Ali Khamenei Funeral | ఇరాన్ సుప్రీం లీడర్ అంత్యక్రియల్లో అందరి దృష్టి ఆ చిన్న శవపేటికపైనే.. కంటతడి పెట్టిస్తున్న దృశ్యాలు!

• అమెరికా, ఇజ్రాయెల్ దాడుల్లో మరణించిన ఇరాన్ సుప్రీం లీడర్ అలీ ఖమేనీకి ఆరు రోజుల పాటు అంత్యక్రియలు
• ఆయన భౌతికకాయం పక్కనే ఉంచిన 14 నెలల మనవరాలు జహ్రా శవపేటికను చూసి జనం కన్నీరుమున్నీరు
• భద్రతా కారణాల దృష్ట్యా తండ్రి అంత్యక్రియలకు ఇరాన్ కొత్త సుప్రీం లీడర్ మొజ్తబా ఖమేనీ దూరం
• ఇరాన్‌ను కోలుకోలేని దెబ్బతీశామని, అంత్యక్రియల కోసం వారం రోజులు 'సెలవు' ఇచ్చామని అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు

Ali Khamenei Funeral | త్రినేత్ర.న్యూస్ : ఫిబ్రవరి 28న అమెరికా, ఇజ్రాయెల్ జరిపిన దాడుల్లో మరణించిన ఇరాన్ సుప్రీం లీడర్ (Supreme Leader) ఆయతుల్లా అలీ ఖమేనీకి భారీ స్థాయిలో అంత్యక్రియలు (Funeral) ప్రారంభమయ్యాయి. టెహ్రాన్ వీధుల్లోకి లక్షలాది మంది ప్రజలు చేరుకుని తమ నాయకుడికి కన్నీటి వీడ్కోలు పలుకుతున్నారు. అయితే, ఈ విషాద వాతావరణంలో యావత్ ప్రపంచం దృష్టిని ఆకర్షించింది మాత్రం ఖమేనీ పక్కనే ఉంచిన ఒక చిన్న శవపేటిక (tiny coffin).

కంటతడి పెట్టిస్తున్న ఆ చిన్నారి శవపేటిక

అది ఖమేనీకి చెందిన 14 నెలల మనవరాలు జహ్రా మహమ్మది గోల్పాయేగాని భౌతికకాయం. ఖమేనీతో పాటే అదే ఎయిర్‌స్ట్రైక్స్‌లో (airstrikes) ప్రాణాలు కోల్పోయిన ఆ పసికందు మృతదేహాన్ని కూడా ఆయన పక్కనే ఉంచారు. ఇరాన్ జాతీయ జెండాతో కప్పబడి.. నల్లటి తలపాగాతో ఉన్న ఖమేనీ శవపేటిక పక్కనే ఉన్న ఆ చిన్నారి బాక్స్‌ను చూసి అక్కడికి వచ్చినవారంతా కన్నీరుమున్నీరవుతున్నారు.

అధికారిక సైనిక లాంఛనాలు, రాజకీయ నినాదాల మధ్య ఆ పసికందు శవపేటిక.. యుద్ధం మిగిల్చిన తీవ్రమైన మానవ విషాదానికి, ఒక కుటుంబం అనుభవిస్తున్న తీరని శోకానికి అద్దం పడుతోంది.

ఆరు రోజుల పాటు అంత్యక్రియలు

టెహ్రాన్‌లోని గ్రాండ్ ముసల్లాలో ఉంచిన ఖమేనీ భౌతికకాయాన్ని చూసేందుకు వేలాది మంది బారులు తీరారు. జూలై 4న ప్రారంభమైన ఈ అంత్యక్రియల కార్యక్రమం ఆరు రోజుల పాటు సాగి జూలై 9న ఖమేనీ సొంతూరైన మషద్‌ (Mashhad) నగరంలో ముగుస్తుంది. ఈ కార్యక్రమానికి కేవలం టెహ్రాన్‌లోనే 15 నుంచి 20 మిలియన్ల మంది(2 కోట్లు) హాజరవుతారని అధికారులు అంచనా వేస్తున్నారు.

కాగా, ఈ అంత్యక్రియలకు భారత్ తరఫున బీహార్ గవర్నర్ సయ్యద్ అతా హస్నైన్, విదేశీ వ్యవహారాల శాఖ సహాయ మంత్రి పబిత్రా మార్గరీటా హాజరయ్యారు.

తండ్రికి కడసారి వీడ్కోలు పలకలేని కొడుకు

ఇదిలా ఉండగా, తండ్రి అంత్యక్రియలకు ఇరాన్ కొత్త సుప్రీం లీడర్ మొజ్తబా ఖమేనీ దూరంగా ఉంటున్నట్లు తెలుస్తోంది. ఇజ్రాయెల్ నిఘా, భద్రతా కారణాల (security concerns) దృష్ట్యా ఆయన పబ్లిక్‌లోకి రావడం ప్రమాదకరమని భావించి ఈ నిర్ణయం తీసుకున్నట్లు సమాచారం.

ట్రంప్ సంచలన వ్యాఖ్యలు.. ఇరాన్ ప్రజల ఆగ్రహం

మరోవైపు.. ఖమేనీ అంత్యక్రియల నేపథ్యంలో అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. "మేము ఇరాన్‌ను కోలుకోలేని దెబ్బ తీశాం (knocked the hell out of Iran). వాళ్లు రాజీకి రావాలని తహతహలాడుతున్నారు. వాళ్లపై జాలిపడి అంత్యక్రియల కోసం వారం రోజులు సెలవు ఇచ్చాం" అని ట్రంప్ ఎద్దేవా చేశారు.

ట్రంప్ వ్యాఖ్యల పట్ల ఇరాన్ ప్రజలు తీవ్ర ఆగ్రహంతో రగిలిపోతున్నారు. టెహ్రాన్‌లో జరిగిన సంతాప సభలో అనేక మంది "#KillTrump" అని రాసి ఉన్న జెండాలను ప్రదర్శించారు. "అమెరికా నశించాలి", "ప్రతీకారం కావాలి" అంటూ ఎర్రటి జెండాలు చేతబూని నినాదాలు చేస్తున్నారు. "మా ప్రియతమ నాయకుడికి వీడ్కోలు పలికేందుకు ఇక్కడికి వచ్చాం. ఇలాంటి రోజు వస్తుందని ఎన్నడూ ఊహించలేదు" అని ఓ 27 ఏళ్ల యువకుడు కన్నీటిపర్యంతమయ్యాడు.