EB5 Visa India | ఇండియన్స్‌కు యూఎస్ షాక్: అమెరికాలో ఆ కీలక గ్రీన్ కార్డ్ కేటగిరీ క్లోజ్.. అసలు కారణం ఇదే!

EB5 Visa India | త్రినేత్ర.న్యూస్ : అమెరికాలో స్థిరపడాలని కలలు కనే భారతీయులకు యూఎస్ ప్రభుత్వం గట్టి షాక్ ఇచ్చింది. భారతీయుల డిమాండ్ ఎక్కువగా ఉండే ఇన్వెస్టర్ గ్రీన్ కార్డ్ (Investor Green Card) వీసా కేటగిరీని తాత్కాలికంగా నిలిపివేస్తున్నట్లు ప్రకటించింది. ఈ ఆర్థిక సంవత్సరానికి గానూ భారతీయులకు కేటాయించిన వార్షిక కోటా పరిమితి పూర్తిగా ముగిసిపోవడమే దీనికి కారణం. ఈ మేరకు యూఎస్ స్టేట్ డిపార్ట్‌మెంట్ (US State Department) అధికారిక నోటీసు విడుదల చేసింది.

జూన్ 5 నాటికే కోటా పూర్తి

యూఎస్ స్టేట్ డిపార్ట్‌మెంట్ నివేదిక ప్రకారం.. ఎంప్లాయ్‌మెంట్ బేస్డ్ ఫిఫ్త్ ప్రిఫరెన్స్ (EB-5) అన్‌రిజర్వ్‌డ్ కేటగిరీ కింద భారతీయులకు అందుబాటులో ఉన్న అన్ని ఇమ్మిగ్రెంట్ వీసాలు జూన్ 5 నాటికే పూర్తిగా అయిపోయాయి. దీనివల్ల ఈ ఆర్థిక సంవత్సరం ముగిసే వరకు (సెప్టెంబర్ 30 వరకు) ప్రపంచవ్యాప్తంగా ఉన్న అమెరికన్ ఎంబసీలు, కాన్సులేట్లు భారతీయ దరఖాస్తుదారులకు ఈ కేటగిరీ కింద కొత్త వీసాలను జారీ చేయలేవు. మళ్లీ కొత్త వీసా నంబర్లు అక్టోబర్ 1 నుంచి ప్రారంభమయ్యే తదుపరి అమెరికన్ ఫైనాన్షియల్ ఇయర్‌లో మాత్రమే అందుబాటులోకి వస్తాయి.

అసలు ఏంటి ఈ EB-5 ప్రోగ్రామ్?

అమెరికన్ బిజినెస్‌లలో పెట్టుబడులు పెడుతూ, అక్కడ స్థానిక అమెరికన్లకు ఉద్యోగాలు కల్పించే విదేశీయులకు పర్మనెంట్ రెసిడెన్సీ (Permanent Residency) లేదా గ్రీన్ కార్డ్ ఇచ్చేందుకు ఈ EB-5 వీసా ప్రోగ్రామ్‌ను తీసుకొచ్చారు. ప్రస్తుతం అమలులో ఉన్న నిబంధనల ప్రకారం.. ఈ వీసా కావాలనుకునే అభ్యర్థులు అమెరికాలోని టార్గెటెడ్ ఎంప్లాయ్‌మెంట్ ఏరియా లేదా ఇన్‌ఫ్రాస్ట్రక్చర్ ప్రాజెక్టులలో కనీసం 8,00,000 డాలర్లు (దాదాపు రూ.6.6 కోట్లు) పెట్టుబడి పెట్టాలి. ఇతర జనరల్ ప్రాజెక్టులలో అయితే 1.05 మిలియన్ డాలర్ల పెట్టుబడితో పాటు కనీసం 10 మంది అమెరికన్ కార్మికులకు పూర్తికాల ఉద్యోగాలు కల్పించాల్సి ఉంటుంది.

ఎవరిపై ఈ ప్రభావం పడుతుంది?

ఈ తాత్కాలిక సస్పెన్షన్ అనేది కేవలం సాంప్రదాయ EB-5 వీసా పూల్ అయిన 'అన్‌రిజర్వ్‌డ్' కేటగిరీకి మాత్రమే వర్తిస్తుంది. మొత్తం EB-5 వీసాలలో 68 శాతం కోటా ఈ కేటగిరీకే ఉంటుంది. దీనివల్ల విదేశాల్లో ఉంటూ వీసాల కోసం వేచి చూస్తున్న భారతీయులతో పాటు, ప్రస్తుతం అమెరికాలోనే ఉంటూ వీసా నంబర్ల కోసం వెయిట్ చేస్తున్న ఇన్వెస్టర్ల గ్రీన్ కార్డ్ ప్రక్రియ అక్టోబర్ వరకు నిలిచిపోనుంది. అన్ని అర్హతలు ఉండి అప్రూవల్ దశలో ఉన్న ఫైళ్లు కూడా వచ్చే అక్టోబర్ వరకు హోల్డ్‌లో ఉంటాయి.

ఆ కేటగిరీలకు ఎలాంటి ఢోకా లేదు

ఈ తాత్కాలిక నిలిపివేత అనేది 2022 నాటి 'EB-5 రిఫార్మ్ అండ్ ఇంటిగ్రిటీ యాక్ట్' కింద క్రియేట్ చేసిన 'రిజర్వ్‌డ్' కేటగిరీలపై ఎలాంటి ప్రభావం చూపదని స్టేట్ డిపార్ట్‌మెంట్ స్పష్టం చేసింది. గ్రామీణ ప్రాంతాలు (Rural Areas), నిరుద్యోగం ఎక్కువగా ఉన్న ప్రాంతాల్లోని ప్రాజెక్టుల కోసం కేటాయించిన ప్రత్యేక వీసా కోటాలు యథావిధిగా కొనసాగుతాయి. అలాగే ఐటీ ఉద్యోగులు ఎక్కువగా దరఖాస్తు చేసుకునే ఇతర ఎంప్లాయ్‌మెంట్ ఆధారిత వీసాలు (EB-2, EB-3) లేదా ఫ్యామిలీ గ్రీన్ కార్డ్‌లపై దీని ప్రభావం ఉండదు.

ఇక జూన్ 2026 వీసా బులెటిన్‌లోనే (Visa Bulletin) భారతీయుల నుంచి విపరీతమైన డిమాండ్ కారణంగా ఈ కేటగిరీ త్వరలోనే క్లోజ్ అయ్యే అవకాశం ఉందని అధికారులు ముందే హెచ్చరించడం గమనార్హం.