Reels | రీల్స్‌కు బాగా అల‌వాటు ప‌డ్డ జెన్ జీ త‌రం.. మెటా వెల్ల‌డి..

Reels | భారత్‌లో వీడియో కంటెంట్ వినియోగంలో భారీ మార్పు చోటుచేసుకుందని మెటా వెల్లడించింది. ఐప్సోస్ (IPSOS) నిర్వహించిన అధ్యయనం ప్రకారం దేశవ్యాప్తంగా వీడియోలు ప్ర‌స్తుతం డిఫాల్ట్ కంటెంట్ ఫార్మాట్‌గా మారిపోయాయి. రోజువారీ వీడియో వీక్షణకు మెటా ప్లాట్‌ఫామ్‌లు ప్రధాన గమ్యస్థానాలుగా నిలుస్తున్నాయి. ముఖ్యంగా రీల్స్, కంటెంట్ డిస్కవరీ, కల్చర్, క్రియేటర్ ఎంగేజ్‌మెంట్, కామర్స్ రంగాల్లో కీలక పాత్ర పోషిస్తోంది. అధ్యయనం ప్రకారం మెటా ప్లాట్‌ఫామ్‌లలో వీడియో వీక్షణ దేశవ్యాప్తంగా అలవాటుగా మారింది. పట్టణ, గ్రామీణ ప్రాంతాల మధ్య వినియోగంలో పెద్దగా తేడా కనిపించలేదు. రోజూ 97 శాతం మంది యూజర్లు మెటా ప్లాట్‌ఫామ్‌లలో వీడియోలు చూస్తున్నారు. పట్టణ ప్రాంతాల్లో ఇది 98 శాతం ఉండగా, గ్రామీణ ప్రాంతాల్లో 94 శాతంగా నమోదైంది. జెన్ జీలో 97 శాతం, మహిళల్లో 97 శాతం, ఎన్‌సీసీఎస్-ఏ వర్గంలో 98 శాతం మంది రోజువారీగా వీడియోలను వీక్షిస్తున్నారు. దేశవ్యాప్తంగా మెట్రో నగరాలు, టియర్-2, టియర్-3 నగరాలు, గ్రామీణ ప్రాంతాలను కలుపుకుని 23 నగరాల్లో 4వేల మందికి పైగా పాల్గొన్న ఈ అధ్యయనం, వీడియో-ఫస్ట్ ప్రవర్తన ఇప్పుడు మెట్రో నగరాలకు మాత్రమే పరిమితం కాదని స్పష్టం చేసింది.

జెన్ జీలో 89 శాతం మంది రీల్స్ వైపే..

రీల్స్ ప్ర‌స్తుతం భారతీయుల ప్రధాన డిస్కవరీ స్క్రీన్‌గా మారింది. షార్ట్-ఫామ్‌ వీడియోల కోసం మాత్రమే కాకుండా, కొత్త ట్రెండ్స్, క్రియేటర్లు, సాంస్కృతిక కంటెంట్‌ను కనుగొనే ప్రధాన వేదికగా రీల్స్ ఎదిగింది. జెన్ జీలో 89 శాతం మంది ప్రతిరోజూ రీల్స్ వినియోగిస్తుండగా, మహిళల్లో ఈ సంఖ్య 85 శాతం, ఎన్‌సీసీఎస్-ఏ వర్గంలో 88 శాతంగా ఉంది. యూజర్ ఎంగేజ్‌మెంట్‌లో కూడా రీల్స్ ప్రభావం గణనీయంగా పెరిగింది. బ్రాండ్లు, ఉత్పత్తులను కనుగొనే విషయంలో మెటా ప్లాట్‌ఫామ్‌లు కీలక పాత్ర పోషిస్తున్నాయి. జెన్ జీలో 84 శాతం మంది మెటా ప్లాట్‌ఫామ్‌ల ద్వారా కొత్త ఉత్పత్తులు, బ్రాండ్లను తెలుసుకుంటున్నారు. గ్రామీణ ప్రాంతాల్లో కూడా 73 శాతం మంది ఇదే విధమైన డిస్కవరీ ప్రవర్తనను ప్రదర్శిస్తున్నారు. ఇతర షార్ట్-ఫార్మ్ వీడియో ప్లాట్‌ఫామ్‌లతో పోలిస్తే క్రియేటర్ ఎంగేజ్‌మెంట్ దాదాపు 60 శాతం ఎక్కువగా ఉందని అధ్యయనం పేర్కొంది. దీంతో ట్రెండ్స్, కల్చర్, బ్రాండ్ డిస్కవరీలో క్రియేటర్లు ప్రధాన శక్తిగా మారారు.

ఏయే రంగాల్లో ఎక్కువ‌..

రీల్స్‌లో ఎక్కువ ఎంగేజ్‌మెంట్ సాధిస్తున్న కంటెంట్ విభాగాల్లో బ్యూటీ అండ్ మేకప్, ఫ్యాషన్ అండ్ ట్రెండ్స్ రెండూ 52 శాతంతో అగ్రస్థానంలో ఉన్నాయి. లైఫ్‌స్టైల్, ఫిట్‌నెస్ అండ్ వెల్‌నెస్ విభాగాలు 42 శాతం చొప్పున ఎంగేజ్‌మెంట్ సాధించాయి. కామెడీ అండ్ హ్యూమర్ 39 శాతం, స్పోర్ట్స్ 38 శాతం, ట్రావెల్ 37 శాతం ఎంగేజ్‌మెంట్‌ను నమోదు చేశాయి. వినోదానికి మాత్రమే కాకుండా వినియోగదారుల కొనుగోలు నిర్ణయాలపై కూడా రీల్స్ ప్రభావం చూపుతోంది. అధ్యయనం ప్రకారం 81 శాతం మంది రీల్స్ ద్వారా ఉత్పత్తులను కనుగొంటున్నారు. 66 శాతం మంది కొనుగోలు చేయాలా వద్దా అనే అంశాన్ని పరిశీలించే దశలో రీల్స్ ప్రభావానికి లోనవుతున్నారు. 47 శాతం మంది తుది కొనుగోలు నిర్ణయంపై కూడా రీల్స్ ప్రభావం ఉందని వెల్లడించారు. ఈ ప్రభావం ముఖ్యంగా ఈ-కామర్స్, ఆటోమోటివ్, ఫైనాన్షియల్ సర్వీసెస్ రంగాల్లో బలంగా కనిపిస్తోంది.

గ్రామీణ ప్రాంతాల్లోనూ..

ఫైనాన్షియల్ సర్వీసెస్ రంగంలో కూడా మెటా ప్లాట్‌ఫామ్‌ల ప్రభావం పెరుగుతోంది. గ్రామీణ ప్రాంతాల్లో ఫైనాన్షియల్ సర్వీసెస్ వినియోగదారుల్లో 76 శాతం మంది ప్రతిరోజూ మెటా ప్లాట్‌ఫామ్‌లలో ఎంగేజ్ అవుతున్నారు. ఫైనాన్షియల్ ఉత్పత్తులను కలిగి ఉన్న మహిళల్లో 54 శాతం మంది రోజూ క్రియేటర్ల కంటెంట్‌తో అనుసంధానమవుతున్నారు. ఆటోమోటివ్ రంగంలో కూడా రీల్స్ ప్రభావం స్పష్టంగా కనిపిస్తోంది. వాహనాల కొనుగోలు ప్రయాణంలో 82 శాతం మంది డిస్కవరీ దశలో, 68 శాతం మంది పరిశీలన దశలో, 50 శాతం మంది తుది కొనుగోలు నిర్ణయ దశలో రీల్స్ ప్రభావాన్ని అనుభవిస్తున్నట్లు అధ్యయనం వెల్లడించింది. భారత డిజిటల్ ప్రవర్తనలో వీడియోలు ప్ర‌స్తుతం కేంద్రస్థానంగా మారాయి. మొబైల్-ఫస్ట్ వినియోగం దేశవ్యాప్తంగా వేగంగా విస్తరిస్తుండగా, రీల్స్ కేవలం వినోద వేదికగానే కాకుండా డిస్కవరీ, క్రియేటర్ ప్రభావం, కొనుగోలు నిర్ణయాలకు కీలక సాధనంగా ఎదుగుతోంది. పట్టణ భారత్‌తోపాటు గ్రామీణ భారత్‌లో కూడా ఈ ధోరణి బలపడుతుండటంతో, రాబోయే కాలంలో షార్ట్-ఫామ్‌ వీడియోల ప్రభావం మరింత పెరిగే అవకాశం కనిపిస్తోంది.