AstraZeneca | ఆస్ట్రాజెనెకా భారీ విజయం.. కొత్త బ్రెస్ట్ క్యాన్సర్‌ ఔష‌ధానికి యూఎస్ఎఫ్‌డీఏ అనుమతి..

AstraZeneca | ఆస్ట్రాజెనెకా సంస్థ రూపొందించిన బ్రెస్ట్ క్యాన్సర్ ఔష‌ధానికి అమెరికా ఫుడ్ అండ్ డ్రగ్ అడ్మినిస్ట్రేషన్ (ఎఫ్‌డీఏ) అనుమతి లభించింది. ఈ ఔషధానికి గతంలో ఎఫ్‌డీఏ సలహా కమిటీ వ్యతిరేకంగా ఓటు వేసిన నేపథ్యంలో, తాజా అనుమతి ఆస్ట్రాజెనెకాకు కీలక విజయంగా నిలిచింది. కామిజెస్ట్రాంట్‌గా పిలిచే ఈ ఔషధానికి వేగవంతమైన అనుమతి ప్రక్రియలో భాగంగా ఎఫ్‌డీఏ ఆమోదం తెలిపింది. జన్యుపరంగా ప్రభావితమైన మెటాస్టాటిక్ బ్రెస్ట్ క్యాన్సర్ ఉన్న రోగులకు ఇతర క్యాన్సర్ మందులతో కలిపి ఈ ఔషధాన్ని ఉపయోగించవచ్చు. ఎట్‌కమా బ్రాండ్ పేరుతో మార్కెట్లోకి రానున్న ఈ ఔషధం ద్వారా ఏటా 5 బిలియన్ డాలర్లకు పైగా ఆదాయం వచ్చే అవకాశం ఉందని ఆస్ట్రాజెనెకా గతంలో పేర్కొంది. అయితే వాల్ స్ట్రీట్ విశ్లేషకులు మాత్రం అంత ఆశావహంగా లేరు. బ్లూమ్‌బెర్గ్ సర్వే చేసిన విశ్లేషకుల ప్రస్తుత అంచనాల ప్రకారం, 2032లో ఈ ఔషధం అమ్మకాలు దాదాపు 2.3 బిలియన్ డాలర్లకు చేరే అవకాశం ఉంది.

క్యాన్సర్‌ను ఆల‌స్యం చేయ‌వచ్చు..

ఈ ఏడాది ప్రారంభంలో ఎఫ్‌డీఏకు చెందిన ఆంకాలజీ డ్రగ్స్ అడ్వైజరీ కమిటీ కామిజెస్ట్రాంట్‌కు వ్యతిరేకంగా ఓటు వేసింది. రోగులకు ఈ ఔషధం అందించే ప్రయోజనం గణనీయమైనది కాదని కమిటీ అభిప్రాయపడింది. అయితే తాజాగా ఇచ్చిన అనుమతిలో ఎఫ్‌డీఏ, బ్రెస్ట్ క్యాన్సర్‌తో బాధపడుతున్న మహిళలకు ఈ ఔషధం వ్యాధి చికిత్సలో మరో అవకాశాన్ని అందిస్తుందని పేర్కొంది. ఎట్‌కమా హార్మోన్ థెరపీగా పనిచేస్తుంది. క్యాన్సర్ కణాలను ఈస్ట్రోజన్ ప్రేరేపించకుండా అడ్డుకోవడం ద్వారా వాటి పెరుగుదలను నియంత్రించడంలో సహాయపడుతుంది. ఈ ఔష‌ధంతో వ్యాధి పురోగతిని ఆరు నెలలకు పైగా ఆలస్యం చేయ‌వ‌చ్చ‌ని ఆస్ట్రాజెనెకా నిర్వహించిన అధ్యయనాల్లో వెల్లడైంది.

ముంద‌స్తు ప‌రీక్ష త‌ప్ప‌నిస‌రి..

ఎండోక్రైన్ థెరపీ చికిత్స కొనసాగుతున్న సమయంలో నిర్దిష్ట జన్యు పరివర్తన అభివృద్ధి చెందిన బ్రెస్ట్ క్యాన్సర్ రోగులు ఈ ఔషధానికి లక్ష్య రోగులుగా ఉంటారు. ఎట్‌కమా తీసుకునే ముందు, తమలో ఆ నిర్దిష్ట జన్యు పరివర్తన ఉందని నిర్ధారించే ఎఫ్‌డీఏ అనుమతించిన పరీక్ష చేయించుకోవాల్సి ఉంటుంది. చీఫ్ ఎగ్జిక్యూటివ్ ఆఫీసర్ పాస్కల్ సోరియోట్ నేతృత్వంలో ఆస్ట్రాజెనెకా ఇప్పటికే పలు బ్లాక్‌బస్టర్ క్యాన్సర్ ఔషధాలను మార్కెట్లోకి తీసుకొచ్చింది. ఇక తన ఆంకాలజీ ఔషధాల పైప్‌లైన్ ద్వారా నిరంతర వృద్ధిని సాధించడంపై సంస్థ దృష్టి పెట్టింది. అదే సమయంలో వేగంగా విస్తరిస్తున్న బరువు తగ్గించే చికిత్సల మార్కెట్లో పోటీ ఇచ్చేందుకు కూడా ఆస్ట్రాజెనెకా సిద్ధమవుతోంది.