7 Indians released by Pakistan | పాకిస్తాన్ చెర నుంచి ఏడుగురు భారతీయులకు విముక్తి.. వరదల్లో కొట్టుకుపోయి, ఏడాది పాటు నరకం చూసి..

7 Indians released by Pakistan | త్రినేత్ర.న్యూస్: 2023లో సంభవించిన భారీ వరదల సమయంలో ప్రమాదవశాత్తు సరిహద్దు దాటి పాకిస్తాన్‌లో బందీలుగా మారిన ఏడుగురు భారత పౌరులు ఎట్టకేలకు స్వదేశానికి చేరుకున్నారు. శనివారం నాడు పాకిస్తాన్ అధికారులు వీరిని అటారీ సరిహద్దు (Attari Border) వద్ద భారత సరిహద్దు భద్రతా దళానికి (BSF) అప్పగించారు. దీంతో నెలల తరబడి పాక్ జైళ్లలో మగ్గిన వీరికి స్వేచ్ఛ లభించినట్లయింది.

అప్పగింత వివరాలు

పంజాబ్‌లోని అటారీ ఇంటిగ్రేటెడ్ చెక్ పోస్ట్ వద్ద ఈ అప్పగింత ప్రక్రియ జరిగింది. అటారీ బోర్డర్ ప్రోటోకాల్ ఆఫీసర్ అరుణ్ మహల్ మాట్లాడుతూ, ఇరు దేశాల నుంచి శనివారం ఉదయమే విడుదల ఉత్తర్వులు అందాయని తెలిపారు. "పాకిస్తాన్ రేంజర్లు ఏడుగురు ఖైదీలను బీఎస్‌ఎఫ్‌కు అప్పగించారు. అనంతరం కస్టమ్స్, ఇమ్మిగ్రేషన్ కార్యాలయానికి తరలించి ఫార్మాలిటీస్ పూర్తి చేశాం." అని ఆయన మీడియాకు తెలిపారు.

విడుదలైన వారిలో నలుగురు ఫిరోజ్‌పూర్ జిల్లాకు చెందినవారు కాగా, జలంధర్, లూధియానా (పంజాబ్) నుంచి ఒక్కొక్కరు, ఉత్తరప్రదేశ్‌కు చెందిన ఒకరు ఉన్నారు. 2023లో సరిహద్దు వెంబడి భారీ వరదలు వచ్చినప్పుడు, తమ పశువులను కాపాడుకునే ప్రయత్నంలో వీరంతా వరద ఉధృతికి పాకిస్తాన్ భూభాగంలోకి కొట్టుకుపోయారు.

బాధితుల కన్నీటి గాథలు

స్వదేశానికి తిరిగి వచ్చిన ఓ బాధితుడు తమ కష్టాలను వివరిస్తూ.. "నీటి ప్రవాహం మమ్మల్ని సరిహద్దు దాటించేసింది. ప్రవాహానికి కొట్టుకుపోయి పాకిస్తాన్‌లోని ఓ ఇంటికి చేరుకున్నాం. మమ్మల్ని భారత ఆర్మీకి అప్పగించమని కోరాము. కానీ వారు మమ్మల్ని పాకిస్తాన్ ఆర్మీకి పట్టించారు. ఇది ప్రమాదవశాత్తు జరిగిందని చెప్పినా వారు వినలేదు. మా కళ్లకు గంతలు కట్టి తీసుకెపోయారు. మాకు ఏడాది శిక్ష విధించారు. మమ్మల్ని తిరిగి ఇంటికి రప్పించిన ప్రభుత్వానికి కృతజ్ఞతలు." అని చెప్పారు.

మరొక బాధితుడు మాట్లాడుతూ.. తాను రెండేళ్లకు పైగా బందీగా ఉన్నానని ఆవేదన వ్యక్తం చేశారు. "నేను పాకిస్తాన్‌లో రెండున్నర ఏళ్లు ఉన్నాను. వాళ్ళు నన్ను ఒక గదిలో బంధించారు. కేవలం కొట్టడానికి మాత్రమే బయటకు తీసి, మళ్లీ లోపల వేసేవారు.." అని బాధితుడు భావోద్వేగానికి గురయ్యాడు.

ఇంకా చాలా మంది ఉన్నారు

మూడు నెలల పాటు పాక్ కస్టడీలో ఉన్న మరో ఖైదీ మాట్లాడుతూ, పాక్ జైళ్లలో ఉన్న ఇతర భారతీయులను కూడా విడిపించాలని న్యూఢిల్లీని కోరారు. "అక్కడ ఇంకా చాలా మంది భారతీయులు ఉన్నారు. 18 మంది మెంటల్ హాస్పిటల్‌లో ఉన్నారు. మమ్మల్ని దారుణంగా కొట్టారు. నేను 28 రోజుల పాటు రిమాండ్‌లో ఉన్నాను." అని మీడియాకు వివరించాడు.

మరొక వ్యక్తి ట్రాక్టర్‌ను కాపాడుకోబోయి వరదలో కొట్టుకుపోయానని తెలిపారు. "జూలై 2023లో ట్రాక్టర్ కాపాడుకోవడానికి వెళ్తే ప్రవాహం నన్ను పాకిస్తాన్‌లోకి లాక్కెళ్లింది. గ్రామస్థులను సహాయం అడిగాను.. కానీ వాళ్లు నన్ను మిలిటరీకి అప్పగించారు. నాకు ఏడాది శిక్ష, రూ.10,000 జరిమానా విధించారు. మిగతా వారిని కూడా ప్రభుత్వం వెనక్కి తీసుకురావాలి." అని కోరారు.

ముఖ్యంగా పంజాబ్ సెక్టార్‌లో వరదలు, వర్షాకాలంలో ప్రమాదవశాత్తు సరిహద్దు దాటే పౌరులను తిరిగి రప్పించడానికి భారత్, పాకిస్తాన్ మధ్య ఉన్న దౌత్యపరమైన సమన్వయం కారణంగా ఈ విడుదల సాధ్యపడింది.