Shivcharan Gupta Sonipat | కోట్లు సంపాదించిన తండ్రికి చివరికి మిగిలింది రూ.5100.. వీడియో కాల్‌లో అంత్యక్రియలు

Shivcharan Gupta Sonipat | త్రినేత్ర.న్యూస్ : ఒకప్పుడు ముంబై మహానగరంలో కోట్లాది రూపాయల టెక్స్‌టైల్ బిజినెస్ నడిపిన ఓ పేరు మోసిన వ్యాపారవేత్త.. చివరకు ఎవరూ లేని అనాథలా వృద్ధాశ్రమంలో కన్నుమూశారు. ప్రాణం కన్నా మిన్నగా పెంచుకున్న ముగ్గురు కూతుళ్లూ దూరంగా ఉండిపోయారు. తండ్రి చనిపోయాడని తెలిసినా.. కడసారి చూసేందుకు కూడా రాలేదు. ఆన్‌లైన్‌లో ఓ రూ.5,100 ట్రాన్స్‌ఫర్ చేసి.. వీడియో కాల్‌లో అంత్యక్రియలు చూస్తూ మమకారాన్ని మంటగలిపారు. హర్యానాలోని సోనిపట్‌లో జరిగిన ఈ ఘటన ప్రస్తుతం తీవ్ర చర్చనీయాంశంగా మారింది.

కోటీశ్వరుడి కూతుళ్లు టీచర్లు ఎందుకయ్యారు?

మృతుడు శివచరణ్ రతన్ గుప్తా (74). ముంబైలో ఆయనకంటూ ఒకప్పుడు ఓ సామ్రాజ్యం ఉండేది. కోట్లు గడించిన ఆయన.. తన ముగ్గురు కూతుళ్ల (అనిత, నిషా, ప్రియ) చదువుల కోసం ఆస్తులు అమ్మి మరీ ఖర్చు చేశారు. భవిష్యత్తులో వారు ఎవరిపైనా ఆధారపడకూడదని, ఉన్నత చదువులు చదివించారు. అందుకే పెద్ద కూతురు అనిత నేపాల్‌లో, రెండో కూతురు నిషా యూపీలో ఉపాధ్యాయులుగా స్థిరపడ్డారు. చిన్న కూతురు ముంబైలోనే సెటిల్ అయింది. అయితే, కాలం ఎప్పుడూ ఒకేలా ఉండదు. వ్యాపారంలో అనూహ్యంగా ఎదురైన భారీ నష్టాలు ఆయన జీవితాన్ని తలకిందులు చేశాయి.

వృద్ధాశ్రమానికి ఎందుకు వెళ్లాల్సి వచ్చింది?

వ్యాపారం పతనమయ్యాక, మిగిలిన ఆస్తుల విషయంలో కుటుంబంలో తీవ్ర వివాదాలు చెలరేగినట్లు తెలుస్తోంది. తన సర్వస్వాన్ని ధారపోసి ప్రయోజకులను చేసిన కూతుళ్లే, ఆర్థిక కష్టాల్లో ఉన్న తండ్రిని ఆదరించకపోగా.. ఆస్తుల కోసం గొడవలకు దిగినట్లు సమాచారం. ఈ చేదు అనుభవాలతోనే శివచరణ్, తన భార్య మీనాతో కలిసి సుమారు మూడేళ్ల క్రితం సోనిపట్‌లోని వృద్ధాశ్రమానికి చేరారు. ఏడాదిన్నర క్రితం భార్య కూడా కన్నుమూయడంతో ఆయన పూర్తిగా ఒంటరి అయ్యారు.

20 రోజుల ముందే చెప్పినా స్పందించని వైనం

శివచరణ్ గుప్తా ఆశ్రమంలో ఉన్నన్ని రోజులు తన మొబైల్ ద్వారా కూతుళ్లతో మాట్లాడేందుకు తహతహలాడేవారు. కానీ ఆయన ఆరోగ్యం క్షీణిస్తున్న కొద్దీ వారి నుంచి వచ్చే ఫోన్ కాల్స్ తగ్గిపోయాయి. ఆయన ఆరోగ్య పరిస్థితి విషమంగా ఉందని ఆశ్రమ నిర్వాహకులు దాదాపు 20 రోజుల ముందే కూతుళ్లకు సమాచారం ఇచ్చారు. అయినా వారు వచ్చి చూడలేదు సరికదా.. సరైన స్పందన కూడా కరవైంది. చివరకు మంగళవారం వేకువజామున 3:30 గంటల ప్రాంతంలో ఆయన తుదిశ్వాస విడిచారు.

"త్వరగా ముగించండి.. స్నానం చేయాలి"

తండ్రి చనిపోయాడని, మృతదేహాన్ని కోల్డ్ స్టోరేజ్‌లో ఉంచుతామని.. తీరిక చేసుకుని రావలసిందిగా ఆశ్రమ నిర్వాహకులు కోరినా ముగ్గురు కూతుళ్లూ రాలేము అని తేల్చి చెప్పారు. పెద్ద కూతురు అంత్యక్రియల ఖర్చుల కోసం ఆన్‌లైన్‌లో రూ.5,100 పంపించింది. వాట్సప్ వీడియో కాల్‌లో తండ్రి పాడెను చూస్తూ.. "ఇంకా ఎంతసేపు పడుతుంది? మేము స్నానాలు చేసి భోజనం చేయాలి" అని ఒక కూతురు నిర్వాహకులను అడగడం అక్కడున్న వారిని కలచివేసింది.

అంత్యక్రియలయ్యాక అస్థికలు తీసుకెళ్లడానికి కూడా సమయం లేదని, గంగానదిలో మీరే కలిపేయాలని వారు చెప్పడం చూస్తే.. ఆస్తుల గొడవలు ఆ కుటుంబంలో ఎంతటి మానసిక దూరాన్ని పెంచాయో అర్థమవుతుంది. ఆస్తుల కోసం వచ్చిన విభేదాలు ఒక కన్నతండ్రికి చివరిచూపును కూడా దూరం చేస్తాయా? డబ్బు ముందు రక్తసంబంధం ఇంతలా దిగజారిపోతుందా? అన్న ప్రశ్నలు ఇప్పుడు ప్రతి ఒక్కరినీ ఆలోచింపజేస్తున్నాయి. కుటుంబ సభ్యుల అంగీకారంతో ఆయన నేత్రాలను ఆశ్రమ నిర్వాహకులు దానం చేశారు. అన్నీ కోల్పోయి అనాథలా వెళ్లినా.. ఆ తండ్రి చూపు మాత్రం మరో ఇద్దరికి వెలుగునిచ్చింది.

समाज की दशा बताने वाली खबर

मुंबई में बड़े कपड़ा व्यापारी रहे शिवचरण रामरत्न गुप्ता (74) की हरियाणा के सोनीपत स्थित एक वृद्धाश्रम में मौत हो गई। वे पिछले तीन साल से आश्रम में रह रहे थे। दो साल पहले उनकी पत्नी का भी इसी आश्रम में निधन हुआ था। मंगलवार को आश्रम प्रबंधन ने उनकी मौत… pic.twitter.com/WHO975lMX8

— Mukesh Mathur (@mukesh1275) August 5, 2026