Hyderabad Fake Tea Powder Racket | టీ స్టాళ్లలో టీ లో ఎన్ని కెమికల్స్ కలుపుతున్నారో తెలుసా?

Hyderabad Fake Tea Powder Racket | త్రినేత్ర.న్యూస్ : ఉదయం లేవగానే కప్పు వేడి వేడి చాయ్ పడితే కానీ చాలామందికి రోజు గడవదు. రోడ్డు పక్కన ఉన్న చిన్న టీ స్టాల్స్ నుంచి ప్రముఖ బేకరీల వరకు ఎక్కడ పడితే అక్కడ మనం టీ తాగుతుంటాం. కానీ, మనం తాగే ఆ టీ పొడి అసలైనదేనా? లేక కల్తీదా? అని ఎప్పుడైనా ఆలోచించారా? నగరవాసుల ఆరోగ్యంతో ప్రాణాంతక చెలగాటమాడుతున్న ఓ భారీ నకిలీ టీ పొడి తయారీ ముఠాను హైదరాబాద్ టాస్క్ ఫోర్స్, H-FAST (హైదరాబాద్ ఫుడ్ అడల్టరేషన్ సర్వైలెన్స్ టీమ్) బృందం తాజాగా గుట్టురట్టు చేసింది.

15 ప్రాంతాల్లో ఏకకాలంలో ఆకస్మిక దాడులు

నగరంలో పెద్ద ఎత్తున నకిలీ టీ పొడి తయారవుతోందన్న పక్కా సమాచారంతో, ఏప్రిల్ 23న H-FAST అధికారులు హైదరాబాద్ వ్యాప్తంగా 15 ప్రాంతాల్లో ఆకస్మిక దాడులు నిర్వహించారు. కల్తీ టీ పొడి తయారీ, విక్రయ కేంద్రాలపై స్పెషల్ ఆపరేషన్ చేపట్టగా విస్తుపోయే నిజాలు వెలుగులోకి వచ్చాయి. కాసుల కక్కుర్తితో తక్కువ నాణ్యత గల టీ పొడికి కృత్రిమ రంగులు, గడువు ముగిసిన ముడి పదార్థాలను కలిపి మార్కెట్‌లోకి వదులుతున్నట్లు అధికారులు గుర్తించారు. గల్లీల్లో ఉండే టీ స్టాళ్లతో పాటు పలు ప్రముఖ విక్రయశాలలకు కూడా ఈ కల్తీ పొడి సరఫరా అవుతున్నట్లు విచారణలో తేలింది.

తయారీ ఎలా చేస్తున్నారంటే?

నిందితులు కోల్‌కతా, కేరళ, అస్సాం లాంటి రాష్ట్రాల నుంచి అత్యంత తక్కువ నాణ్యత గల టీ పొడిని సేకరిస్తున్నారు. దానికి ఆకర్షణీయమైన రంగు వచ్చేందుకు 'సన్‌సెట్ ఎల్లో' (Sunset Yellow FCF), 'టార్ట్రాజైన్' (Tartrazine) లాంటి అత్యంత ప్రమాదకరమైన రసాయన రంగులను కలుపుతున్నారు. అంతేకాకుండా, వాడేసిన టీ పొడి, బెల్లం పాకం, ఎక్స్‌పైరీ అయిన టీ పొడిని కూడా ఇందులో మిక్స్ చేస్తున్నారు. అనంతరం ఈ హానికరమైన మిశ్రమాలను ప్రముఖ బ్రాండ్ల పేర్లతో ప్యాకింగ్ చేసి గుట్టుచప్పుడు కాకుండా విక్రయిస్తున్నారు.

భారీగా పట్టుబడిన కల్తీ సరుకు.. 10 మంది అరెస్ట్

ఈ అక్రమ వ్యాపారానికి పాల్పడుతున్న 10 మంది ముఠా సభ్యులను పోలీసులు అరెస్ట్ చేశారు. వీరిలో రంగులు సరఫరా చేసే కొంపల్లికి చెందిన పరేశ్ రాజన్, రంగులు కలిపే పెట్లాబుర్జుకు చెందిన సంజు (పతి)తో పాటు సతీష్ (ముషీరాబాద్), నవీన్ (బౌయిన్‌పల్లి), నరసింహ (ఆసిఫ్‌నగర్ - ప్యాకెట్ల తయారీదారు), చున్నిలాల్ చౌదరి (రాజేంద్రనగర్), నరసింహులు (బోరబండ), రాజేష్ (పెట్లాబుర్జు), రవీందర్ (బీదర్), వసీం (మల్లేపల్లి)లను అదుపులోకి తీసుకున్నారు.

వీరి స్థావరాల నుంచి ఏకంగా 3,000 కిలోల కల్తీ టీ పొడి, 1500 కిలోల ఎక్స్‌పైరీ అయిన టీ పొడి, 100 కిలోల బెల్లం, భారీగా కృత్రిమ రంగులను అధికారులు సీజ్ చేశారు.

అధికారుల తీవ్ర హెచ్చరికలు

ఇలాంటి కల్తీ టీ పొడి తాగడం వల్ల తీవ్రమైన కడుపు సంబంధిత వ్యాధులు, అలర్జీలు, దీర్ఘకాలిక ఆరోగ్య సమస్యలు వస్తాయని వైద్యులు చెబుతున్నారు. ఈ సందర్భంగా అధికారులు ప్రజలకు పలు సూచనలు చేశారు. టీ పొడిని కేవలం గుర్తింపు పొందిన, నమ్మకమైన షాపుల్లోనే కొనుగోలు చేయాలని కోరారు. ఆహార కల్తీపై ఎటువంటి అనుమానం ఉన్నా వెంటనే అధికారులకు ఫిర్యాదు చేయాలని సూచించారు.

ఆహార భద్రతా ప్రమాణాలు పాటించని వారిపై, నిబంధనలు ఉల్లంఘించే వారిపై భారతీయ న్యాయ సంహిత (BNS), ఫుడ్ సేఫ్టీ అండ్ స్టాండర్డ్స్ చట్టం కింద కఠిన క్రిమినల్ చర్యలు తీసుకుంటామని టాస్క్ ఫోర్స్ డీసీపీ గైక్వాడ్ వైభవ్ రఘునాథ్ గట్టిగా హెచ్చరించారు. ఈ ఆపరేషన్‌ను ఆయన పర్యవేక్షణలో H-FAST ఇన్‌స్పెక్టర్లు ఎన్.రంజిత్ కుమార్ గౌడ్, ఎం.అంజయ్య, వారి బృందం విజయవంతంగా నిర్వహించింది.