌క్లేవ్ (పీఎం కార్యాలయం) నుంచి అత్యధికంగా 342 చెట్లను ఘట మసీదు, కృష్ణ మీనన్ మార్గ్‌లకు తరలించారు.

ఖర్చుల వివరాలు: చెట్ల తరలింపు, ప్రత్యామ్నాయ మొక్కలు నాటడం కోసం గత మూడు ఆర్థిక సంవత్సరాల్లో (2023-24 నుంచి 2025-26 మధ్య) కేంద్ర ప్రభుత్వం రూ.5.29 కోట్లు ఖర్చు చేసింది.

పర్యావరణ కార్యకలాపాల కోసం వార్షిక వ్యయం భారీగా పెరిగింది. 2023-24లో రూ.35.86 లక్షలు ఖర్చు చేయగా, 2025-26 నాటికి అది రూ.370.30 లక్షలకు చేరింది.

సుప్రీంకోర్టు వరకు వెళ్లిన వివాదం

2019లో ప్రారంభమైన సెంట్రల్ విస్టా ప్రాజెక్టు పర్యావరణ ప్రభావం, చెట్ల తరలింపు పద్ధతులపై పర్యావరణవేత్తలు, ప్రతిపక్ష నేతల నుంచి తీవ్ర విమర్శలు ఎదుర్కొంటోంది. పర్యావరణ అనుమతులు, భూ వినియోగ మార్పులపై వివాదాలు చెలరేగడంతో ఈ ప్రాజెక్టు సుప్రీంకోర్టు వరకు వెళ్లింది.

డిసెంబర్ 2020లో, న్యాయపరమైన సవాళ్లు ఉన్నప్పటికీ ప్రభుత్వం నిర్మాణ పనులు ప్రారంభించడాన్ని గమనించిన సుప్రీంకోర్టు.. తుది తీర్పు వచ్చే వరకు ప్రాజెక్టు పనులన్నింటినీ నిలిపివేయాలని ఆదేశించింది. ఆ తర్వాత జనవరి 2021లో సర్వోన్నత న్యాయస్థానం ఈ ప్రాజెక్టుకు గ్రీన్ సిగ్నల్ ఇచ్చింది. ప్రస్తుతం ఈ ప్రతిష్టాత్మక ప్రాజెక్టు చివరి దశ పనుల్లో ఉంది. వేలాది వృక్షాలు ప్రాణాలు కోల్పోవడం పర్యావరణ ప్రేమికులను ఆందోళనకు గురిచేస్తోంది.