Hyatt hotel Raipur scam | 36 ఏళ్లలో 300 లగ్జరీ హోటళ్లకు టోకరా.. ‘చార్లెస్ శోభరాజ్’ స్టైల్‌లో చీటింగ్, చివరకు ఇలా దొరికిపోయాడు

• గత 36 ఏళ్లుగా దేశవ్యాప్తంగా సుమారు 300 ఫైవ్ స్టార్ హోటళ్లను మోసం చేసిన బింగ్సన్ జాన్ (69) అనే తమిళనాడు వాసి అరెస్ట్
• రాయ్‌పూర్‌లోని హయత్ హోటల్‌లో రూ. 63 వేల బిల్లు ఎగ్గొట్టి, రూ. 1.48 లక్షల విలువైన లాప్‌టాప్‌తో ఉడాయింపు
• మొబైల్ సిగ్నల్స్ ఆధారంగా సైబర్ పోలీసుల సాయంతో భువనేశ్వర్‌లో పట్టుకున్న పోలీసులు
• సీరియల్ కిల్లర్ 'చార్లెస్ శోభరాజ్' స్ఫూర్తితో, రకరకాల గెటప్పుల్లో ఈ మోసాలకు పాల్పడినట్లు నిందితుడి వెల్లడి

Hyatt hotel Raipur scam | త్రినేత్ర.న్యూస్ : దేశవ్యాప్తంగా ఉన్న లగ్జరీ హోటళ్లను లక్ష్యంగా చేసుకుని దశాబ్దాలుగా మోసాలకు పాల్పడుతున్న 69 ఏళ్ల వృద్ధుడిని పోలీసులు ఎట్టకేలకు అరెస్ట్ చేశారు. గత 36 ఏళ్లలో దాదాపు 300కు పైగా ఫైవ్ స్టార్ హోటళ్లలో జల్సాలు చేసి, బిల్లు కట్టకుండా ఉడాయించడం ఇతడి స్టైల్. తమిళనాడుకు చెందిన బింగ్సన్ జాన్ అనే ఈ కిలాడీ మోసగాడు.. ఏకంగా తీహార్ జైలులోనే 15 ఏళ్లు గడిపి వచ్చాడంటే ఇతని నేర చరిత్ర ఏ స్థాయిలో ఉందో అర్థం చేసుకోవచ్చు.

రాయ్‌పూర్ హయత్ హోటల్ కంప్లైంట్‌తో దొరికిన దొంగ

ఛత్తీస్‌గఢ్‌లోని రాయ్‌పూర్‌లో ఉన్న ప్రముఖ లగ్జరీ హోటల్ 'హయత్' (Hyatt Hotel) ఇచ్చిన ఫిర్యాదుతో ఈ భారీ మోసం వెలుగులోకి వచ్చింది. పోలీసుల వివరాల ప్రకారం.. జూన్ 25న బింగ్సన్ జాన్ హయత్ హోటల్‌లో చెక్-ఇన్ అయ్యాడు. రెండు రోజుల పాటు అక్కడే ఉండి.. జూన్ 27 న ఉదయం ఎవరికీ చెప్పకుండా హోటల్ నుంచి జెండా ఎత్తేశాడు.

అతడు కట్టాల్సిన రూ. 63,755 హోటల్ బిల్లు ఎగ్గొట్టడమే కాకుండా.. హోటల్ స్టాఫ్ ఆయనకు వినియోగించుకోవడానికి ఇచ్చిన రూ. 1.48 లక్షల విలువైన లాప్‌టాప్‌ను కూడా తనతో పాటే ఎత్తుకెళ్లాడు. హోటల్ యాజమాన్యం ఫిర్యాదుతో రంగంలోకి దిగిన సైబర్ పోలీసులు.. అతని మొబైల్ ఫోన్ లొకేషన్ ఆధారంగా భువనేశ్వర్‌లో ఉన్నట్లు గుర్తించి అరెస్ట్ చేశారు. దొంగిలించిన లాప్‌టాప్‌ను కూడా స్వాధీనం చేసుకున్నారు.

టూరిస్ట్ గైడ్, యోగా టీచర్ అవతారాలు

హోటల్ సిబ్బందిని నమ్మించడానికి ఈ నిందితుడు రకరకాల వేషాలు వేసేవాడు. విదేశీయులకు టూరిస్ట్ గైడ్‌ (Tourist guide) అని, ఇంగ్లీష్ టీచర్ అని, లేదా యోగా ఇన్స్‌ట్రక్టర్ (Yoga instructor) అని చెప్పి హోటల్ స్టాఫ్‌తో పరిచయం పెంచుకునేవాడు. వారి నమ్మకాన్ని చూరగొన్న తర్వాత.. కొద్ది రోజులు దర్జాగా లగ్జరీ లైఫ్ గడిపి.. ఏమాత్రం అనుమానం రాకుండా బిల్లు కట్టకుండా పారిపోయేవాడు. 1990 నుంచి దాదాపు 10కి పైగా రాష్ట్రాల్లోని మెట్రో నగరాల్లో సుమారు 300 హోటళ్లను ఇలాగే మోసం చేసినట్లు దర్యాప్తులో తేలింది.

'చార్లెస్ శోభరాజ్' స్ఫూర్తితో..

పోలీసుల విచారణలో బింగ్సన్ జాన్ పలు విస్తుపోయే నిజాలు అంగీకరించాడు. ప్రపంచాన్ని గడగడలాడించిన ఇండో-ఫ్రెంచ్ సీరియల్ కిల్లర్, మోసగాడు 'చార్లెస్ శోభరాజ్' (Charles Sobhraj) తనకు స్ఫూర్తి అని.. అతడి స్టైల్‌ను కాపీ కొట్టే ఈ మోసాలకు పాల్పడినట్లు చెప్పాడు.

గతంలో కూడా పలు కేసుల్లో పట్టుబడిన ఈ నిందితుడు తీహార్ జైలుతో సహా పలు జైళ్లలో 15 ఏళ్లకు పైగా శిక్ష అనుభవించాడు. జైలులో ఉన్న సమయంలోనే పలువురు కరుడుగట్టిన నేరస్థులతో ఇతనికి పరిచయాలు ఏర్పడ్డాయి. పోలీసుల కళ్లు కప్పడానికి ఫేక్ ఐడీలతో వివిధ పేర్లు వాడేవాడని పోలీసులు అనుమానిస్తున్నారు. ప్రస్తుతం ఈ కేసుపై తదుపరి దర్యాప్తు కొనసాగుతోంది.