IIT placements 2026 | ఐఐటీల్లో ఏఐ జాబ్స్ జోరు.. ఆ నైపుణ్యం ఉంటేనే ఆఫర్!

• ఐఐటీల్లో ఏఐ జాబ్స్ హవా
• డిసెంబర్ 1 ప్లేస్‌మెంట్స్‌కు ముందు మారుతున్న ట్రెండ్
• సంప్రదాయ సాఫ్ట్‌వేర్ కొలువులకు కోత

IIT placements 2026 | త్రినేత్ర న్యూస్ : దేశంలోని ప్రతిష్టాత్మక పాత ఐఐటీల్లో (Old IITs) డిసెంబర్ 1 నుంచి ఫైనల్ క్యాంపస్ ప్లేస్‌మెంట్స్ సీజన్ ప్రారంభం కానుంది. అయితే ఈసారి కంపెనీల నియామక శైలిలో స్పష్టమైన మార్పు కనిపిస్తోంది. సాధారణ ఎంట్రీ-లెవల్ ఫ్రెషర్ ఉద్యోగాల సంఖ్యపై కొంత ఆచితూచి అడుగువేస్తున్న కార్పొరేట్ కంపెనీలు (India Inc).. ఆర్టిఫిషియల్ ఇంటెలిజెన్స్ (AI), దానికి అనుబంధంగా ఉండే విభాగాల్లో మాత్రం భారీగా ఆఫర్లు ఇస్తున్నాయి. ముఖ్యంగా ఖరగ్‌పూర్, బాంబే, మద్రాస్, కాన్పూర్, ఢిల్లీ, గౌహతి, రూర్కీ వంటి ఏడు పాత ఐఐటీల్లో ప్రీ-ప్లేస్‌మెంట్ ఆఫర్లు (PPOs) గణనీయంగా పెరిగాయి.

సంప్రదాయ ఫ్రెషర్ రోల్స్‌ను తగ్గిస్తున్న కంపెనీలు.. ఏఐ, డేటా, అనలిటిక్స్, టెక్-ఆధారిత విభాగాల్లో కొత్త అవకాశాలను వేగంగా సృష్టిస్తున్నాయని క్యాంపస్ ప్లేస్‌మెంట్ అధికారులు, ఇండస్ట్రీ వర్గాలు చెబుతున్నాయి. 'మనం ఏఐతో కలిసి బతకాల్సిందే. పరిశ్రమకు ఎలాంటి కొత్త స్కిల్స్ అవసరమో విద్యాసంస్థలు పూర్తిగా అర్థం చేసుకోవడానికి మరో ఒకటి రెండేళ్లు పట్టవచ్చు' అని ఓ ఐఐటీ ప్లేస్‌మెంట్ అధికారి తెలిపారు.

గత ఏడాది లేని కొత్త ఉద్యోగాలు ఇప్పుడు వస్తున్నాయి

సంప్రదాయ సాఫ్ట్‌వేర్, ఐటీ సర్వీసెస్ నియామకాలు తగ్గుతున్నప్పటికీ.. 'అప్లైడ్ ఏఐ' (Applied AI), ఏఐ-అసిస్టెడ్ టెక్నాలజీ విభాగాల్లో ఉద్యోగాలు పెరుగుతున్నాయని ఐఐటీ గౌహతి కెరీర్ డెవలప్‌మెంట్ సెంటర్ హెడ్ జాన్ జోస్ తెలిపారు. 'గత ఏడాది అసలు ఉనికిలోనే లేని సరికొత్త జాబ్ రోల్స్ ఈసారి క్యాంపస్‌కు వస్తున్నాయి. ఏఐ స్కిల్స్ బలంగా ఉన్న విద్యార్థులకు ప్లేస్‌మెంట్స్‌లో తిరుగుండదు' అని ఆయన వివరించారు.

ఇంటర్న్‌షిప్‌ల ద్వారానే పీపీఓల (PPOs) పంట

చాలా ఐఐటీల్లో ఈసారి ఇంటర్న్‌షిప్‌ల సంఖ్య పెరిగింది. ఇవే ఇప్పుడు ప్రీ-ప్లేస్‌మెంట్ ఆఫర్లుగా (PPOs) మారుతున్నాయి. ముఖ్యంగా ఐటీ, డేటా సైన్స్, టెక్నాలజీ రంగాల్లో విద్యార్థుల ప్రతిభను అంచనా వేయడానికి కంపెనీలు ఇంటర్న్‌షిప్‌లను ఒక పరీక్షలా వాడుకుని, ఆ తర్వాత నేరుగా జాబ్ ఆఫర్లు ఇస్తున్నాయని జాన్ జోస్ పేర్కొన్నారు.

కోర్ ఇంజనీరింగ్, ఫైనాన్స్‌లోనూ ఏఐ తప్పనిసరి

ఈ మార్పు ఒక్కసారిగా కాకుండా క్రమంగా జరుగుతున్నప్పటికీ, కంపెనీల పనితీరును ఏఐ పూర్తిగా మార్చేస్తోందని ఐఐటీ కాన్పూర్ స్టూడెంట్స్ ప్లేస్‌మెంట్ కమిటీ చైర్‌పర్సన్ మంజేష్ కె. సింగ్ తెలిపారు. 'కేవలం ఏఐ, మెషీన్ లెర్నింగ్ ఉద్యోగాలకే కాకుండా.. సాఫ్ట్‌వేర్, అనలిటిక్స్, ఫైనాన్స్, చివరకు కోర్ ఇంజనీరింగ్ విభాగాల్లో సైతం ఏఐ టెక్నాలజీని రూపొందించి, ఆపరేట్ చేయగల గ్రాడ్యుయేట్ల కోసం కంపెనీలు వెతుకుతున్నాయి' అని ఆయన చెప్పారు.

ఈసారి ఐఐటీ కాన్పూర్‌లో ఏఐ కంపెనీలతో పాటు బ్యాంకింగ్, ఫైనాన్షియల్ సర్వీసెస్ సంస్థలు, క్వాంటిటేటివ్ ట్రేడింగ్ కంపెనీలు ప్రధాన రిక్రూటర్లుగా ఉండనున్నాయి. అలాగే టెక్నాలజీ, ఏఐ, ఫిన్‌టెక్ (Fintech), డీప్-టెక్ రంగాల్లో వేగంగా ఎదుగుతున్న భారతీయ స్టార్టప్‌లు కూడా క్యాంపస్ రిక్రూట్‌మెంట్‌లో పాల్గొనేందుకు ఉత్సాహం చూపుతుండటం విశేషం.

ఐఐటీ ఖరగ్‌పూర్‌లో 4 ఏళ్ల ప్రత్యేక బీటెక్ ఏఐ కోర్సు

మరోవైపు ఐఐటీ ఖరగ్‌పూర్‌లో సాఫ్ట్‌వేర్, ఏఐ, డేటా, ఫైనాన్స్, సెమీకండక్టర్స్, కోర్ ఇంజనీరింగ్ విభాగాల్లో నియామకాలు జోరుగా సాగనున్నాయి. మారుతున్న టెక్నాలజీకి అనుగుణంగా ఐఐటీ ఖరగ్‌పూర్ ఇప్పటికే ఏఐలో నాలుగేళ్ల బీటెక్ (B.Tech in AI) ప్రోగ్రామ్‌ను ప్రవేశపెట్టింది. దీనితో పాటు ఏఐ, మెషీన్ లెర్నింగ్‌లో ప్రత్యేక మైక్రో-స్పెషలైజేషన్ కోర్సులను కూడా అందిస్తోంది. ఒకవైపు కొత్తగా వస్తున్న ఏఐ/డేటా అవకాశాలు, మరోవైపు కోర్ ఇంజనీరింగ్, ఫైనాన్షియల్, మేనేజ్‌మెంట్ రంగాల్లో స్థిరమైన డిమాండ్ ఈసారి ప్లేస్‌మెంట్స్‌లో కనిపిస్తోందని ఐఐటీ ఖరగ్‌పూర్ కెరీర్ డెవలప్‌మెంట్ సెంటర్ డీన్ సంజయ్ గుప్తా వెల్లడించారు.