Austin mass shooting | ఆస్టిన్ కాల్పుల్లో ప్రాణాలు కోల్పోయిన భారత సంతతి విద్యార్థిని సవిత: ‘సూపర్‌స్టార్’ అంటూ కన్నీటి నివాళి

Austin mass shooting | త్రినేత్ర.న్యూస్ : అమెరికాలో గన్ కల్చర్ మరోసారి పడగవిప్పింది. టెక్సాస్‌ రాష్ట్రం ఆస్టిన్‌లోని వెస్ట్ సిక్త్ స్ట్రీట్‌లో జరిగిన సామూహిక కాల్పుల్లో (మాస్ షూటింగ్) నలుగురు ప్రాణాలు కోల్పోయారు. ఈ మృతుల్లో భారత సంతతికి చెందిన 21 ఏళ్ల విద్యార్థిని సవితా షణ్ముగసుందరం కూడా ఉండటం స్థానిక భారతీయ కమ్యూనిటీని తీవ్ర కలచివేస్తోంది. ఆదివారం తెల్లవారుజామున బుఫోర్డ్స్ బ్యాక్‌యార్డ్ బీర్ గార్డెన్‌లో రద్దీగా ఉన్న సమయంలో ఎన్డియాగా డయాగ్నే (53) అనే సాయుధుడు విచక్షణారహితంగా కాల్పులకు తెగబడ్డాడు. ఈ ఘటనలో సవిత (21), రైడర్ హారింగ్టన్ (19), జార్జ్ పెడెర్సన్ (30) ప్రాణాలు కోల్పోయారు. మరో 14 మందికి గాయాలయ్యాయి. సమాచారం అందుకున్న వెంటనే ఘటనా స్థలానికి చేరుకున్న ఆస్టిన్ పోలీసులు.. దుండగుడిని కాల్చి చంపారు.

దర్యాప్తు ముమ్మరం చేసిన ఎఫ్‌బీఐ (FBI)

ఈ దారుణ ఘటనపై ఎఫ్‌బీఐ (FBI) దర్యాప్తు ముమ్మరం చేసింది. వేలాది గంటల వీడియో ఫుటేజీని పరిశీలిస్తున్న అధికారులు, దాదాపు 150 మందికి పైగా ప్రత్యక్ష సాక్షులను విచారిస్తున్నారు. కాగా, కాల్పులకు పాల్పడిన నిందితుడు "ప్రాపర్టీ ఆఫ్ అల్లా" (Property of Allah) అని రాసి ఉన్న, ఇరాన్ జెండా డిజైన్ కలిగిన స్వెట్‌షర్ట్‌ను ధరించి ఉన్నట్లు ప్రాథమిక నివేదికలు చెబుతున్నాయి.

ఎవరీ సవితా షణ్ముగసుందరం?

ఆస్టిన్‌లోనే పుట్టి పెరిగిన సవితా షణ్ముగసుందరం (సవితా షాన్).. యూనివర్సిటీ ఆఫ్ టెక్సాస్ ఎట్ ఆస్టిన్ (UT Austin)లో చదువుతున్న అత్యంత ప్రతిభావంతురాలైన విద్యార్థిని. ఆమె మెక్‌కాంబ్స్ స్కూల్ ఆఫ్ బిజినెస్, కాలేజ్ ఆఫ్ లిబరల్ ఆర్ట్స్ నుండి మేనేజ్‌మెంట్ ఇన్ఫర్మేషన్ సిస్టమ్స్ (MIS), ఎకనామిక్స్‌లో డ్యూయల్ డిగ్రీ (సీనియర్ ఇయర్) చేస్తోంది. "మేనేజ్‌మెంట్ ఇన్ఫర్మేషన్ సిస్టమ్స్, ఎకనామిక్స్‌లో నాకు ఉన్న బలమైన పునాదితో.. సంక్లిష్టమైన వ్యాపార సమస్యలను పరిష్కరించడానికి టెక్నాలజీని ఉపయోగించడం పట్ల నాకు చాలా ఆసక్తి ఉంది. టెక్నాలజీ స్ట్రాటజీ కన్సల్టింగ్, ప్రొడక్ట్ మేనేజ్‌మెంట్, బిజినెస్ అనలిటిక్స్‌లో నాకు ప్రాక్టికల్ అనుభవం ఉంది. గ్లోబల్ ఫైనాన్షియల్ సంస్థల నుంచి స్టార్టప్‌ల వరకు అనేక సంస్థలతో కలిసి పనిచేసే అవకాశం నాకు లభించింది," అని సవిత తన లింక్డ్‌ఇన్ (LinkedIn) ప్రొఫైల్‌లో రాసుకుంది.

సూపర్‌స్టార్ అంటూ ప్రొఫెసర్ల కన్నీటి వీడ్కోలు

సవితను ఆమె ప్రొఫెసర్లు "సూపర్‌స్టార్ స్టూడెంట్"గా అభివర్ణిస్తున్నారు. మే 2026లో ఆమె గ్రాడ్యుయేషన్ పూర్తి కానుండగా, అప్పటికే ఒక పెద్ద ప్రొఫెషనల్ సర్వీసెస్ సంస్థలో ఆమెకు ఉద్యోగం కూడా ఖరారైంది. "మెక్‌కాంబ్స్ స్కూల్ ఆఫ్ బిజినెస్‌లో సవిత మా సూపర్‌స్టార్ విద్యార్థుల్లో ఒకరు. ఆమె ఒక డబుల్ మేజర్ ఆనర్స్ స్టూడెంట్. ఎన్నో విద్యార్థి సంఘాల్లో చురుగ్గా పాల్గొనేది. క్లాస్‌రూమ్‌లో ఆమె ఒక వెలుగు. ఆమెను కోల్పోవడం జీర్ణించుకోలేకపోతున్నాం" అని మెక్‌కాంబ్స్ స్కూల్ ఆఫ్ బిజినెస్ అసిస్టెంట్ ప్రొఫెసర్ రస్ ఫిన్నీ 'ఎక్స్' వేదికగా నివాళులర్పించారు.

క్యాంపస్ జీవితంలో ఎంతో చురుగ్గా ఉండే సవిత.. ఇండియన్ స్టూడెంట్స్ అసోసియేషన్ ఎగ్జిక్యూటివ్ బోర్డ్‌లో సభ్యురాలిగా, 'ఆస్టిన్ తమిళ్ సంఘం'కు వాలంటీర్‌గా కూడా సేవలు అందించింది. "ఆమె తన తల్లిదండ్రులకు ప్రియమైన బిడ్డ, స్నేహితులకు నమ్మకమైన నేస్తం. ప్రపంచాన్ని మార్చడానికి సిద్ధమవుతున్న ఒక అద్భుతమైన యువతి" అని యూటీ ఆస్టిన్ ప్రెసిడెంట్ జిమ్ డేవిస్ ఒక ప్రకటనలో కొనియాడారు.

భారతీయ కమ్యూనిటీలో తీవ్ర విషాదం

ఈ ఘటన ఆస్టిన్‌లోని "సిలికాన్ హిల్స్" కారిడార్‌లో ఉన్న భారతీయ అమెరికన్ కమ్యూనిటీని, ముఖ్యంగా విద్యార్థులు, టెక్నాలజీ నిపుణులను తీవ్ర దిగ్భ్రాంతికి గురిచేసింది. కమ్యూనిటీ నాయకులు స్థానిక అధికారులతో కలిసి సవిత కుటుంబానికి అండగా నిలుస్తున్నారు. ఆమె జ్ఞాపకార్థం ఒక కమ్యూనిటీ మెమోరియల్ సర్వీస్‌ను కూడా ఏర్పాటు చేసేందుకు సన్నాహాలు చేస్తున్నారు.

https://x.com/Austin_Police/status/2028559557182509174

https://x.com/rfinney/status/2028640140302663740