FAA Flight Outage | అమెరికా విమానాలకు సడెన్ బ్రేక్: రోజుకు 44,000 ఫ్లైట్స్, గాల్లో 5,500.. అసలు యూఎస్ గగనతలం ఎలా పనిచేస్తుందంటే?

FAA Flight Outage | త్రినేత్ర న్యూస్ : నవంబర్ 13న అమెరికా ఎయిర్ ట్రాఫిక్ కంట్రోల్ (ATC) కేంద్రాల్లో తలెత్తిన కమ్యూనికేషన్ లోపం దేశవ్యాప్తంగా విమాన ప్రయాణాలను అస్తవ్యస్తం చేసింది. ముందుజాగ్రత్త చర్యగా ఫెడరల్ ఏవియేషన్ అడ్మినిస్ట్రేషన్ (FAA) దేశవ్యాప్తంగా విమానాల టేకాఫ్‌లను నిలిపివేయడంతో వేలాది మంది ప్రయాణికులు తీవ్ర ఇబ్బందులు పడ్డారు. అదే రోజు సాయంత్రం ఈ నిషేధాన్ని ఎత్తివేసినప్పటికీ.. 15,000కు పైగా విమానాలు ఆలస్యం కావడం లేదా రద్దు కావడం జరిగింది. విమాన సర్వీసులు పూర్తిస్థాయిలో సాధారణ స్థితికి రావడానికి మరికొన్ని రోజులు పట్టవచ్చని ఎయిర్‌లైన్స్ సంస్థలు వెల్లడించినట్లు రాయిటర్స్ పేర్కొంది.

ఈ ఒక్క సాంకేతిక లోపం ఇంత భారీ స్థాయిలో ప్రభావం చూపడానికి ప్రధాన కారణం.. అమెరికా విమానయాన వ్యవస్థ నిర్వహించే ట్రాఫిక్ పరిమాణం. సగటున రోజుకు 44,000 విమానాలు, 30 లక్షల మంది ప్రయాణికులతో నడిచే ఈ వ్యవస్థ వెనుక ఉన్న భారీ నెట్‌వర్క్, దశాబ్దాల నాటి పాత టెక్నాలజీ గురించి ఆసక్తికర విషయాలు ఇప్పుడు వెలుగులోకి వస్తున్నాయి.

అమెరికా ఏవియేషన్ వ్యవస్థ ఎంత పెద్దదంటే?

యూఎస్ నేషనల్ ఎయిర్‌స్పేస్ సిస్టమ్ (NAS) ప్రపంచంలోనే అత్యంత పెద్దది, సంక్లిష్టమైనది. అమెరికాలోని 50 రాష్ట్రాలు, తీర ప్రాంతాలతో పాటు అట్లాంటిక్, పసిఫిక్, గల్ఫ్ ఆఫ్ మెక్సికో సముద్ర గగనతలంతో కలిపి సుమారు 29.4 మిలియన్ చదరపు మైళ్ల పరిధిలో ఇది విస్తరించి ఉంది.

రోజువారీ ఫ్లైట్స్: ఎఫ్‌ఏఏ (FAA) గణాంకాల ప్రకారం.. ఈ వ్యవస్థ ప్రతిరోజూ దాదాపు 44,360 విమానాలను (ఏడాదికి 1.6 కోట్లకు పైగా) నిర్వహిస్తుంది. ఇందులో కమర్షియల్, కార్గో, మిలిటరీ, ప్రైవేట్ విమానాలు ఉంటాయి.

ప్రయాణికుల రద్దీ: అమెరికా విమానయాన సంస్థలు ఏటా దాదాపు 100 కోట్ల (వన్ బిలియన్) మంది ప్రయాణికులను గమ్యస్థానాలకు చేరుస్తున్నాయి. దేశవ్యాప్తంగా పబ్లిక్, ప్రైవేట్ ఎయిర్‌ఫీల్డ్‌లతో కలిపి దాదాపు 19,500 ల్యాండింగ్ కేంద్రాలు ఉన్నాయి.

ఒకేసారి గాల్లో 5,500 విమానాలు: రద్దీ ఎక్కువగా ఉండే సమయాల్లో (పీక్ పీరియడ్స్) అమెరికా గగనతలంలో ఒకేసారి 5,500 విమానాలు గాల్లో ఉంటాయి. ఇవన్నీ ఒకదానికొకటి ఢీకొనకుండా సురక్షితంగా ప్రయాణించేలా పైలట్లు, ఎయిర్ ట్రాఫిక్ కంట్రోలర్లు నిరంతరం సమన్వయం చేసుకుంటారు.

ఎయిర్ ట్రాఫిక్ కంట్రోల్ (ATC) వ్యవస్థ ఎలా పనిచేస్తుంది?

ఒక విమానం టేకాఫ్ అయినప్పటి నుంచి ల్యాండ్ అయ్యే వరకు మూడు ప్రధాన విభాగాలు దశలవారీగా బాధ్యతలు తీసుకుంటాయి.

ఎయిర్‌పోర్ట్ కంట్రోల్ టవర్స్: విమానాశ్రయ రన్‌వేలపై విమానాల కదలికలను ఇవి పర్యవేక్షిస్తాయి. టేకాఫ్, ల్యాండింగ్ సమయాలను సమన్వయం చేస్తూ పైలట్లకు సూచనలు ఇస్తాయి.

టెర్మినల్ రాడార్ అప్రోచ్ కంట్రోల్ (TRACON): విమానం టేకాఫ్ అయి పైకి ఎగురుతున్నప్పుడు లేదా ల్యాండింగ్ కోసం కిందకు దిగుతున్నప్పుడు కంట్రోల్ టవర్ నుంచి బాధ్యతలు TRACONకు బదిలీ అవుతాయి. ఇతర విమానాలకు సురక్షిత దూరంలో ఉండేలా ఇవి పర్యవేక్షిస్తాయి.

ఎయిర్ రూట్ ట్రాఫిక్ కంట్రోల్ సెంటర్స్: విమానం నిర్దేశిత ఎత్తుకు చేరుకుని సుదూర ప్రాంతాలకు ప్రయాణించేటప్పుడు ఈ కేంద్రాలు (ఎన్-రూట్ సెంటర్స్) పర్యవేక్షిస్తాయి. దేశవ్యాప్తంగా ఉన్న ఇలాంటి 21 కేంద్రాలు వేర్వేరు ప్రాంతాల మధ్య విమానాల రూట్లను సమన్వయం చేస్తాయి.

ఒక్క కమ్యూనికేషన్ లోపంతో దేశమంతా ఎందుకు ప్రభావితమైంది?

నవంబర్ 13న కీలక డేటాను చేరవేసే స్విచ్‌లు, రౌటర్లపై ఒక్కసారిగా భారం పడటంతో (ఓవర్‌లోడ్) వ్యవస్థల నుంచి అసంపూర్ణ సమాచారం వచ్చిందని రవాణా శాఖ కార్యదర్శి సీన్ డఫీ తెలిపారు. అయితే రాడార్, కమ్యూనికేషన్లు పూర్తిగా నిలిచిపోకపోవడంతో అప్పటికే గాల్లో ఉన్న విమానాలను సురక్షితంగా ల్యాండ్ చేయగలిగారు.

‘నేషన్‌వైడ్ గ్రౌండ్ స్టాప్’ అంటే గాల్లో ఉన్న విమానాలన్నింటినీ వెంటనే దించేయడం కాదు.. పరిస్థితిని అంచనా వేసే వరకు కొత్తగా మరిన్ని విమానాలు టేకాఫ్ కాకుండా ఆపడం. కంట్రోలర్ల మధ్య సమాచార మార్పిడి సరిగ్గా లేనప్పుడు కొత్త విమానాలను అనుమతిస్తే ప్రమాదాలు జరిగే అవకాశం ఉండటంతో ఈ నిర్ణయం తీసుకున్నారు. 2001 సెప్టెంబర్ 11 దాడుల తర్వాత ఇంత సుదీర్ఘంగా విమానాలను నిలిపివేయడం ఇదే తొలిసారి. ఫ్లైట్‌రాడార్24 డేటా ప్రకారం 6,600కు పైగా విమానాలు రద్దు కాగా.. 8,600 విమానాలు ఆలస్యమయ్యాయి. రాత్రి 8:15 గంటలకు ఆంక్షలు ఎత్తివేసినా.. విమానాలు, సిబ్బందిని తిరిగి సర్దుబాటు చేయడం ఎయిర్‌లైన్స్‌కు పెద్ద సవాలుగా మారింది.

ఇప్పటికీ ‘ఫ్లాపీ డిస్క్‌లు’.. పాతబడిన టెక్నాలజీ

ఈ ఘటనతో అమెరికా ఏవియేషన్ వ్యవస్థ వాడుతున్న పాత టెక్నాలజీపై మరోసారి ఆందోళన మొదలైంది. ఇందులోని చాలా పరికరాలు దశాబ్దాల నాటివి కావడంతో వాటి నిర్వహణ కష్టంగా మారింది. ఆశ్చర్యకరమైన విషయం ఏమిటంటే.. వాతావరణం, ఇతర కీలక సమాచారాన్ని పంపడానికి ఇప్పటికీ 400కు పైగా ఎయిర్ ట్రాఫిక్ కంట్రోల్ కేంద్రాల్లో ‘ఫ్లాపీ డిస్క్‌లను’ వాడుతున్నారు. వీటిని 2028 చివరి నాటికి పూర్తిగా తొలగించాలని FAA లక్ష్యంగా పెట్టుకుంది.

దీనికి తోడు సెప్టెంబర్‌లో ఫిలడెల్ఫియా కేంద్రంలో సర్క్యూట్ లోపం, న్యూజెర్సీలో నిర్మాణ పనుల వల్ల ఫైబర్-ఆప్టిక్ కేబుల్ తెగిపోవడం వంటి ఘటనలు వేలాది విమానాల ఆలస్యానికి కారణమయ్యాయి. మరోవైపు ఎయిర్ ట్రాఫిక్ కంట్రోలర్ల కొరత కూడా వ్యవస్థపై ఒత్తిడి పెంచుతోంది.

ఆధునీకరణకు ట్రంప్ ప్రభుత్వం ఎన్ని నిధులు కోరుతోంది?

విమానాశ్రయాలు, ఎయిర్ ట్రాఫిక్ కంట్రోల్ వ్యవస్థను ఆధునీకరించేందుకు అదనపు నిధులు మంజూరు చేయాలని ట్రంప్ ప్రభుత్వం కాంగ్రెస్‌ను కోరుతోంది. నవంబర్ 13 ఘటనకు ముందు రవాణా కార్యదర్శి సీన్ డఫీ, బడ్జెట్ డైరెక్టర్ రస్సెల్ వోట్ 30.1 బిలియన్ డాలర్ల అదనపు నిధుల కోసం ప్రతిపాదించారు. ఇందులో 10.1 బిలియన్ డాలర్లు ఎయిర్ ట్రాఫిక్ కంట్రోల్ ఆధునీకరణకు (ఆటోమేషన్ ప్లాట్‌ఫామ్, వర్క్‌స్టేషన్లకు 7.2 బిలియన్ డాలర్లు, క్లౌడ్ కంప్యూటింగ్‌కు 2 బిలియన్ డాలర్లు) కేటాయించాలని కోరారు.

అయితే తాజా అంతరాయం తర్వాత.. భవిష్యత్తులో ఇలాంటి సమస్యలు రాకుండా వ్యవస్థను సమూలంగా మార్చడానికి 50 బిలియన్ డాలర్లు అవసరమని డఫీ స్పష్టం చేశారు. 2025లో కాంగ్రెస్ ఇప్పటికే 12.5 బిలియన్ డాలర్లు ఆమోదించినప్పటికీ.. ఆ నిధులు, పనుల వేగం ఏమాత్రం సరిపోవని తాజా పరిణామం నిరూపించింది. రోజుకు వేలాది విమానాలను నడుపుతూనే.. ఈ మొత్తం వ్యవస్థను ఆధునీకరించడం ఇప్పుడు FAA ముందున్న అతిపెద్ద సవాల్.