Director | దర్శకుడిగా కల నెరవేరిన మరుసటిరోజే విషాదం – మ‌ల‌యాళ యంగ్ డైరెక్ట‌ర్ హ‌ఠాన్మ‌ర‌ణం

Director |  మ‌ల‌యాళ వెబ్‌సిరీస్ క‌ప్పిస్క్వాడ్ శుక్ర‌వారం జియో హాట్‌స్టార్‌లో రిలీజైంది. కామెడీ డ్రామాగా తెర‌కెక్కిన ఈ వెబ్‌సిరీస్‌తోనే ద‌ర్శ‌కుడిగా బేల్‌రాజ్ క‌ల‌రిక్క‌ల్ మ‌ల‌యాళ సినీ ప‌రిశ్ర‌మ‌కు ప‌రిచ‌య‌మ‌య్యారు. ద‌ర్శ‌కుడిగా త‌న పేరు స్క్రీన్‌పై చూసుకోవాల‌నే ఎన్నో ఏళ్ల బేల్‌రాజ్ క‌ల నెర‌వేరింది. కానీ అంత‌లోనే విషాదం చోటుచేసుకుంది. గుండెపోటుతో ఈ ద‌ర్శ‌కుడు హ‌ఠాన్మ‌ర‌ణం చెందారు. కొచ్చిలోని ఓ హోట‌ల్ రూమ్‌లో అప‌స్మార‌క స్థితిలో ఉన్న ఆయ‌న్ని సిబ్బంది హాస్పిట‌ల్‌కు త‌ర‌లించారు. అప్ప‌టికే గుండెపోటుతో ద‌ర్శ‌కుడు క‌న్నుమూసిన‌ట్లు డాక్ట‌ర్లు ప్ర‌క‌టించారు. 27 ఏళ్ల చిన్న వ‌య‌సులోనే గుండెపోటుతో మ‌ర‌ణించ‌డంతో మ‌ల‌యాళ సినీ వ‌ర్గాలు దిగ్భాంతికి లోన‌వుతున్నాయి.

అసిస్టెంట్ డైరెక్ట‌ర్‌గా...

మ‌ల‌యాళంలో నిజాల్‌, మ‌ధురం, డాకినితో పాటు ప‌లు సినిమాల‌కు అసిస్టెంట్ డైరెక్ట‌ర్‌గా ప‌నిచేశాడు బేల్‌రాజ్‌. క‌ప్పిస్క్వాడ్‌తో ద‌ర్శ‌కుడిగా మారాడు. ఈ వెబ్‌సిరీస్‌లో రినోష్ జార్జ్‌, అన‌ఘా అజిత్‌, దివ్య దీప‌న్‌, జోయ‌ల్ జోసెఫ్ కీల‌క పాత్ర‌ల్లో క‌నిపించారు. త‌మ క‌ల‌ల‌ను నెర‌వేర్చుకునే క్ర‌మంలో న‌లుగురు యువ‌తీయువ‌కుల‌కు ఎదురైన అడ్డంకుల‌తో ఈ వెబ్‌సిరీస్ రూపొందింది. బేల్‌రాజ్ టేకింగ్‌కు ప్ర‌శంస‌లు వ‌చ్చాయి. విజ‌యం తాలూకు అనందాన్ని చూడ‌కుండానే బేల్‌రాజ్ క‌న్నుమూయ‌డం విషాదాన్ని మిగిల్చింది.

నెల రోజుల క్రిత‌మే పెళ్లి...

బేల్‌రాజ్‌కు నెల రోజుల క్రిత‌మే వివాహ‌మైన‌ట్లు తెలిసింది. గ‌త ఆరేళ్లుగా ఓ అమ్మాయితో ప్రేమ‌లో ఉన్న బేల్‌రాజ్ పెద్ద‌ల‌ను ఒప్పించి సెప్టెంబ‌ర్‌లో ప్రియురాలితో ఏడ‌డుగులు వేసిన‌ట్లు స‌న్నిహితులు తెలిపారు.