IISC | ఐఐఎస్‌సీలో బీటెక్ అడ్మిష‌న్లు.. ఇక‌పై జోసా కౌన్సెలింగ్ ద్వారానే

త్రినేత్ర‌.న్యూస్‌: దేశంలో అగ్ర‌శ్రేణి యూనివ‌ర్సిటీగా వెలుగొందుతున్న, సైన్స్ కోర్సుల‌కు నెల‌వైన ఇండియ‌న్ ఇన్‌స్టిట్యూట్ ఆఫ్ సైన్స్ (IISC)లో ఇంజినీరింగ్ సీట్ల భ‌ర్తీ సుల‌భం కానున్న‌ది. బెంగ‌ళూరులో ఉన్న ఈ ప్ర‌తిష్ఠాత్మ‌క విద్యాసంస్థ‌లో ఇక నుంచి బీటెక్ సీట్ల‌ను (BTech admissions) జాయింట్‌ సీట్‌ ఎలకేషన్‌ అథారిటీ (JOSAA) కౌన్సెలింగ్‌ ద్వారా భర్తీ చేయనున్నారు. ఈ మేర‌కు జేఈఈ అడ్వాన్స్‌డ్‌-2026 పరీక్ష నిర్వహణ బాధ్యతలు చూస్తున్న ఐఐటీ రూర్కీ వెల్లడించింది. వ‌చ్చే విద్యా సంవ‌త్సరం (2026-27) బీటెక్ సీట్ల‌ను జేఈఈ అడ్వాన్స్‌డ్‌ ర్యాంకుల ఆధారంగా భర్తీ చేస్తామని పేర్కొంది.

ఇప్ప‌టివ‌ర‌కు ఐఐఎస్‌సీలో (Indian Institute of Science) బీటెక్ సీట్ల‌ను ఐఐఎస్‌సీ లేదా జేఈఈ మెయిన్స్‌, అడ్వాన్స్‌డ్, కేవీపీవై, నీట్ వంటి జాతీయ స్థాయిలో సాధించే ర్యాంకుల ద్వారానే విద్యార్థుల‌కు కేటాయించేవారు. అయితే దీనికోసం సంస్థ ప్ర‌త్యేక కౌన్సెలింగ్ నిర్వ‌హించేది. అయితే దీనిపై అవ‌గాహ‌న లేని చాలామంది విద్యార్థులు ద‌ర‌ఖాస్తు చేసుకోవ‌డం లేదు. దీంతో మెరిట్ విద్యార్థులు కూడా ఈ ప్ర‌తిష్ఠాత్మ‌క విద్యాసంస్థ‌లో అభ్య‌సించే అవ‌కాశం కోల్పోతున్నారు. ఈ నేప‌థ్యంలో జోసా కౌన్సెలింగ్ ద్వారానే బీటెక్ సీట్ల‌ను భ‌ర్తీ చేయాల‌ని యాజ‌మాన్యం నిర్ణ‌యం తీసుకున్న‌ది.

సెన్స్‌కోర్సుల‌కు పేరొందిన ఐఐఎస్‌సీలో బీటెక్‌ ఇన్‌ మ్యాథమేటిక్స్‌ అండ్‌ కంప్యూటింగ్‌ కోర్సు మాత్రమే ఉంది. అందులో 52 సీట్లు ఉండ‌గా, అందులో ఎనిమిది సీట్లను అమ్మాయిలకు సూపర్‌ న్యూమరరీ కింద కేటాయిస్తారు. మరో నాలుగింటిని విదేశీ విద్యార్థులతో భర్తీ చేస్తున్నారు. అయితే జోసాలో చేర‌డంతో బీటెక్ కోర్సులు కూడా పెరిగే అవ‌కాశం ఉంద‌ని అభిప్రాయ‌ప‌డుతున్నారు.