Mojtaba Khamenei | తీవ్ర గాయాలయ్యాయన్న వదంతుల వేళ.. ఇరాన్ సుప్రీం లీడర్ ముజ్తబా ఖమేనీ వీడియో రిలీజ్

Mojtaba Khamenei | త్రినేత్ర.న్యూస్ : ఇరాన్ కొత్త సుప్రీం లీడర్ (Supreme Leader) ముజ్తబా ఖమేనీ ఆరోగ్య పరిస్థితిపై ప్రపంచవ్యాప్తంగా వస్తున్న ఊహాగానాలకు బ్రేక్ వేసేందుకు ఇరాన్ ప్రభుత్వం ప్రయత్నించింది. ఫిబ్రవరి 28న జరిగిన అమెరికా-ఇజ్రాయెల్ వైమానిక దాడి (US-Israeli airstrike) తర్వాత ముజ్తబా ఎక్కడా పబ్లిక్‌గా కనిపించకపోవడంతో అనేక అనుమానాలు వ్యక్తమయ్యాయి. ఈ నేపథ్యంలో, ఆయన ఆరోగ్యంగానే ఉన్నారని చూపిస్తూ ఇరాన్ అధికారిక వార్తా సంస్థ 'మెహర్' (Mehr) శనివారం ఒక వీడియోను తన వెబ్‌సైట్‌లో విడుదల చేసింది.

Iran’s Mehr RELEASES VIDEO of Supreme Leader Mojtaba Khamenei for ‘FIRST TIME’ pic.twitter.com/v3Rp81VfLH

— RT (@RT_com) August 8, 2026

వీడియోలో ఏముంది?

ఈ 12 సెకన్ల షార్ట్ క్లిప్‌లో ముజ్తబా ఖమేనీ నల్లటి తలపాగా, తెలుపు రంగు దుస్తులపై లేత బూడిద రంగు రోబ్ (Robe) ధరించి ఉన్నారు. ఒక గదిలో కార్పెట్‌పై కూర్చుని, తన చుట్టూ ఉన్న వారితో ఆయన మాట్లాడుతున్నట్లు అందులో కనిపిస్తోంది. వీడియోలో ఆయన ఆరోగ్యంగానే ఉన్నట్లు కనిపిస్తున్నప్పటికీ.. దీన్ని ఎప్పుడు, ఎక్కడ రికార్డ్ చేశారనే విషయాలను మాత్రం వార్తా సంస్థ వెల్లడించలేదు. "లీడర్ ఆఫ్ ది రివల్యూషన్, అయతుల్లా సయ్యద్ ముజ్తబా ఖమేనీ వీడియోను తొలిసారిగా రిలీజ్ చేస్తున్నాం" అని ఆ సంస్థ పేర్కొంది. మార్చి 20న ఇరాన్ అధికారిక బ్రాడ్‌కాస్టర్ 'ఐఆర్ఐబీ' (IRIB) కూడా ఇలాంటిదే మరో వీడియోను ఎక్స్‌లో పోస్ట్ చేయడం గమనార్హం.

🚨 Published for the first time

A video of religious science teaching by Ayatollah Mojtaba Khamenei pic.twitter.com/uFtIvZ0POy

— IRIB (Islamic Republic of Iran Broadcasting) (@iribnews_irib) March 19, 2026

ఆరోగ్యంపై అనుమానాలు ఎందుకు?

ఫిబ్రవరి 28న ఇరాన్‌పై జరిగిన వైమానిక దాడుల్లో ముజ్తబా తండ్రి, అప్పటి సుప్రీం లీడర్ అలీ ఖమేనీ ప్రాణాలు కోల్పోయారు. అదే దాడిలో ముజ్తబా ముఖానికి, కాళ్లకు కూడా తీవ్ర గాయాలయ్యాయని వార్తలు వచ్చాయి. మార్చి 8న ఇరాన్ మూడో సుప్రీం లీడర్‌గా బాధ్యతలు చేపట్టినప్పటి నుంచి ముజ్తబా కేవలం లిఖితపూర్వక ప్రకటనలు మాత్రమే జారీ చేస్తున్నారు. కనీసం ఆయన వాయిస్ రికార్డింగ్ గానీ, కొత్త ఫోటోలు గానీ బయటకు రాలేదు. గత నెలలో జరిగిన తన తండ్రి అంత్యక్రియలకు కూడా ఈ 56 ఏళ్ల నేత హాజరుకాలేదు. దీంతో ఆయన ఆరోగ్యంపై అనుమానాలు మరింత బలపడ్డాయి.

అమెరికా అధ్యక్షుడు డొనాల్డ్ ట్రంప్ (Donald Trump) గత నెలలో మాట్లాడుతూ.. ముజ్తబా "90 శాతం ఇక లేనట్లే (90 percent gone)" అని సంచలన వ్యాఖ్యలు చేశారు. ఇజ్రాయెల్ మీడియా కూడా ఆయన పరిస్థితి విషమంగా ఉందని ఇటీవల రిపోర్ట్ చేసింది.

ఇరాన్ అధ్యక్షుడి వివరణ ఇదీ..

ఈ వ్యవహారంపై ఇరాన్ అధ్యక్షుడు మసౌద్ పెజెష్కియన్ (Masoud Pezeshkian) ఇటీవల స్పందించారు. "ప్రస్తుతం ఆయనతో కమ్యూనికేట్ చేయడం చాలా కష్టంగా ఉంది. అయితే మా మధ్య జరిగిన సమావేశాలు సానుకూలంగానే జరిగాయి. ఆయన ఎంతో ఆప్యాయంగా మాట్లాడారు. కొంతమంది ఉద్దేశపూర్వకంగానే ఆయన ఇమేజ్‌ను డ్యామేజ్ చేసేలా అసత్యాలు ప్రచారం చేస్తున్నారు. ఆయన మాకు కొండంత అండ" అని పెజెష్కియన్ వ్యాఖ్యానించారు.