PM Ekta Mall Scam | రాయదుర్గం ఏక్తా మాల్ టెండర్లలో భారీ కుంభకోణం: నిర్మలా సీతారామన్‌కు కేటీఆర్ సంచలన లేఖ

రాయదుర్గం పీఎం ఏక్తా మాల్ టెండర్లలో భారీ కుంభకోణం జరిగిందని కేటీఆర్ ఆరోపించారు. టెండర్లను వెంటనే రద్దు చేసి దర్యాప్తు చేయాలని నిర్మలా సీతారామన్‌కు లేఖ రాశారు.

Jagadeesh

Hyderabad | Published On Aug 10, 2026, 9.56 pm IST

PM Ekta Mall Scam | రాయదుర్గం ఏక్తా మాల్ టెండర్లలో భారీ కుంభకోణం: నిర్మలా సీతారామన్‌కు కేటీఆర్ సంచలన లేఖ

సంక్షిప్త సారాంశం

హైదరాబాద్ రాయదుర్గంలో 6.30 ఎకరాల్లో చేపట్టనున్న పీఎం ఏక్తా మాల్ ప్రాజెక్టులో భారీ అవకతవకలు జరిగాయని బీఆర్ఎస్ వర్కింగ్ ప్రెసిడెంట్ కేటీఆర్ ఆరోపించారు. ప్రభుత్వానికి 9 లక్షల చదరపు అడుగుల వాటా వస్తే, ప్రైవేట్ డెవలపర్‌కు రెట్టింపు స్థాయిలో 18 లక్షల చదరపు అడుగులు కట్టబెడుతున్నారని విమర్శించారు. ఈ ప్రాజెక్టుకు ఇస్తున్న రూ. 202 కోట్ల కేంద్ర నిధులను వెంటనే నిలిపివేసి, టెండర్లను రద్దు చేయాలని ఆర్థిక మంత్రి నిర్మలా సీతారామన్‌కు లేఖ రాశారు. కాంగ్రెస్ అవినీతిపై కేవలం విమర్శలు చేయడమే కాకుండా, కేంద్రం చిత్తశుద్ధితో స్వతంత్ర దర్యాప్తు జరిపించి చర్యలు తీసుకోవాలని ఆయన డిమాండ్ చేశారు.

PM Ekta Mall Scam | త్రినేత్ర.న్యూస్ : హైదరాబాద్‌లోని (Hyderabad) రాయదుర్గంలో ప్రతిష్టాత్మకంగా నిర్మించతలపెట్టిన 'పీఎం ఏక్తా మాల్' (PM Ekta Mall) ప్రాజెక్టులో భారీ కుంభకోణం జరిగిందని బీఆర్ఎస్ వర్కింగ్ ప్రెసిడెంట్ కేటీఆర్ (KTR) సంచలన ఆరోపణలు చేశారు. కోట్ల రూపాయల విలువైన ప్రజా ఆస్తులను, కేంద్ర ప్రభుత్వ నిధులను కాంగ్రెస్ ప్రభుత్వం ఒక ప్రైవేట్ డెవలపర్‌కు దోచిపెడుతోందని ఆయన తీవ్ర స్థాయిలో మండిపడ్డారు. ఈ మేరకు కేంద్ర ఆర్థిక శాఖ మంత్రి నిర్మలా సీతారామన్‌కు (Nirmala Sitharaman) ఒక సుదీర్ఘ లేఖ రాశారు.

అసలు కుంభకోణం ఎలా జరిగిందంటే?

రాయదుర్గంలోని 6.30 ఎకరాల అత్యంత విలువైన ప్రభుత్వ భూమిలో (Prime public land) సుమారు రూ. 2,059.81 కోట్ల అంచనా వ్యయంతో ఈ ప్రాజెక్టును కాంగ్రెస్ ప్రభుత్వం చేపడుతోంది. దీనికోసం కేంద్ర ప్రభుత్వం రూ. 202 కోట్ల ఆర్థిక సహాయం (Central assistance) అందిస్తోంది. అయితే, ఈ ప్రాజెక్టులో నిర్మించే వాణిజ్య సముదాయంలో ప్రభుత్వానికి కేవలం 9 లక్షల చదరపు అడుగుల (Sq. ft.) విస్తీర్ణం మాత్రమే దక్కుతుందని, కానీ ప్రైవేట్ డెవలపర్‌కు మాత్రం ప్రభుత్వ వాటా కంటే రెట్టింపు స్థాయిలో.. అంటే కనీసం 18 లక్షల చదరపు అడుగుల స్థలాన్ని కట్టబెడుతున్నారని కేటీఆర్ తన లేఖలో వివరించారు. ప్రజల భూమి, ప్రజల సొమ్మును అడ్డగోలుగా ఇలా ప్రైవేట్ సంస్థకు ధారాదత్తం చేయడం ఎంతవరకు సమంజసం అని ఆయన ప్రభుత్వాన్ని నిలదీశారు.

టెండర్లు రద్దు చేయాలి.. దర్యాప్తు జరగాలి

ఈ అవకతవకల నేపథ్యంలో వెంటనే పీఎం ఏక్తా మాల్ టెండర్లను (Tenders) రద్దు చేయాలని కేటీఆర్ డిమాండ్ చేశారు. స్వతంత్ర విచారణ పూర్తయ్యేంత వరకు కేంద్రం నుంచి రావాల్సిన నిధులను తక్షణమే నిలిపివేయాలని ఆర్థిక మంత్రిని కోరారు. భూమి విలువ నిర్ధారణ (Land valuation), టెండర్ నిబంధనలు, ఫైనాన్షియల్ మోడల్, బిడ్ వాల్యుయేషన్ తదితర అంశాలపై నిష్పక్షపాతంగా స్వతంత్ర దర్యాప్తు (Independent investigation) జరిపించాలని ఆయన కేంద్ర ప్రభుత్వాన్ని డిమాండ్ చేశారు.

కేంద్రం చిత్తశుద్ధి నిరూపించుకోవాలి

రాష్ట్రంలో కాంగ్రెస్ ప్రభుత్వ అవినీతి, కుంభకోణాలపై ఆధారాలతో సహా వివరాలు అందిస్తున్నా.. బీజేపీ ప్రభుత్వం (BJP Govt) స్పందించకపోవడంపై కేటీఆర్ అసహనం వ్యక్తం చేశారు. సాక్షాత్తూ ప్రధానమంత్రితో సహా కేంద్ర మంత్రులు కాంగ్రెస్ అవినీతి గురించి బహిరంగంగా ఉపన్యాసాలు ఇవ్వడమే తప్ప, తీసుకుంటున్న చర్యలు శూన్యమని విమర్శించారు. కనీసం ఈ తాజా 'పీఎం ఏక్తా మాల్' కుంభకోణంపై అయినా కేంద్ర ప్రభుత్వం తక్షణమే స్పందించి, విచారణకు ఆదేశించడం ద్వారా తమ చిత్తశుద్ధిని చాటుకోవాలని కేటీఆర్ సవాల్ విసిరారు.

SERIOUS CONCERN OVER PM EKTA MALL PROJECT IN HYDERABAD, TELANGANA

BRS Working President @KTRBRS has written to Union Finance Minister @nsitharaman raising serious concerns over the proposed PM Ekta Mall at Raidurg and the use of public land and Central funds.

The project… pic.twitter.com/kpmUGLMGIP

— BRS Party (@BRSparty) August 10, 2026