Qatar Helicopter Crash | ఖ‌తార్‌లో హెలికాప్టర్ ప్రమాదం.. ఆరుగురు మృతి, మరొకరు గల్లంతు

Qatar Helicopter Crash | వెస్ట్ ఆసియాలో కొన‌సాగుతున్న ఉద్రిక్త ప‌రిస్థితుల మ‌ధ్య ఖ‌తార్‌లో ఘోర ప్ర‌మాదం చోటు చేసుకుంది. క‌తార్ స‌ముద్ర జ‌లాల్లో ఆదివారం తెల్ల‌వారు జామున హెలికాప్ట‌ర్ కూలిపోయింది. ఈ ఘ‌ట‌న‌లో గురు మృతి చెంద‌గా, మ‌రొక‌రు గ‌ల్లంత‌య్యార‌ని అంతర్గత వ్యవహారాల మంత్రిత్వ శాఖ వెల్లడించింది. ఈ ప్రమాదం అనంత‌రం త‌క్ష‌ణం స‌హాయ‌క చ‌ర్య‌లు అధికారులు ప్రారంభించారు. గ‌ల్లంతైన వ్య‌క్తి కోసం గాలిస్తున్నారు. సముద్ర తీర భద్రతా బృందాలు, రక్షణ సిబ్బంది తక్షణమే ఘటనాస్థలానికి చేరుకుని సహాయక చర్యలు చేపట్టారు. అయితే, సముద్ర పరిస్థితులు అనుకూలంగా లేకపోవడంతో రక్షణ చ‌ర్య‌ల‌కు ఆటంకం క‌లుగుతుంద‌ని అధికార వ‌ర్గాలు తెలిపాయి.

ఈ ఘటనను మొదట ఖ‌తార్ రక్షణ మంత్రిత్వ శాఖ గుర్తించినట్లు సమాచారం. అనంతరం ప్రభుత్వం అధికారిక ప్రకటన విడుదల చేసింది. గల్లంతైన వ్యక్తి ఆచూకీ కోసం ప‌లు విభాగాలు క‌లిసి ప‌ని చేస్తున్నాయ‌ని పేర్కొంది. సెర్చ్ ఆప‌రేష‌న్‌లో భాగంగా రక్షణ నౌకలు, నిఘా పరికరాలు, శిక్షణ పొందిన సిబ్బందిని వినియోగిస్తున్నారు. గాలింపు వేగవంతం చేసేందుకు అందుబాటులో ఉన్న అన్ని వనరులను ఉపయోగిస్తున్నట్లు అధికారులు పేర్కొన్నారు. సముద్రం, వాతావరణ పరిస్థితులను పరిశీలిస్తున్నారు. రక్షణ చర్యలపై ప్రభావం చూపే అవకాశం ఉన్నందున అన్ని జాగ్ర‌త్త‌లు తీసుకుంటున్న‌ట్లు అధికార వ‌ర్గాలు తెలిపాయి. గల్లంతైన వ్యక్తిని కాపాడేందుకు అవ‌స‌ర‌మైన చ‌ర్య‌లు తీసుకుంటున్నామ‌ని ప్ర‌భుత్వం పేర్కొంది.