T20 World Cup | లంక అల‌వోక విజ‌యం

ఏ ద‌శ‌లోనూ పోటీ ఇవ్వ‌ని ఒమ‌న్‌

T20 World Cup | త్రినేత్ర.న్యూస్: టీ20 ప్ర‌పంచ‌క‌ప్ లో భాగంగా ఒమ‌న్‌తో పోటీ ప‌డిన శ్రీ‌లంక అల‌వోక విజ‌యం సాధించింది. ఒమ‌న్ ఏ ద‌శ‌లోనూ పోటీ ఇవ్వ‌లేక చ‌తికిల‌ప‌డింది. ఈ మ్యాచ్‌తో ఆడిన రెండు మ్యాచ్‌ల్లోనూ గెలిచి గ్రూప్ బీలో అగ్ర‌స్థానానికి లంక చేర‌గా, రెండూ ఓడి ఒమ‌న్ చివ‌రిస్థానానికి దిగజారింది.

టాస్ గెలిచిన ఒమ‌న్ లంక‌ను బ్యాటింగ్‌కు ఆహ్వానించ‌గా, శ్రీ‌లంక 42 ప‌రుగుల‌కే ఓపెన‌ర్‌లు ఇద్ద‌రినీ కోల్పోయింది. ఈ ద‌శ‌లో బ్యాటింగ్‌కు దిగిన కుశాల్ మెండిస్ (45 బంతుల్లో 61), ప‌వ‌న్ ర‌త్నాయ‌కే (28 బంతుల్లో 60) విలువైన భాగ‌స్వామ్యాన్ని న‌మోదు చేశారు. ర‌త్నాయ‌కే ఔట్ అవ‌డంతో క్రీజ్‌లోకి వ‌చ్చిన దాస‌న్ శ‌న‌క ఆకాశ‌మే హ‌ద్దుగా చెల‌రేగిపోయాడు. 20 బంతుల్లో 50 ప‌రుగులు చేసి నిష్క్ర‌మించాడు. 20 ఓవ‌ర్లు ముగిసేస‌రికి శ్రీ‌లంక అయిదు వికెట్లు కోల్పోయి 225 ప‌రుగులు సాధించింది. జీతెన్ రామ‌నంది రెండు వికెట్లు తీయ‌గా, జ‌య్ ఒడెద్రా, సుఫియాన్ మ‌హ‌మూద్ చెరో వికెట్ తీశారు.

అనంత‌రం బ్యాటింగ్‌కు దిగిన ఒమ‌న్ 12 ప‌రుగుల‌కే ఓపెన‌ర్‌లు ఇద్ద‌రూ ఔట‌య్యారు. తొమ్మిది ప‌రుగులే చేసి హ‌మ్మ‌ద్ మీర్జా సైతం వెనుదిరిగాడు. ఈ ద‌శ‌లో వ‌సీమ్ అలీ (20 బంతుల్లో 27 ప‌రుగులు)తో క‌లిసి మ‌హ‌మ్మ‌ద్ న‌దీమ్ (56 బంతుల్లో 53 నాటౌట్‌) ఇన్నింగ్స్‌ను చ‌క్క‌దిద్దే ప్ర‌యత్నం చేశారు. వ‌సీమ్ అవుట‌వ‌డంతో లోయ‌ర్ ఆర్డ‌ర్ అంతా పేక‌మేడ‌లా కుప్ప‌కూలింది. నిర్దేశిత 20 ఓవ‌ర్ల‌కు గాను ఒమ‌న్ తొమ్మిది వికెట్లు కోల్పోయి 120 ప‌రుగులు మాత్ర‌మే చేయ‌గ‌లిగింది. చ‌మీర‌, తీక్ష‌ణ చెరో రెండు వికెట్లు, వెల్ల‌లాగె, హేమంత‌, మెండిస్ త‌లా ఒక వికెట్ చొప్ప‌న సాధించారు.