Strait of Hormuz Open | వాణిజ్య నౌకలకు ఇరాన్ గ్రీన్ సిగ్నల్: హార్ముజ్ జలసంధి పూర్తిగా ఓపెన్.. ట్రంప్ కీలక ప్రకటన

Strait of Hormuz Open | త్రినేత్ర.న్యూస్ : అంతర్జాతీయ సముద్ర వ్యవహారాలు, వాణిజ్యానికి సంబంధించి ఇరాన్ ఒక అతిపెద్ద ప్రకటన చేసింది. ఇజ్రాయెల్, లెబనాన్ దేశాల మధ్య కుదిరిన కాల్పుల విరమణ ఒప్పందం నేపథ్యంలో గ్లోబల్ ట్రేడ్‌కు కీలకమైన హార్ముజ్ జలసంధిని వాణిజ్య నౌకల కోసం పూర్తిగా తెరిచినట్లు ప్రకటించింది.

హార్ముజ్ జలసంధి ఓపెన్: ఇరాన్ విదేశాంగ మంత్రి ఏమన్నారంటే?

"లెబనాన్‌లో కాల్పుల విరమణ ఒప్పందానికి అనుగుణంగా.. హార్ముజ్ జలసంధి ద్వారా వాణిజ్య నౌకల రాకపోకలకు పూర్తిగా అనుమతిస్తున్నాం. ఇరాన్ పోర్ట్స్ అండ్ మారిటైమ్ ఆర్గనైజేషన్ ఇప్పటికే ప్రకటించిన కోఆర్డినేటెడ్ రూట్ ద్వారా మిగిలిన కాల్పుల విరమణ సమయంలో నౌకలు ఎలాంటి ఆటంకం లేకుండా ప్రయాణించవచ్చు" అని ఇరాన్ విదేశాంగ మంత్రి అబ్బాస్ అరాఘ్చీ (Abbas Araghchi) 'ఎక్స్' వేదికగా పోస్ట్ చేశారు.

In line with the ceasefire in Lebanon, the passage for all commercial vessels through Strait of Hormuz is declared completely open for the remaining period of ceasefire, on the coordinated route as already announced by Ports and Maritime Organisation of the Islamic Rep. of Iran.

— Seyed Abbas Araghchi (@araghchi) April 17, 2026

ట్రంప్ రియాక్షన్.. ఇరాన్‌కు థాంక్స్

ఇరాన్ ప్రకటనపై అమెరికా అధ్యక్షుడు డొనాల్డ్ ట్రంప్ (Donald Trump) సానుకూలంగా స్పందించారు. ఈ మేరకు తన 'ట్రూత్ సోషల్' (Truth Social) ప్లాట్‌ఫామ్‌లో ఒక పోస్ట్ చేశారు. "హార్ముజ్ జలసంధిని పూర్తిగా తెరిచినట్లు, పూర్తిస్థాయిలో నౌకల రాకపోకలకు సిద్ధంగా ఉన్నట్లు ఇరాన్ ఇప్పుడే ప్రకటించింది. థాంక్యూ!" అని ట్రంప్ పేర్కొన్నారు. ఈ టైమ్‌లో హార్ముజ్ జలసంధిని తెరవడం అంతర్జాతీయ వాణిజ్యానికి ఒక గొప్ప ఊరట అని నిపుణులు భావిస్తున్నారు.

ఇజ్రాయెల్ - లెబనాన్ సీజ్‌ఫైర్ డీల్ (Ceasefire Deal)

అమెరికా కృషితో లెబనాన్, ఇజ్రాయెల్ మధ్య గురువారం 10 రోజుల పాటు కాల్పుల విరమణ (Ceasefire) ఒప్పందం కుదిరింది. ఇజ్రాయెల్ ప్రధాని బెంజమిన్ నెతన్యాహు, లెబనాన్ అధ్యక్షుడు జోసెఫ్ ఔన్‌తో ఫోన్‌లో చర్చలు జరిపిన తర్వాత ఈ ఒప్పందం కుదిరినట్లు ట్రంప్ వెల్లడించారు. "రెండు దేశాల మధ్య శాంతిని నెలకొల్పే దిశగా.. ఈ ఇద్దరు నాయకులు అధికారికంగా 10 రోజుల పాటు కాల్పుల విరమణను ప్రారంభించడానికి అంగీకరించారు" అని ఆయన తెలిపారు.

రాబోయే నాలుగైదు రోజుల్లో నెతన్యాహు, జోసెఫ్ ఔన్ ఇద్దరూ వైట్‌హౌస్‌ను సందర్శించి మొదటిసారిగా ముఖాముఖి భేటీ అయ్యే అవకాశం ఉందని ట్రంప్ ఆశాభావం వ్యక్తం చేశారు. ఇరాన్‌తో యుద్ధాన్ని ముగించేందుకు అమెరికా చేస్తున్న ప్రయత్నాల్లో భాగంగానే ఈ కాల్పుల విరమణ ఒప్పందం కుదిరింది. ఏ ఒప్పందమైనా లెబనాన్ సీజ్‌ఫైర్‌తో ముడిపడి ఉండాలని ఇరాన్ (Tehran) పట్టుబట్టడంతో ఈ పరిణామాలు చోటుచేసుకున్నాయి.