Jio Hotstar | జియోహాట్‌స్టార్‌ గ్లోబల్‌ ఎంట్రీ.. 3 దేశాల్లో సేవలు ప్రారంభం

Jio Hotstar | జియోహాట్‌స్టార్‌ అంతర్జాతీయ విస్తరణను అధికారికంగా ప్రారంభించింది. యునైటెడ్‌ కింగ్‌డమ్‌, కెనడా, సింగపూర్‌ దేశాల్లో సేవలను అందుబాటులోకి తీసుకొచ్చింది. ఈ విస్తరణలో భాగంగా 12 భాషల్లో 1.60 ల‌క్ష‌ల గంటలకు పైగా కంటెంట్‌ను ఆయా దేశాల్లోని ప్రేక్షకులకు అందిస్తోంది. దక్షిణాసియా ప్రవాసులతో పాటు భారతీయ, దక్షిణాసియా కంటెంట్‌ను ఆసక్తిగా చూసే అంతర్జాతీయ ప్రేక్షకులను లక్ష్యంగా చేసుకున్న జియోహాట్‌స్టార్‌, ప్రతి ఏడాది 30వేల గంటలకు పైగా కొత్త కంటెంట్‌ను విడుదల చేయాలని లక్ష్యంగా నిర్ణ‌యించుకుంది. అంతర్జాతీయ కేటలాగ్‌లో ఫీచర్‌ సినిమాలు, ఒరిజినల్‌ సిరీస్‌లు, రియాలిటీ కార్యక్రమాలు, టెలివిజన్‌ నెట్‌వర్క్‌ కంటెంట్‌, ప్రాంతీయ కార్యక్రమాలు ఉన్నాయి.

బిగ్‌బాస్‌లో ఓటింగ్‌కు అవ‌కాశం..

అలీబాబా ఔర్‌ చాలీస్‌ భూత్‌, ప్రిన్స్‌ ఆఫ్‌ మాలీవుడ్‌, పార్ట్‌ టైమర్స్‌, ది కోర్ట్‌ వంటి కొత్త ఒరిజినల్స్‌తోపాటు ధురంధర్‌, కిల్‌, 12త్ ఫెయిల్‌, కేసరి చాప్టర్‌ 2: ది అన్‌టోల్డ్‌ స్టోరీ ఆఫ్‌ జలియన్‌వాలా బాగ్‌ వంటి ప్రముఖ సినిమాలు కూడా అంతర్జాతీయ ప్రేక్షకులకు అందుబాటులోకి రానున్నాయి. రియాలిటీ షో విభాగంలో బిగ్‌బాస్‌ ప్రత్యేక ఆకర్షణగా నిలవనుంది. మూడు దేశాల్లోని ప్రేక్షకులు ఆయా ప్రాంతీయ ఎడిషన్లలో ప్రత్యక్షంగా ఓటింగ్‌ చేసే అవకాశం పొందనున్నారు. యునైటెడ్‌ కింగ్‌డమ్‌, కెనడాలో 24 గంటల ప్రత్యక్ష ప్రసారం కూడా అందుబాటులో ఉంటుంది. కెనడాలోని ప్రేక్షకులకు బిగ్‌బాస్‌ హిందీ కార్యక్రమాన్ని సాధారణ టెలివిజన్‌ ప్రసారానికి ఏడు రోజుల ముందుగానే చూసే అవకాశం కల్పిస్తున్నారు.

మారిన స‌బ్‌స్క్రిప్ష‌న్ విధానం..

కెనడా, సింగపూర్‌ ప్రేక్షకులకు అనిల్‌ కపూర్‌ వ్యాఖ్యాతగా వ్యవహరించే ఇండియా కా టాప్‌ 1 పర్సెంట్‌ క్విజ్‌ షోను కూడా అందిస్తున్నారు. జియోస్టార్‌ నెట్‌వర్క్‌లకు చెందిన స్టార్‌ ప్లస్‌, కలర్స్‌, స్టార్‌ విజయ్‌, ఏషియానెట్‌, స్టార్‌ జల్షా, స్టార్‌ ప్రవాహ్‌ వంటి ఛానళ్ల కంటెంట్‌ సింగపూర్‌, కెనడాలో టెలివిజన్‌ ప్రసారానికి ముందే స్ట్రీమింగ్‌ కానుంది. యునైటెడ్‌ కింగ్‌డమ్‌లో మాత్రం టెలివిజన్‌ ప్రసారంతో సమాంతరంగా స్ట్రీమింగ్‌ అందుబాటులో ఉంటుంది. అంతర్జాతీయ మార్కెట్ల కోసం జియోహాట్‌స్టార్‌ తన సబ్‌స్క్రిప్షన్‌ విధానాన్ని కూడా మార్చింది. ఇప్పటికే ఉన్న వార్షిక ప్లాన్‌లతోపాటు త్రైమాసిక ప్లాన్‌లను కూడా ప్రవేశపెట్టింది. ఈ మూడు దేశాల్లో ఇప్పటికే హాట్‌స్టార్‌ సబ్‌స్క్రిప్షన్‌ కలిగి ఉన్న వినియోగదారులు తమ ప్రస్తుత లాగిన్‌ వివరాలతో కొత్త జియోహాట్‌స్టార్‌ సేవకు మారవచ్చు. ఇందుకు ఎలాంటి సేవా అంతరాయం ఉండదని కంపెనీ తెలిపింది.

ప్లాన్లు ఎలా ఉన్నాయి..

యునైటెడ్‌ కింగ్‌డమ్‌లో ప్రస్తుతం ఉన్న నెలవారీ సబ్‌స్క్రిప్షన్లు ఆటో రెన్యూవల్‌ కొనసాగుతున్నంత వరకు చెల్లుబాటు అవుతాయి. ఆండ్రాయిడ్‌ వినియోగదారులు నేరుగా అప్లికేషన్‌లోనే కొత్త సబ్‌స్క్రిప్షన్‌ను తీసుకునే అవకాశం కూడా ఉంది. యునైటెడ్‌ కింగ్‌డమ్‌లో త్రైమాసిక ప్లాన్‌ ధర 19.99 పౌండ్లు, వార్షిక ప్లాన్‌ 69.99 పౌండ్లుగా ఉంది. కెనడాలో త్రైమాసిక ప్లాన్‌ 19.99 కెనడియన్‌ డాలర్లు, వార్షిక ప్లాన్‌ 49.99 కెనడియన్‌ డాలర్లుగా ఉంది. సింగపూర్‌లో త్రైమాసిక ప్లాన్‌ 29.98 సింగపూర్‌ డాలర్లు, వార్షిక ప్లాన్‌ 69.98 సింగపూర్‌ డాలర్లుగా నిర్ణయించారు.

జియోహాట్‌స్టార్‌ అప్లికేషన్‌ కనెక్టెడ్‌ టీవీ, మొబైల్‌ పరికరాల్లో యాపిల్‌ యాప్‌ స్టోర్‌, గూగుల్‌ ప్లే స్టోర్‌ ద్వారా అందుబాటులో ఉంది. వినియోగదారుల అభిరుచులకు అనుగుణంగా కంటెంట్‌ను సూచించే వ్యక్తిగతీకరించిన రికమెండేషన్‌ వ్యవస్థ, బహుభాషా డబ్బింగ్‌, సబ్‌టైటిల్స్‌ వంటి ఫీచర్లు ఇందులో ఉన్నాయి. హిందీ, తమిళం, తెలుగు, మలయాళం, కన్నడ, బెంగాలీ, మరాఠీ, ఇంగ్లిష్‌ సహా మొత్తం 12 భాషల్లో కంటెంట్‌ను అందిస్తోంది.