Telangana CEO Form 6 Declaration | ఓటర్లకు సీఈవో కీలక ఆదేశాలు: ఆ ఒక్కటి లేకుంటే ఓటు కట్

• ఓటు కోసం దరఖాస్తు చేస్తున్నారా?
• తెలంగాణ ఓటర్లకు సీఈవో బిగ్ అలర్ట్
• ఆ రూల్ తప్పనిసరి

Telangana CEO Form 6 Declaration | త్రినేత్ర న్యూస్ : తెలంగాణ ఓటర్లకు రాష్ట్ర ప్రధాన ఎన్నికల అధికారి (CEO) సి. సుదర్శన్ రెడ్డి అత్యంత కీలకమైన హెచ్చరిక జారీ చేశారు. రాష్ట్రంలో ప్రస్తుతం కొనసాగుతున్న స్పెషల్ ఇంటెన్సివ్ రివిజన్ (SIR) ప్రక్రియ నేపథ్యంలో కొత్త ఓటు కోసం ఫారమ్-6 (Form-6) సమర్పించే వారు తప్పనిసరిగా డిక్లరేషన్ ఇవ్వాల్సిందేనని స్పష్టం చేశారు. ఇప్పటికే ఎస్ఐఆర్ ముగిసిన రాష్ట్రాలకు మాత్రమే డిక్లరేషన్ నుంచి మినహాయింపు ఉందని, తెలంగాణలో ఈ ప్రక్రియ కొనసాగుతున్నందున ఇది ఖచ్చితంగా నిబంధనలకు లోబడి ఉండాలని తేల్చిచెప్పారు.

ఇప్పటివరకు 54 లక్షల మంది తుది జాబితాలోకి

రాష్ట్రవ్యాప్తంగా ఓటరు జాబితా ప్రక్షాళనలో భాగంగా సుమారు 92 లక్షల మంది ఓటర్లకు నోటీసులు జారీ చేయగా, ఇప్పటివరకు 65 లక్షల మంది నుంచి సమాధానాలు వచ్చాయి. వీరిలో 54 లక్షల మంది వివరాలను పరిశీలించి ఇప్పటికే తుది ఓటరు జాబితాలోకి చేర్చినట్లు సీఈవో వెల్లడించారు. ఉదాహరణకు ఖైరతాబాద్ నియోజకవర్గంలో 80 వేల మందికి నోటీసులు ఇవ్వగా, అందులో స్పందించిన 40 శాతం మందిని ఫైనల్ లిస్ట్‌లోకి తీసుకువచ్చారు. మిగిలిన ఓటర్లను కూడా నవంబర్ 5 నాటికి జాబితాలోకి చేర్చేందుకు యంత్రాంగం వేగంగా పనిచేస్తోంది.

ఇకపై హియరింగ్ ఉండదు.. ఇంటి వద్దకే బీఎల్వోలు

ఓటర్లకు ఎలాంటి వ్యయప్రయాసలు లేకుండా ఉండేందుకు ఎన్నికల సంఘం కీలక మార్పులు చేసింది.

నేరుగా ఇంటికే అధికారులు: గతంలోలాగా ఓటర్లను ఒకచోటకు పిలిపించి హియరింగ్ చేసే పద్ధతిని రద్దు చేశారు. బీఎల్వోలే (BLO) నేరుగా ఓటర్ల ఇళ్ల వద్దకు వెళ్లి అవసరమైన పత్రాలను సేకరిస్తారు.

ఒక్కరుంటే చాలు: నోటీసులు అందిన కుటుంబంలో అందరూ ఇంట్లో ఉండాల్సిన అవసరం లేదు. ఇంట్లోని ఒక వ్యక్తి మిగిలిన కుటుంబ సభ్యుల వివరాలు, పత్రాలు సమర్పిస్తే సరిపోతుంది.

వలస వెళ్లిన వారికి ఆన్‌లైన్ సేవలు: ఉపాధి లేదా ఇతర కారణాలతో వేరే ప్రాంతాలకు వెళ్లిన వారిని ఇక్కడికి రప్పించకుండా, ఈఆర్వో (ERO) ఆన్‌లైన్ ద్వారానే వారిని సంప్రదించి డాక్యుమెంట్ వెరిఫికేషన్ పూర్తి చేస్తారు.

మరోసారి గడువు పెంపు లేదు.. నవంబర్ 9న ఫైనల్ లిస్ట్

ఎస్ఐఆర్ గడువును మరోసారి పొడిగించే ఆలోచన ఏమాత్రం లేదని సీఈవో తేల్చిచెప్పారు. ప్రస్తుత షెడ్యూల్ ప్రకారం

అక్టోబర్ 7: క్లెయిమ్‌లు, అభ్యంతరాల దాఖలుకు తుది గడువు.

నవంబర్ 5: నోటీసుల జారీ, క్లెయిమ్‌ల పరిష్కారానికి ఆఖరు తేదీ.

నవంబర్ 9: తెలంగాణ అధికారిక తుది ఓటరు జాబితా ప్రచురణ.

ఓటు హక్కును కాపాడుకునేందుకు ఓటర్లు ఈ అవకాశాన్ని సద్వినియోగం చేసుకోవాలని, ఇంటికి వచ్చే బీఎల్వోలకు సరైన డాక్యుమెంట్లు అందించి సహకరించాలని అధికారులు కోరారు.