GHMC Street Dog Drive | హైదరాబాద్‌లో జీహెచ్‌ఎంసీ స్పెషల్ డ్రైవ్: 27 కుక్క పిల్లల దత్తత.. 500 శునకాలకు వ్యాక్సినేషన్

GHMC Street Dog Drive | హైదరాబాద్ నగరవాసులను నిత్యం భయభ్రాంతులకు గురిచేస్తున్న వీధి శునకాల సమస్యపై జీహెచ్‌ఎంసీ (GHMC) ప్రత్యేక దృష్టి సారించింది. వీధి కుక్కల జనాభాను నియంత్రించడంతో పాటు, వాటి ద్వారా వ్యాపించే ప్రాణాంతక వ్యాధులను అరికట్టేందుకు నగరంలోని అన్ని సర్కిళ్లలో మంగళవారం భారీ ఎత్తున స్పెషల్ డ్రైవ్ చేపట్టింది.

రాష్ట్ర ప్రభుత్వం అత్యంత ప్రతిష్టాత్మకంగా నిర్వహిస్తున్న "ప్రజా పాలన - ప్రజా ప్రగతి (PP-PP)" కార్యక్రమం 8వ వారం, 54వ రోజుకు చేరుకున్న సందర్భంగా.. GHMC వెటర్నరీ విభాగం ఆధ్వర్యంలో ఈ ప్రత్యేక కార్యక్రమాన్ని విజయవంతంగా అమలు చేశారు.

ఇండీ కుక్క పిల్లల దత్తత: స్థానిక జాతికి చెందిన 27 ఇండీ (Indie) కుక్క పిల్లలను జంతు ప్రేమికులు దత్తత తీసుకున్నారు.

స్టెరిలైజేషన్ (కుటుంబ నియంత్రణ): నగరవ్యాప్తంగా 69 వీధి శునకాలకు పకడ్బందీగా కుటుంబ నియంత్రణ ఆపరేషన్లు నిర్వహించారు.

యాంటీ రేబీస్ వ్యాక్సినేషన్: ఎండలు తీవ్రమవుతున్న ఈ టైమ్‌లో కుక్కలకు రేబీస్ సోకే ప్రమాదం ఎక్కువ కాబట్టి, ముందుజాగ్రత్తగా 495 వీధి శునకాలకు యాంటీ రేబీస్ టీకాలు వేశారు.

జంతు సంక్షేమమే లక్ష్యంగా

నగరంలో వీధి శునకాల జనాభాను శాస్త్రీయ పద్ధతిలో నియంత్రించడం, రేబీస్ వ్యాధి ప్రబలకుండా నివారించడం, జంతు సంక్షేమాన్ని పెంపొందించడమే లక్ష్యంగా ఈ స్పెషల్ డ్రైవ్ చేపట్టినట్లు GHMC ఉన్నతాధికారులు తెలిపారు. ఖరీదైన విదేశీ జాతి కుక్కల వైపు మొగ్గు చూపకుండా, మన వాతావరణానికి సులభంగా అలవాటు పడే ఇండీ (స్థానిక) కుక్క పిల్లలను దత్తత తీసుకొని వాటి సంరక్షణలో భాగస్వాములు కావాలని వెటర్నరీ అధికారులు నగర ప్రజలకు పిలుపునిచ్చారు.

ఈ కార్యక్రమంలో జీహెచ్‌ఎంసీ వెటర్నరీ అధికారులు, సిబ్బందితో పాటు పలు స్వచ్ఛంద జంతు సంక్షేమ సంస్థల (NGOs) ప్రతినిధులు కూడా చురుగ్గా పాల్గొన్నారు.