Silent Heart Attack | ఆరోగ్యంగా ఉన్నా గుండెపోటు ఎందుకు వస్తోంది?.. 17 ఏళ్ల వయసు నుంచే ఈ బేసిక్ బ్లడ్ టెస్ట్ తప్పనిసరి

Silent Heart Attack | త్రినేత్ర.న్యూస్ : జిమ్‌లో వర్కవుట్స్ చేస్తూ కుప్పకూలిపోతున్న యువత.. మారథాన్‌లో పరుగెత్తుతూ ప్రాణాలు కోల్పోతున్న ఫిట్‌నెస్ ఎంథూసియాస్ట్స్.. ఇలాంటి వీడియోలు ఈ మధ్య సోషల్ మీడియాలో తరచుగా వైరల్ అవుతున్నాయి. అసలు ఎంతో ఫిట్‌గా, ఆరోగ్యంగా ఉండే యువతను ఈ 'సైలెంట్ హార్ట్ ఎటాక్స్' (Silent Heart Attacks) ఎందుకు బలితీసుకుంటున్నాయి? నారాయణ హెల్త్ ఫౌండర్, ప్రముఖ కార్డియాక్ సర్జన్ డాక్టర్ దేవి శెట్టి దీనిపై సంచలన విషయాలు పంచుకున్నారు. ప్రతి భారతీయుడు 17 ఏళ్ల వయసు నుంచే తప్పనిసరిగా చేయించుకోవాల్సిన ఒక టెస్ట్ గురించి ఆయన వివరించారు.

సైలెంట్ హార్ట్ ఎటాక్స్ కొత్తేమీ కాదు

యువతలో గుండెపోటు రావడం అనేది అకస్మాత్తుగా పుట్టుకొచ్చిన కొత్త సమస్య ఏమీ కాదని డాక్టర్ దేవి శెట్టి అంటున్నారు. ఇండియాలో మొదటి నుంచీ ఈ సమస్య ఉందని.. కాకపోతే ఇప్పుడు దానిపై అవేర్‌నెస్ బాగా పెరిగిందని చెప్పారు. "కరోనరీ ఆర్టరీల్లో (Coronary Arteries) బ్లాకేజీలు ఉన్న దాదాపు 50 శాతం మంది రోగులలో ఎటాక్ వచ్చే వరకు ఎలాంటి లక్షణాలు (Symptoms) కనిపించవు. చాతీ నొప్పి లాంటి ముందస్తు హెచ్చరికలు ఏమీ ఉండవు" అని ఆయన స్పష్టం చేశారు.

ముఖ్యంగా డయాబెటిస్ ఉన్నవారికి ఈ ముప్పు మరింత ఎక్కువ. ఎందుకంటే మధుమేహం వల్ల నరాల సెన్సేషన్ (Nerve Sensations) తగ్గుతుంది, కాబట్టి బ్లాకేజ్ ఉన్నా కూడా వారికి ఎలాంటి నొప్పీ తెలియదు. ప్రపంచానికే 'డయాబెటిస్ క్యాపిటల్'గా ఉన్న ఇండియాలో ఈ సైలెంట్ ముప్పు చాలా ఎక్కువ మందిలో పొంచి ఉందని ఆయన ఆందోళన వ్యక్తం చేశారు.

ఫిట్‌నెస్‌ వేరు.. గుండె ఆరోగ్యం వేరు

రోజువారీ వర్కవుట్స్ చేస్తూ, మంచి డైట్ (Clean Diet) ఫాలో అయ్యే వారంతా తమకు ఎలాంటి గుండె జబ్బులు రావని భ్రమపడుతుంటారు. కానీ డాక్టర్ దేవి శెట్టి మాటల్లో చెప్పాలంటే.. మనం ఎంత ఫిట్‌గా ఉన్నామనేది.. మన గుండె రక్తనాళాల పరిస్థితిని ఏమాత్రం అంచనా వేయలేదు. రోజూ పరుగెత్తే వారిలోనూ ప్రాణాంతకమైన బ్లాకేజీలు ఉండొచ్చు. ఈ వాస్తవాన్ని గుర్తించకపోవడం వల్లే చాలామంది కనీస స్క్రీనింగ్ (Screening) లేకుండానే జిమ్‌లలో ట్రెడ్‌మిల్స్ ఎక్కేస్తున్నారని ఆయన ఆవేదన వ్యక్తం చేశారు.

ఆరోగ్యంగా ఉన్నామని భావించే వ్యక్తులు అకస్మాత్తుగా కుప్పకూలిపోయే దాదాపు ప్రతి కేసునూ ముందుగానే నివారించవచ్చని డాక్టర్ శెట్టి కుండ బద్దలు కొట్టారు. బ్లడ్ టెస్ట్, ECG, ఎకోకార్డియోగ్రామ్, కార్డియాక్ సిటీ స్కాన్ (Cardiac CT Scan) లాంటి బేసిక్ టెస్టుల ద్వారా బ్లాకేజీని ముందుగానే గుర్తించవచ్చని తెలిపారు.

కొత్త రూల్: 17 ఏళ్ల నుంచే టెస్టులు

కార్డియాలజీ సొసైటీ ఆఫ్ ఇండియా తాజా మార్గదర్శకాల ప్రకారం, చాలామంది ఊహించిన దానికంటే చాలా ముందుగానే స్క్రీనింగ్ ప్రారంభించాలని డాక్టర్ శెట్టి సూచిస్తున్నారు.

17 ఏళ్ల వయసులో: ప్రతి యువకుడు 17 ఏళ్ల వయసులోనే బేసిక్ బ్లడ్ టెస్ట్ చేయించుకోవాలి. అప్పుడే కొలెస్ట్రాల్ లెవల్స్ గుర్తిస్తే, ఇది పెద్ద సమస్యగా మారకముందే డైట్ ద్వారా వాటిని కంట్రోల్ చేసుకోవచ్చు.

35–40 ఏళ్ల వయసులో: పురుషులంతా రొటీన్ కార్డియాక్ టెస్టింగ్‌తో పాటు హార్ట్ CT స్కాన్ (CT Scan of the heart) చేయించుకోవడం ప్రారంభించాలి.

30 ఏళ్ల వయసులో: ఫ్యామిలీలో గుండె జబ్బుల హిస్టరీ (Family History) ఉన్నవారు ఏమాత్రం ఆలస్యం చేయకుండా 30 ఏళ్లకే స్క్రీనింగ్ మొదలుపెట్టాలి.

అంతకంటే ముందే: దీర్ఘకాలికంగా డయాబెటిస్ ఉన్నవారు 30 ఏళ్ల లోపే ఈ టెస్టులు చేయించుకోవాలి.

మన బరువు, బ్లడ్ గ్రూప్ ఎలా గుర్తుపెట్టుకుంటారో.. తమ బ్లడ్ ప్రెజర్, కొలెస్ట్రాల్, హార్ట్ రేట్ నంబర్లను కూడా ప్రతి ఒక్కరూ కచ్చితంగా తెలుసుకోవాలని ఆయన సూచించారు.

యంగ్ అథ్లెట్స్ పరిస్థితి ఏంటి?

పోటీ క్రీడల్లో (Competitive sport) పాల్గొనే యంగ్ అథ్లెట్స్ కూడా పూర్తి కార్డియాక్ చెకప్ చేయించుకున్న తర్వాతే బరిలోకి దిగాలని ఆయన సూచిస్తున్నారు. గత నాలుగేళ్లలో (FIFA డేటా ప్రకారం) దాదాపు 670 మంది ప్రొఫెషనల్ ఫుట్‌బాలర్స్ కార్డియాక్ అరెస్ట్‌కు (Cardiac Arrest) గురయ్యారు. నిత్యం డాక్టర్ల పర్యవేక్షణలో ఉండే ఎలైట్ అథ్లెట్స్ పరిస్థితే ఇలా ఉంటే.. సాధారణ యువత కనీస స్క్రీనింగ్ లేకుండా కఠినమైన వర్కవుట్స్ చేయడం ఏమాత్రం సురక్షితం కాదని ఆయన హెచ్చరిస్తున్నారు.

నొప్పి వచ్చే వరకు లేదా లక్షణాలు కనిపించే వరకు వేచి చూడకండి. ఏటా కేవలం ఒక్క గంట సమయం కేటాయించి డయాగ్నొస్టిక్ ల్యాబ్‌లో బేసిక్ టెస్టులు చేయించుకుంటే నివారించదగిన మరణాలను సులభంగా అడ్డుకోవచ్చని డాక్టర్ దేవి శెట్టి స్పష్టం చేస్తున్నారు.