FSSAI | ఇకపై పనీర్‌ పేరుతో అమ్మకాలు కుదరవా? ఎఫ్‌ఎస్‌ఎస్‌ఏఐ కీలక ప్రతిపాదన..

FSSAI | పాలు కాకుండా ఇత‌ర పదార్థాలతో తయారయ్యే ఉత్పత్తుల ప్యాకేజింగ్‌, మార్కెటింగ్‌లో పనీర్‌ అనే పదాన్ని ఇకపై ఉపయోగించకుండా నిషేధించాలని భారత ఆహార భద్రత, ప్రమాణాల ప్రాధికార సంస్థ (ఎఫ్‌ఎస్‌ఎస్‌ఏఐ) ప్రతిపాదించింది. ఈ మేరకు ఎఫ్‌ఎస్‌ఎస్‌ఏఐ ముసాయిదా నోటిఫికేషన్‌ను విడుదల చేసింది. ప్రస్తుతం డెయిరీ కాంటెక్స్ట్‌లో అనలాగ్‌ విభాగంలో నమోదైన ఉత్పత్తులు కూడా ఈ ప్రతిపాదిత నిబంధనల పరిధిలోకి రానున్నాయి. ప్రతిపాదనకు తుది ఆమోదం లభిస్తే, ఇలాంటి ఉత్పత్తులను వేరే పేరుతో విక్రయించడంతోపాటు మార్కెటింగ్‌ చేయాల్సి ఉంటుంది. ప్రస్తుతం మార్కెట్‌లో అందుబాటులో ఉన్న ఉత్పత్తులకు కూడా కొత్త నిబంధనలు వర్తించే అవకాశం ఉంది. ఇప్పటికే లైసెన్స్‌ లేదా రిజిస్ట్రేషన్‌ పొందిన డెయిరీ అనలాగ్‌ ఉత్పత్తులు కూడా ముసాయిదా నిబంధనలు ఖరారైతే తమ ప్యాకేజింగ్‌, లేబులింగ్‌, మార్కెటింగ్‌ను మార్చుకోవాల్సి వ‌స్తుంది.

పాలు కాకుండా ఇత‌ర ప‌దార్థాల‌తో త‌యారైతే..

ప్రతిపాదిత మార్పుల ప్రకారం నిబంధనల పరిధిలోకి వచ్చే ఉత్పత్తులు ఇకపై పనీర్‌ అనే పదాన్ని ఉపయోగించకూడదు. వాటిని వేరే పేరుతో విక్రయించాల్సి ఉంటుంది. పాలు కాకుండా ఇతర పదార్థాలతో తయారైన ఉత్పత్తుల స్వభావం గురించి వినియోగదారులకు మరింత స్పష్టమైన సమాచారం అందించడమే ఈ మార్పుల ఉద్దేశంగా ప్రతిపాదన ద్వారా తెలుస్తోంది. ఈ ముసాయిదా ప్రతిపాదనపై ఎఫ్‌ఎస్‌ఎస్‌ఏఐ ప్రజలు, పరిశ్రమ ప్రతినిధులు, సంబంధిత వర్గాల నుంచి అభిప్రాయాలు, అభ్యంతరాలను కోరింది. ముసాయిదా నోటిఫికేషన్‌ ప్రచురించిన తేదీ నుంచి 60 రోజుల్లోగా సూచనలు, అభ్యంతరాలను సమర్పించవచ్చు. అందిన అభిప్రాయాలను పరిశీలించిన తర్వాత తుది నిబంధనలపై ఎఫ్‌ఎస్‌ఎస్‌ఏఐ నిర్ణయం తీసుకోనుంది.

ప్రస్తుతం ఇది కేవలం ముసాయిదా ప్రతిపాదన మాత్రమే.. తుది నిబంధనగా అమల్లోకి రాలేదు. అయితే ఇది ఖరారైతే, ప్రస్తుతం డెయిరీ అనలాగ్‌లుగా వర్గీకరించిన ఉత్పత్తుల పేర్లు, లేబులింగ్‌, మార్కెటింగ్‌ విధానాల్లో మార్పులు చోటుచేసుకునే అవకాశం ఉంది.