Chandigarh Murder | చండీగఢ్‌లో పట్టపగలే కాల్పుల కలకలం: మెడికల్ షాపులో ఆటోమేటిక్ వెపన్‌తో క్యాషియర్ హత్య.. సీసీటీవీలో షాకింగ్ దృశ్యాలు!

Chandigarh Murder | త్రినేత్ర.న్యూస్ : చండీగఢ్‌ (Chandigarh) నగరంలో పట్టపగలే ఓ దారుణ హత్య జరిగింది. అత్యంత రద్దీగా ఉండే సెక్టార్ 11 మార్కెట్‌లోని ఓ ప్రముఖ మెడికల్ షాపులో చొరబడిన దుండగులు.. క్యాషియర్‌ను ఆటోమేటిక్ వెపన్‌తో కాల్చి చంపారు. శనివారం మధ్యాహ్నం 2:30 గంటల ప్రాంతంలో జరిగిన ఈ షాకింగ్ ఘటన స్థానికంగా తీవ్ర భయాందోళనలు రేకెత్తించింది. ఈ హత్యకు సంబంధించిన దృశ్యాలు షాపులోని సీసీటీవీ కెమెరాలో (CCTV camera) స్పష్టంగా రికార్డయ్యాయి.

బైక్‌పై వచ్చి.. మాస్కులు ధరించి

పోలీసులు, సీసీటీవీ ఫుటేజ్ ఆధారంగా.. శనివారం మధ్యాహ్నం ముగ్గురు దుండగులు ఒకే బైక్‌పై మెడికల్ షాపు వద్దకు చేరుకున్నారు. వారిలో ఒకరు బైక్‌పైనే బయట వేచి ఉండగా, 20 ఏళ్ల వయసున్న మరో ఇద్దరు యువకులు మాస్కులు ధరించి షాపులోకి ఎంటరయ్యారు.

హిమాచల్ ప్రదేశ్‌లోని రోహ్రు ప్రాంతానికి చెందిన జానకి దాస్ (45) ఆ మెడికల్ షాపులో క్యాషియర్‌గా పనిచేస్తున్నారు. దుండగులు లోపలికి వెళ్లే సమయానికి ఆయన తన పనిలో బిజీగా ఉన్నారు. లోపలికి వెళ్లిన వెంటనే ఆ ఇద్దరు తమ దగ్గరున్న గన్స్ (Guns) బయటకు తీసి జానకి దాస్‌పై అతి సమీపం నుంచి విచక్షణారహితంగా కాల్పులు జరిపారు.

13 రౌండ్ల ఫైరింగ్.. టార్గెట్ కిల్లింగ్!

ఈ దాడిలో దుండగులు ఆటోమేటిక్ వెపన్ వాడినట్లు పోలీసులు గుర్తించారు. క్షణాల వ్యవధిలోనే క్యాషియర్‌పై ఏకంగా 13 రౌండ్లు కాల్పులు జరిపారు. తీవ్రంగా గాయపడిన జానకి దాస్‌ను పక్కనే ఉన్న ప్రముఖ PGIMER ఆస్పత్రికి తరలించగా, అప్పటికే ఆయన మృతి చెందినట్లు డాక్టర్లు నిర్ధారించారు. ఈ ఫైరింగ్ ఘటనలో మరో ఇద్దరికి కూడా గాయాలైనట్లు సమాచారం.

దుండగులు షాపులోని ఇతరులను వదిలేసి, కేవలం క్యాషియర్‌ను మాత్రమే టార్గెట్ చేసి కాల్చడం చూస్తుంటే.. ఇది పక్కా ప్లాన్‌తో చేసిన 'టార్గెట్ కిల్లింగ్' (Targeted killing) అని పోలీసులు అనుమానిస్తున్నారు. కాల్పుల అనంతరం నిందితులు బయట వెయిట్ చేస్తున్న తమ అనుచరుడితో కలిసి బైక్‌పై పరారయ్యారు.

పాత కక్షలే కారణమా? ఆ కోణంలోనే పోలీసుల దర్యాప్తు

ఈ దారుణ ఘటనపై సీనియర్ సూపరింటెండెంట్ ఆఫ్ పోలీస్ (SSP) సుమేర్ ప్రతాప్ సింగ్ స్పందించారు. "శనివారం మధ్యాహ్నం 2:30 గంటలకు ఇద్దరు మాస్క్ ధరించిన వ్యక్తులు జానకి దాస్‌పై 13 రౌండ్లు ఫైరింగ్ చేశారు. ఇందులో మొత్తం ముగ్గురు సస్పెక్ట్స్ ఉన్నారు. ఇప్పటివరకు మాకు ఎలాంటి ఎక్స్‌టార్షన్ (Extortion) కాల్స్ గురించి ఆధారాలు దొరకలేదు. కానీ అన్ని కోణాల్లో దర్యాప్తు చేస్తున్నాం" అని ఆయన తెలిపారు.

ఘటన జరిగిన వెంటనే క్రైమ్ బ్రాంచ్ (Crime Branch) పోలీసులు రంగంలోకి దిగారు. చండీగఢ్ వ్యాప్తంగా నిందితుల కోసం గాలింపు చర్యలు చేపట్టారు. మెడికల్ షాపు యజమానికి గతంలో బెదిరింపు కాల్స్ వచ్చినట్లు తెలుస్తోంది. 2017లోనూ ఈ షాపు (కుమార్ బ్రదర్స్ మెడికోస్) బయట ఇద్దరు యువకులు గాల్లోకి కాల్పులు జరిపారు. దీంతో తాజా దాడికి పాత కక్షలు ఏమైనా కారణమా? లేదా మరేదైనా కుట్ర ఉందా? అనే కోణంలో పోలీసులు దర్యాప్తును ముమ్మరం చేశారు.