Iran threatens Netanyahu | ‘నెతన్యాహును వదిలిపెట్టం, వేటాడి చంపుతాం’.. ఇజ్రాయెల్ ప్రధానికి ఇరాన్ హెచ్చరిక

• ఇజ్రాయెల్ ప్రధాని బెంజమిన్ నెతన్యాహు ఇంకా బతికే ఉంటే, కచ్చితంగా వేటాడి చంపుతాం
• ఇరాక్, కువైట్‌లలోని మూడు అమెరికా సైనిక స్థావరాలపై ఇరాన్ (IRGC) క్షిపణులు, డ్రోన్లతో దాడులు
• ఏఐ (AI) గ్లిచ్ కారణంగా నెతన్యాహు చనిపోయారంటూ వచ్చిన వార్తలను ఖండించిన ఇజ్రాయెల్ పీఎంవో
• దుబాయ్, కువైట్ విమానాశ్రయం సమీపంలో భారీ పేలుళ్లు
• ఫిబ్రవరి 28 దాడుల తర్వాత భగ్గుమంటున్న పశ్చిమాసియా
• 'పిల్లల హంతకుడు' నెతన్యాహును వదిలిపెట్టం
• ఇరాన్ సంచలన ప్రకటన

Iran threatens Netanyahu | త్రినేత్ర.న్యూస్ : పశ్చిమాసియాలో (Middle East) యుద్ధం తీవ్రతరం అవుతున్న వేళ ఇరాన్ సంచలన ప్రకటన చేసింది. 'పిల్లల హంతకుడు' అయిన ఇజ్రాయెల్ ప్రధాని బెంజమిన్ నెతన్యాహును (Benjamin Netanyahu) హతమారుస్తామని ఇరాన్ ప్రతినబూనింది. ఒకవేళ ఇజ్రాయెల్ ప్రధాని "ఇంకా బతికే ఉంటే", ఆయన్ను ఎక్కడున్నా వేటాడి, పూర్తి బలగాలతో దాడి చేసి చంపుతామని ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) ప్రత్యక్ష హెచ్చరికలు జారీ చేసింది. మరోవైపు, ఈ ప్రాంతంలోని మూడు అమెరికా సైనిక స్థావరాలపై (US military bases) తాము క్షిపణులు, డ్రోన్లతో దాడులు చేసినట్లు ఆదివారం IRGC ప్రకటించిందని ఇరాన్ కు చెందిన ఓ న్యూస్ ఏజెన్సీ నివేదించింది.

పుకార్లను ఖండించిన ఇజ్రాయెల్.. అసలేం జరిగిందంటే?

అమెరికా, ఇజ్రాయెల్ దాడులకు ప్రతిస్పందనగా ఇరాన్ జరిపిన దాడుల్లో నెతన్యాహు ఇప్పటికే ప్రాణాలు కోల్పోయారంటూ సోషల్ మీడియాలో పెద్ద ఎత్తున పుకార్లు షికార్లు చేశాయి. దీనిపై ఇజ్రాయెల్ ప్రధాని కార్యాలయం (PMO) స్పందించింది. ఇవన్నీ ఫేక్ న్యూస్ అని, "ప్రధాని క్షేమంగా ఉన్నారు" అని స్పష్టం చేసింది.

పుకార్లు ఎలా మొదలయ్యాయి?

ఇజ్రాయెల్-అమెరికా-ఇరాన్ సంక్షోభంపై నెతన్యాహు మీడియాతో మాట్లాడుతున్నట్లు ఉన్న ఒక వీడియోను శుక్రవారం ఆయన ఎక్స్ (X) ఖాతాలో పోస్ట్ చేశారు. అయితే, ఆ వీడియోలో 35వ సెకను వద్ద నెతన్యాహు కుడి చేతికి ఆరు వేళ్లు (six fingers) ఉన్నట్లు కనిపించింది. అది ఏఐ (AI) సృష్టించిన డీప్‌ఫేక్ వీడియో అని నెటిజన్లు పసిగట్టారు. దీంతో అసలు నెతన్యాహు బతికే ఉన్నారా? లేక ఆయన చనిపోతే వీడియోను ఇలా ఏఐతో సృష్టించి వదిలారా? అన్న అనుమానాలు వ్యక్తమయ్యాయి.

అమెరికా సైనిక స్థావరాలపై దాడులు

ఇరాక్‌లోని ఎర్బిల్‌లో ఉన్న అల్-హరీర్ వైమానిక స్థావరం, అలాగే కువైట్‌లోని అలీ అల్ సలేం, అరిఫ్‌జాన్ అమెరికా స్థావరాలే లక్ష్యంగా దాడులు చేసినట్లు IRGC తెలిపింది. శక్తివంతమైన క్షిపణులు, డ్రోన్లతో విరుచుకుపడినట్లు వెల్లడించింది. ఇటీవలి కాలంలో ఇరాన్ పారిశ్రామిక వాడల్లోని కార్మికులను చంపినందుకు ప్రతీకారంగా, "ఆపరేషన్ ట్రూ ప్రామిస్ 4" (Operation True Promise 4)లో భాగంగా  ఈ ఆపరేషన్ చేపట్టినట్లు ఇరాన్ వర్గాలు తెలిపాయి.

దుబాయ్, కువైట్‌లలో పేలుళ్లు.. భయాందోళనలో పశ్చిమాసియా

యుద్ధం ఇంకా ఉద్ధృతం అవుతున్న నేపథ్యంలో ఆదివారం దుబాయ్‌లో (Dubai) పలు చోట్ల పేలుళ్లు సంభవించాయి. అయితే వీటికి కారణాలు, జరిగిన నష్టంపై తక్షణ సమాచారం లేదు. అలాగే కువైట్ అంతర్జాతీయ విమానాశ్రయం సమీపంలో, ఉత్తర ఇరాక్‌లోని ఒక రిఫైనరీ వద్ద డ్రోన్ దాడులు జరిగినట్లు వార్తలు వచ్చాయి. గల్ఫ్ ప్రాంతం అంతటా యుద్ధం విస్తరిస్తుండటంతో గ్లోబల్ మార్కెట్లు, ఇంధన సరఫరా వ్యవస్థలపై తీవ్ర ప్రభావం పడుతోంది. మిడిల్ ఈస్ట్‌లోని పలు దేశాలు హై అలెర్ట్ ప్రకటించాయి.

మరింత రాజుకున్న వివాదం

ఫిబ్రవరి 28న ఇరాన్‌పై అమెరికా, ఇజ్రాయెల్ దళాలు సంయుక్తంగా జరిపిన దాడుల తర్వాత ప్రాంతీయ ఉద్రిక్తతలు తారాస్థాయికి చేరుకున్నాయి. ఆ దాడుల్లో అప్పటి ఇరాన్ సుప్రీం లీడర్ అలీ ఖమేనీ (Ali Khamenei) సహా కనీసం 1,300 మంది ప్రాణాలు కోల్పోయినట్లు నివేదికలు చెబుతున్నాయి. అప్పటి నుంచి ఇజ్రాయెల్‌తో పాటు అమెరికా సైనిక స్థావరాలు ఉన్న దేశాలపై ఇరాన్ డ్రోన్, క్షిపణి దాడుల పరంపరను కొనసాగిస్తోంది. తాజాగా ఆదివారం నాడు సెంట్రల్ ఇజ్రాయెల్‌లోని హోలోన్ (Holon) నగరంలో బాలిస్టిక్ క్షిపణి పడిన ఘటనలో ఇద్దరు వ్యక్తులు గాయపడినట్లు ఇజ్రాయెల్ మీడియా వెల్లడించింది.