Defence Manufacturing | రక్షణ రంగంలో భారత్‌ మరో భారీ అడుగు.. కీల‌క ఉత్ప‌త్తులు సొంతంగా త‌యారీ..

Defence Manufacturing | రక్షణ తయారీ రంగంలో స్వయం సమృద్ధిని ప్రోత్సహించే దిశగా కేంద్ర ప్రభుత్వం మరో కీలక ముందడుగు వేసింది. రక్షణ మంత్రిత్వ శాఖ పరిధిలోని రక్షణ ఉత్పత్తి విభాగం ఆరో సానుకూల స్వదేశీకరణ జాబితాను ప్రకటించింది. ఈ జాబితాలో వ్యూహాత్మకంగా కీలకమైన 405 రక్షణ వస్తువులను చేర్చారు. వీటి ద్వారా సుమారు రూ.3,070 కోట్ల మేర వ్యాపార అవకాశాలు ఏర్పడనున్నాయి. ఈ నిర్ణయం భారత రక్షణ పరిశ్రమకు మరిన్ని అవకాశాలను విస్తరించడంతోపాటు దేశీయ రక్షణ తయారీ వ్యవస్థను మరింత బలోపేతం చేస్తుందని రక్షణ మంత్రి రాజ్‌నాథ్ సింగ్ తెలిపారు. దేశీయ తయారీ రంగంలో పెట్టుబడులు, ఆవిష్కరణలను ప్రోత్సహించడంతోపాటు దిగుమతులపై ఆధారపడటాన్ని తగ్గించేందుకు ఈ చర్య దోహదపడుతుందని ఆయన సామాజిక మాధ్యమం ఎక్స్‌లో పేర్కొన్నారు.

కొత్త‌గా జాబితాలో చేరిన 405 వ‌స్తువులు..

మొత్తం 405 వస్తువుల్లో 16 వస్తువులు భారత తీర రక్షక దళానికి సంబంధించినవి కాగా, 389 వస్తువులు రక్షణ ప్రభుత్వ రంగ సంస్థలకు సంబంధించినవిగా ఉన్నాయి. రక్షణ మంత్రిత్వ శాఖ అధికారిక ప్రకటన ప్రకారం.. ఈ జాబితాలో లైన్ రీప్లేసబుల్ యూనిట్లు, ఉప వ్యవస్థలు, ఉప భాగాలు, విడిభాగాలు, భాగాలు, ముడి పదార్థాలు వంటి అనేక రకాల వస్తువులు ఉన్నాయి. వీటిలో అధునాతన తేలికపాటి హెలికాప్టర్, తేలికపాటి వినియోగ హెలికాప్టర్, సుఖోయ్-30ఎంకేఐ, తేలికపాటి యుద్ధ విమానం, ఏఎల్-31ఎఫ్‌పీ ఇంజిన్ వంటి వైమానిక వేదికలకు సంబంధించిన పరికరాలు ఉన్నాయి. అలాగే టీ-72, టీ-90, బీఎంపీ-2 వంటి సాయుధ వాహనాలు, కొంకుర్స్-ఎం, ఇన్వార్, ఎంఆర్‌ఎస్‌ఏఎం వంటి క్షిపణి వ్యవస్థలకు సంబంధించిన వస్తువులు కూడా జాబితాలో ఉన్నాయి.

భార‌తీయ ప‌రిశ్ర‌మ‌ల నుంచే కొనుగోలు..

రక్షణ ఎలక్ట్రానిక్స్ విభాగంలో రాడార్లు, సోనార్లు, కాల్పుల నియంత్రణ వ్యవస్థలు, ఉపగ్రహ సమాచార వ్యవస్థలు వంటి కీలక పరికరాలను కూడా స్వదేశీకరణ జాబితాలో చేర్చారు. వీటితో పాటు అధిక పేలుడు సామర్థ్యం కలిగిన యాంటీ-ట్యాంక్ మందుగుండు సామగ్రి, ఇతర కీలక రక్షణ పరికరాలు కూడా ఉన్నాయి. జాబితాలోని ప్రతి వస్తువుకు స్వదేశీకరణకు సంబంధించిన సూచిక కాలపరిమితిని నిర్దేశించారు. ఆయా వస్తువులను దేశీయంగా విజయవంతంగా అభివృద్ధి చేసిన తర్వాత వాటిని భారతీయ పరిశ్రమల నుంచే కొనుగోలు చేయనున్నారు. రక్షణ ప్రభుత్వ రంగ సంస్థలు, భారత తీర రక్షక దళం వివిధ మార్గాల ద్వారా స్వదేశీకరణ ప్రక్రియను చేపట్టనున్నాయి. ఇందులో మేక్ విధానం, సంస్థల అంతర్గత అభివృద్ధి వంటి మార్గాలతోపాటు దేశీయ పరిశ్రమలు, ముఖ్యంగా సూక్ష్మ, చిన్న, మధ్య తరహా సంస్థల భాగస్వామ్యానికి ప్రాధాన్యం ఇవ్వనున్నారు.

శ్రీ‌జ‌న్ ర‌క్ష‌ణ పోర్ట‌ల్‌..

ఆత్మనిర్భర్ భారత్ కార్యక్రమంలో భాగంగా దేశీయ రక్షణ తయారీ వ్యవస్థను బలోపేతం చేసేందుకు ప్రభుత్వం చేపడుతున్న చర్యల్లో ఆరో సానుకూల స్వదేశీకరణ జాబితా ఒక ముఖ్యమైన భాగంగా నిలుస్తోంది. రక్షణ ఉత్పత్తి విభాగం 2020 ఆగస్టులో శ్రీజన్ రక్షణ పోర్టల్‌ను ప్రారంభించింది. రక్షణ ప్రభుత్వ రంగ సంస్థలు, సర్వీస్ ప్రధాన కార్యాలయాలు తమ వద్ద ఉన్న రక్షణ వస్తువులను దేశీయంగా అభివృద్ధి చేసి తయారు చేసేందుకు భారతీయ పరిశ్రమలు, సూక్ష్మ, చిన్న, మధ్య తరహా సంస్థలు, స్టార్టప్‌లకు అందించేందుకు ఈ పోర్టల్‌ను ఏర్పాటు చేశారు. ఈ ఏడాది జూన్ వరకు శ్రీజన్ రక్షణ పోర్టల్ ద్వారా రక్షణ ప్రభుత్వ రంగ సంస్థలు, సర్వీస్ ప్రధాన కార్యాలయాలు 33వేల‌కు పైగా రక్షణ వస్తువులను స్వదేశీకరణ కోసం దేశీయ పరిశ్రమలకు అందించాయి. ఇందులో తొలి ఐదు సానుకూల స్వదేశీకరణ జాబితాల కింద ప్రకటించిన 5,012 వస్తువులు కూడా ఉన్నాయి.

https://twitter.com/ANI/status/2089595268908167535?s=20

15వేల‌కు పైగా వ‌స్తువుల స్వ‌దేశీక‌ర‌ణ‌..

గత ఐదేళ్లలో 15,700కు పైగా రక్షణ వస్తువులను విజయవంతంగా స్వదేశీకరించారు. దీని ద్వారా సుమారు రూ.9వేల‌ కోట్ల విలువైన దిగుమతి ప్రత్యామ్నాయం సాధించినట్లు రక్షణ మంత్రిత్వ శాఖ తెలిపింది. అలాగే ఈ ఏడాది మార్చి వరకు రక్షణ ప్రభుత్వ రంగ సంస్థలు అంతర్గత ఉత్పత్తితోపాటు దేశీయ విక్రేతల నుంచి సుమారు రూ.10వేల కోట్ల విలువైన కొనుగోలు ఆర్డర్లను జారీ చేశాయి. ఈ చర్యల ద్వారా దేశీయ రక్షణ తయారీ సామర్థ్యం పెరగడంతోపాటు భారతీయ సంస్థలకు భారీ వ్యాపార అవకాశాలు అందుబాటులోకి రానున్నాయి. దిగుమతులపై ఆధారపడటాన్ని తగ్గిస్తూ రక్షణ రంగంలో భారత్‌ను మరింత స్వావలంబన దిశగా తీసుకెళ్లేందుకు ఈ జాబితా కీలకంగా మారనుంది.