ECINet Platform Centralisation | ఈసీఐనెట్ ప్లాట్‌ఫామ్‌పై సంచలన నివేదిక: రాష్ట్రాల యాక్సెస్ ఎప్పుడైనా బంద్ చేయొచ్చు!

• కేంద్రం చేతిలో కంట్రోల్
• ఎలక్షన్ కమిషనర్ల అభ్యంతరాలు
• ఫ్రంట్-ఎండ్ కోడ్ లీక్
• కాంగ్రెస్ తీవ్ర విమర్శలు

ECINet Platform Centralisation | త్రినేత్ర న్యూస్ : భారత ఎన్నికల సంఘం (ECI) ప్రతిష్టాత్మకంగా తెచ్చిన డిజిటల్ ప్లాట్‌ఫామ్ ‘ఈసీఐనెట్’ (ECINet) చుట్టూ వివాదం ముదురుతోంది. ఈ పోర్టల్‌లో రాష్ట్రాల అధికారుల యాక్సెస్‌ను కేంద్రం ఎప్పుడైనా నిలిపివేసే (Switch off/on) ప్రత్యేక ఫీచర్ ఉందని ఓ సివిక్ టెక్ ఇనిషియేటివ్ ‘చర్చగ్రామ్’ (Charchagram) ఆడిట్ నివేదిక వెల్లడించింది. ఐఐటీ ఢిల్లీ, ఐఐఎం కలకత్తా పూర్వ విద్యార్థి, డేటా సైంటిస్ట్ సౌరవ్ రాజ్‌పుత్ ఈ నివేదికను రూపొందించారు. ఎన్నికల కమిషనర్లు కొందరు దీనిపై అభ్యంతరాలు వ్యక్తం చేసిన నేపథ్యంలో ఈ రిపోర్ట్ రాజకీయంగా తీవ్ర చర్చనీయాంశమైంది.

రాష్ట్రాల అధికారుల యాక్సెస్ కంట్రోల్ ఎవరి చేతిలో ఉంది?

జనవరి 2026లో ప్రారంభించిన ‘ఈసీఐనెట్’ అనేది ఎన్నికల అధికారుల కోసం రూపొందించిన యూనిఫైడ్ పోర్టల్. యూజర్ మేనేజ్‌మెంట్, ఈరోనెట్ (ERONET), ఆర్‌టీఐ మాడ్యూల్ వంటి అనేక చిన్న యాప్‌లను దీని కిందకు తెచ్చారు. అయితే, ఈ పోర్టల్‌లో స్టేట్ నోడల్ ఆఫీసర్స్ (SNOs) మేనేజ్‌మెంట్ ఏరియాలో బిల్ట్-ఇన్ ‘డిసేబుల్’ యాక్షన్ ఆప్షన్ ఉన్నట్లు నివేదిక తేల్చింది.

ఆఫీషియల్ లాగిన్ తర్వాత ప్రతి SNO రో పక్కన ఒక 'డిసేబుల్' బటన్ ఉంటుంది.

దానిపై క్లిక్ చేస్తే.. "ఈ స్టేట్ నోడల్ అధికారిని డిసేబుల్ చేయడం ద్వారా యూజర్ ఇకపై అప్లికేషన్‌ను యాక్సెస్ చేయలేరు" అనే పాప్-అప్ వస్తుంది.

రాష్ట్రాల వారీగా ఓటరు ఎన్యుమరేషన్ ఫారమ్ వివరాల వీక్షణను ఆన్ లేదా ఆఫ్ (Enable/Disable) చేసుకునే వెసులుబాటు దీనివల్ల కేంద్రానికి దక్కుతుందని నివేదిక స్పష్టం చేసింది.

ఈ ఫీచర్ ఏప్రిల్ నుంచి అందుబాటులో ఉందో స్పష్టత లేనప్పటికీ, సెప్టెంబర్ 28 నుంచి తాను దీన్ని గుర్తించినట్లు సౌరవ్ రాజ్‌పుత్ తెలిపారు. లాగిన్ క్రెడెన్షియల్స్ లేకున్నా, కేవలం పబ్లిక్ ఫ్రంట్-ఎండ్ కోడ్ (JavaScript files) ద్వారానే ఈ నిగూఢ ఫీచర్లు బయటపడినట్లు ఆయన పేర్కొన్నారు. అంతేకాకుండా, పశ్చిమ బెంగాల్‌లోని ఎన్నికల రిజిస్ట్రేషన్ అధికారులను (EROs) ఓటర్ల ఎన్యుమరేషన్ ఫారమ్‌లను పరిశీలించకుండా బార్ చేసే ఫీచర్ కూడా ఇందులో ఉందని ఆడిట్ వెల్లడించింది.

ఎన్నికల కమిషనర్ల అభ్యంతరాలు.. కాంగ్రెస్ తీవ్ర విమర్శలు

ఈసీఐనెట్, ఓటరు జాబితా డేటాబేస్ కేంద్రీకరణ (Centralisation) విషయంలో ఎన్నికల కమిషనర్లు సుఖ్‌బీర్ సింగ్ సంధూ, వివేక్ జోషి ఇప్పటికే అభ్యంతరాలు వ్యక్తం చేసినట్లు వార్తలు రావడం గమనార్హం. ఈ నివేదిక ఇప్పుడు ఆ వాదనలకు బలం చేకూర్చింది.

మరోవైపు, ఈ అంశంపై కాంగ్రెస్ పార్టీ ఎన్నికల సంఘంపై తీవ్ర స్థాయిలో విరుచుకుపడింది. ప్రధాని నరేంద్ర మోదీ, హోంమంత్రి అమిత్ షాల డైరెక్షన్‌లోనే ఎన్నికల ప్రక్రియను పూర్తిగా కేంద్రీకరించి, చేతిలోకి తీసుకునేందుకు ఈసీఐనెట్‌ను తెచ్చారని కాంగ్రెస్ జనరల్ సెక్రటరీ జైరామ్ రమేష్ ఎక్స్ (X) వేదికగా ఆరోపించారు. చట్టప్రకారం ఈఆర్‌ఓలకు ఉండాల్సిన అధికారాలను ఈసీఐనెట్, ఈసీ ఐటీ డివిజన్ ఉల్లంఘిస్తున్నాయని ఆయన మండిపడ్డారు.