Mumbai Stabbing Case | మతం అడిగి.. ఇస్లాం ‘కల్మా’ చదవలేదని సెక్యూరిటీ గార్డులపై కత్తితో ఉన్మాది దాడి

Mumbai Stabbing Case | త్రినేత్ర.న్యూస్ : మహారాష్ట్ర రాజధాని ముంబైలో దారుణ ఘటన వెలుగుచూసింది. ఇద్దరు సెక్యూరిటీ గార్డులను వారి మతం గురించి అడిగి, ఆపై కత్తితో దాడి చేసిన ఘటన నయా నగర్ ప్రాంతంలో కలకలం రేపింది. నిందితుడిని 31 ఏళ్ల జైబ్ జుబేర్ అన్సారీగా గుర్తించిన పోలీసులు, అతడిని అరెస్టు చేసి విచారణ ప్రారంభించారు.

అసలేం జరిగింది?

సోమవారం తెల్లవారుజామున 4 గంటల సమయంలో ఈ దాడి జరిగింది. రాజ్‌కుమార్ మిశ్రా, సుబ్రతో సేన్ అనే ఇద్దరు సెక్యూరిటీ గార్డులు వోకార్డ్ ఆసుపత్రి (Wockhardt Hospital) వెనుక నిర్మాణంలో ఉన్న ఒక భవనం వద్ద విధులు నిర్వర్తిస్తున్నారు. ఆ సమయంలో అక్కడికి చేరుకున్న అన్సారీ.. వారి మతం గురించి ఆరా తీశాడు. అనంతరం ఇస్లాం మత సిద్ధాంతమైన 'కల్మా' చదవాలని వారిని ఆదేశించాడు. వారు చదవలేకపోవడంతో ఒక్కసారిగా కత్తితో దాడికి తెగబడ్డాడు.

ఈ దాడిలో ఇద్దరు గార్డులకు తీవ్ర గాయాలయ్యాయి. రక్తపు మడుగులో ఉన్న రాజ్‌కుమార్ మిశ్రా ఎలాగోలా సొంతంగా ఆసుపత్రికి చేరుకోగా, గాయపడి సెక్యూరిటీ బూత్‌లో దాక్కున్న సుబ్రతో సేన్‌ను.. నయాబ్ షేక్ అనే స్థానికుడు గమనించాడు. వెంటనే అతడిని పోలీసు స్టేషన్‌కు, ఆ తర్వాత ఆసుపత్రికి తరలించి మానవత్వం చాటుకున్నాడు. ప్రస్తుతం ఇద్దరు గార్డులు ఆసుపత్రిలో ప్రాణాపాయ స్థితిలో చికిత్స పొందుతున్నారు.

90 నిమిషాల్లోనే నిందితుడి అరెస్ట్

ఘటన గురించి సమాచారం అందుకున్న పోలీసులు.. ఆ ప్రాంతంలోని సీసీటీవీ ఫుటేజీని పరిశీలించి కేవలం 90 నిమిషాల్లోనే అన్సారీని పట్టుకున్నారు. నయా నగర్ పోలీస్ స్టేషన్‌లో నిందితుడిపై హత్యాయత్నం, రెండు వర్గాల మధ్య శత్రుత్వాన్ని ప్రేరేపించడం తదితర సెక్షన్ల కింద కేసు నమోదు చేశారు. అనంతరం థానే కోర్టులో హాజరుపరచగా.. మే 4 వరకు పోలీసు కస్టడీకి పంపుతూ న్యాయమూర్తి ఆదేశాలు జారీ చేశారు.

ఆన్‌లైన్ ద్వారా రాడికలైజేషన్.. ఏటీఎస్ దర్యాప్తు

ఈ దాడికి సంబంధించి స్థానిక పోలీసులతో పాటు మహారాష్ట్ర యాంటీ టెర్రరిజం స్క్వాడ్ (ATS) సంయుక్తంగా దర్యాప్తు చేస్తోంది. నిందితుడి వద్ద నుంచి స్వాధీనం చేసుకున్న మొబైల్ ఫోన్లు, ఎలక్ట్రానిక్ పరికరాలను అధికారులు క్షుణ్ణంగా పరిశీలిస్తున్నారు. అన్సారీ రాసిన కొన్ని నోట్స్‌లో 'ఐసిస్' (ISIS), 'లోన్ వోల్ఫ్' (lone wolf), 'జిహాద్' (jihad), 'గాజా' (Gaza) వంటి పదాలు ఉండటం తీవ్ర కలకలం రేపుతోంది. ఆన్‌లైన్‌లో అందుబాటులో ఉన్న సమాచారం ద్వారానే అతడు ఉగ్ర భావజాలానికి (radicalised) ఆకర్షితుడైనట్లు అధికారులు అనుమానిస్తున్నారు.

నిందితుడి నేపథ్యం ఏంటి?

పోలీసు వర్గాల సమాచారం ప్రకారం.. అన్సారీ గతంలో చాలా ఏళ్ల పాటు అమెరికాలో నివసించాడు. అతడి కుటుంబ సభ్యులు ఇప్పటికీ అక్కడే ఉంటున్నారు. అయితే, అమెరికాలో సరైన ఉద్యోగం దొరకకపోవడంతో అతను ఇండియాకు తిరిగి వచ్చాడు. మీరా రోడ్ ప్రాంతంలో ఒంటరిగా ఉంటూ, ఆన్‌లైన్‌లో కెమిస్ట్రీ క్లాసులు చెబుతూ జీవనం సాగిస్తున్నట్లు దర్యాప్తులో తేలింది.

ఇది కేవలం ఒక ఉన్మాది చేసిన దాడా లేక దీని వెనుక ఏదైనా పెద్ద కుట్ర ఉందా అనే కోణంలో అధికారులు దర్యాప్తును వేగవంతం చేశారు. తప్పుడు సమాచారాన్ని, పుకార్లను నమ్మవద్దని, సోషల్ మీడియాలో ప్రచారం చేసే వారిపై కఠిన చర్యలు తీసుకుంటామని పోలీసులు హెచ్చరించారు.