Supreme Court Verdict CEC Appointment | సీఈసీ నియామక చట్టంపై సుప్రీంకోర్టులో భిన్న తీర్పు.. ఐదుగురు సభ్యుల బెంచ్‌కు బదిలీ

Supreme Court Verdict CEC Appointment | త్రినేత్ర న్యూస్ : చీఫ్ ఎలక్షన్ కమిషనర్ (CEC), ఇతర ఎన్నికల కమిషనర్ల నియామకాలకు సంబంధించి 2023లో తెచ్చిన కొత్త చట్టంపై సుప్రీంకోర్టు ద్విసభ్య ధర్మాసనం భిన్నమైన తీర్పు (split verdict) వెలువరించింది. ఈ చట్టం ద్వారా సెలక్షన్ కమిటీ నుంచి భారత ప్రధాన న్యాయమూర్తిని (CJI) తొలగించి, ఆయన స్థానంలో కేంద్ర కేబినెట్ మంత్రిని నియమించడాన్ని సవాల్ చేస్తూ దాఖలైన పిటిషన్లపై ఈ విచారణ జరిగింది.

జడ్జీల మధ్య భిన్న వాదనలు

ఈ కేసును ఐదుగురు సభ్యుల రాజ్యాంగ ధర్మాసనానికి రిఫర్ చేయాలన్న అభ్యర్థనపై ధర్మాసనంలోని ఇద్దరు న్యాయమూర్తులు భిన్నమైన అభిప్రాయాలను వ్యక్తం చేశారు. జస్టిస్ దీపాంకర్ దత్తా పెద్ద బెంచ్‌కు రిఫర్ చేయాలనే అభ్యర్థనను తోసిపుచ్చగా, జస్టిస్ ఎస్.సి.శర్మ మాత్రం ఈ అంశంపై ఐదుగురు సభ్యుల బెంచ్ విచారించాల్సిందేనని తేల్చిచెప్పారు.

నేరుగా సీజేఐకి ఫైల్ నివేదన

పెద్ద బెంచ్ అవసరమా లేదా అనే విషయంలో ఇద్దరు న్యాయమూర్తుల మధ్య భిన్న అభిప్రాయాలు వచ్చినప్పటికీ.. ఈ వ్యవహారంపై ఐదుగురు సభ్యుల ధర్మాసనాన్ని ఏర్పాటు చేయాలని కోరుతూ ఈ కేసుకు సంబంధించిన ఫైల్‌ను నేరుగా సీజేఐ (CJI) ముందుంచాలని ఇద్దరూ అంగీకరించారు. ఎన్నికల ప్రక్రియ, ఓటింగ్ హక్కులు, రాజ్యాంగపరమైన ప్రాముఖ్యతను దృష్టిలో ఉంచుకొని ఈ నిర్ణయం తీసుకున్నారు. సాధారణంగా ఇలాంటి సందర్భాల్లో త్రిసభ్య ధర్మాసనానికి పంపాల్సి ఉన్నప్పటికీ, జాప్యాన్ని నివారించేందుకు నేరుగా పెద్ద బెంచ్‌ను ఏర్పాటు చేయాలని కోరడం గమనార్హం.

2023 చట్టంలోని వివాదం ఏమిటి?

ఎన్నికల సంఘం స్వయంప్రతిపత్తిని దెబ్బతీసేలా, సెలక్షన్ ప్యానెల్ నుంచి సీజేఐని తొలగించి ప్రధాని నామినేట్ చేసిన కేబినెట్ మంత్రికి చోటు కల్పించడాన్ని పిటిషనర్లు తీవ్రంగా వ్యతిరేకిస్తున్నారు. ఈ నేపథ్యంలో రాబోయే రోజుల్లో ఐదుగురు సభ్యుల బెంచ్ ఈ చట్టంపై ఎలాంటి కీలక తీర్పు ఇస్తుందనేది సర్వత్రా ఆసక్తికరంగా మారింది.