SBI Har Ghar Lakhpati | ఎస్‌బీఐ ల‌ఖ్‌ప‌తి స్కీం.. రూ.600తో రూ.1 ల‌క్ష‌..

SBI Har Ghar Lakhpati | దేశంలోని అతిపెద్ద ప్రభుత్వ రంగ బ్యాంకు స్టేట్ బ్యాంక్ ఆఫ్ ఇండియా అందిస్తున్న హర్ ఘర్ లఖ్‌పతి పథకం పిల్లల ఉన్నత విద్య, వివాహం లేదా ఇతర పెద్ద ఆర్థిక లక్ష్యాల కోసం క్రమంగా పొదుపు చేయాలనుకునే వారికి ఉపయోగకరంగా ఉంటుంది. ఇది ఎస్‌బీఐకి చెందిన ప్రత్యేక రికరింగ్ డిపాజిట్ పథకం. ఇందులో చిన్న మొత్తాలను ప్రతి నెలా పొదుపు చేస్తూ రూ.1 లక్ష లేదా అంతకంటే ఎక్కువ మొత్తాన్ని సమకూర్చుకోవచ్చు. ఈ పథకానికి అర్హత, వడ్డీ రేట్లు, మెచ్యూరిటీ నిబంధనలు, పెట్టుబడి లెక్కలను ఎస్‌బీఐ వివ‌రించింది.

స్కీమ్ ఏంటి..

హర్ ఘర్ లఖ్‌పతి అంటే స్టేట్ బ్యాంక్ ఆఫ్ ఇండియా అందిస్తున్న‌ ప్రత్యేక రికరింగ్ డిపాజిట్ పథకం. సాధారణ ప్రజలు, మధ్యతరగతి కుటుంబాల్లో క్రమం తప్పకుండా పొదుపు చేసే అలవాటును పెంచడం దీని ప్రధాన ఉద్దేశం. వినియోగదారులు తమ అవసరాలు, ఆర్థిక లక్ష్యాలకు అనుగుణంగా 3 నుంచి 10 సంవత్సరాల వరకు కాలపరిమితిని ఎంచుకోవచ్చు. ప్రతి నెలా నిర్ణీత మొత్తాన్ని జమ చేయడం ద్వారా మెచ్యూరిటీ సమయంలో రూ.1 లక్ష లేదా అంతకంటే ఎక్కువ మొత్తం పొందే అవకాశం ఉంటుంది. ఈ ఖాతాను ఎవరైనా సొంతంగా లేదా మరొకరితో కలిసి జాయింట్ ఖాతాగా తెరవవచ్చు. 10 సంవత్సరాలు లేదా అంతకంటే ఎక్కువ వయస్సు ఉండి స్వయంగా సంతకం చేయగలిగే పిల్లలు తమ పేరుతోనే ఖాతా తెరవవచ్చు. మైనర్‌ల విషయంలో తల్లిదండ్రులు లేదా చట్టబద్ధమైన సంరక్షకులు ఖాతాను తెరవవచ్చు.

రూ.1 ల‌క్ష ఎలా వ‌స్తుంది..

ఎస్‌బీఐ ఉదాహరణ ప్రకారం నెలకు రూ.600 చొప్పున 10 సంవత్సరాల పాటు పెట్టుబడి పెడితే మొత్తం 120 నెలల్లో రూ.72వేలు జమ అవుతుంది. సుమారు 8 శాతం వడ్డీ రేటును పరిగణనలోకి తీసుకుంటే దాదాపు రూ.38వేల వడ్డీ లభించి, మెచ్యూరిటీ సమయంలో సుమారు రూ.1.10 లక్షలు పొందే అవకాశం ఉంటుంది. అయితే ఈ లెక్కను ప్రత్యేక వడ్డీ రేట్లు వర్తించే వర్గాలను కూడా పరిగణనలోకి తీసుకున్న ఉదాహరణగా చూడాలి. రూ.1 లక్ష మొత్తాన్ని సమకూర్చుకోవాలంటే ఎంచుకునే కాలపరిమితిని బట్టి నెలవారీ వాయిదా మారుతుంది. తక్కువ కాలపరిమితిని ఎంచుకుంటే ప్రతి నెలా ఎక్కువ మొత్తాన్ని జమ చేయాల్సి ఉంటుంది. ఎక్కువ కాలపరిమితిని ఎంచుకుంటే నెలవారీ పెట్టుబడి భారాన్ని తగ్గించుకోవచ్చు.

వ‌డ్డీ రేట్లు ఎంత‌..

ఈ పథకంలో వడ్డీ రేటు వినియోగదారుడి వర్గం, ఎంచుకున్న కాలపరిమితిపై ఆధారపడి ఉంటుంది. సాధారణ వినియోగదారులకు 3 నుంచి 4 సంవత్సరాల కాలానికి 6.55 శాతం, 5 నుంచి 10 సంవత్సరాల కాలానికి 6.30 శాతం వడ్డీ రేటు ఇస్తున్నారు. సీనియర్ సిటిజన్లకు సాధారణ వినియోగదారులతో పోలిస్తే అదనంగా 0.50 శాతం వడ్డీ లభిస్తుంది. అంటే వారి వడ్డీ రేటు 6.80 నుంచి 7.05 శాతం వరకు ఉంటుంది. ఎస్‌బీఐ ఉద్యోగులు, రిటైర్డ్ ఉద్యోగులకు సాధారణ వినియోగదారులు, సీనియర్ సిటిజన్ల కంటే మరింత ప్రత్యేకమైన అధిక వడ్డీ రేట్లు అందుబాటులో ఉంటాయి. అత్యవసర పరిస్థితుల్లో మెచ్యూరిటీకి ముందే డబ్బును ఉపసంహరించుకోవాల్సి వస్తే ఎస్‌బీఐ కొన్ని నిబంధనలు విధించింది. ఖాతా ప్రారంభించిన 7 రోజుల్లోనే డిపాజిట్‌ను వెనక్కి తీసుకుంటే ఎలాంటి వడ్డీ చెల్లించరు. రూ.5 లక్షల వరకు ఉన్న డిపాజిట్లను మెచ్యూరిటీకి ముందే మూసేస్తే 0.50 శాతం పెనాల్టీ వర్తిస్తుంది. రూ.5 లక్షలకు మించిన డిపాజిట్లకు ముందస్తు ఉపసంహరణపై 1 శాతం పెనాల్టీ విధిస్తారు. ఈ పథకం ద్వారా వచ్చే వడ్డీపై ఆదాయపు పన్ను నిబంధనల ప్రకారం టీడీఎస్, పన్ను వ‌ర్తిస్తాయి.

ముందుగా నిర్దార‌ణ అవ‌స‌రం..

తమ కోసం లేదా పిల్లల భవిష్యత్తు అవసరాల కోసం రూ.1 లక్ష లేదా అంతకంటే ఎక్కువ మొత్తాన్ని క్రమంగా సమకూర్చుకోవాలనుకునే వారికి హర్ ఘర్ లఖ్‌పతి పథకం ఒక క్రమబద్ధమైన పొదుపు మార్గంగా ఉపయోగపడుతుంది. మార్కెట్ ఆధారిత పెట్టుబడులతో పోలిస్తే రికరింగ్ డిపాజిట్‌లో మార్కెట్ హెచ్చుతగ్గుల ప్రత్యక్ష ప్రభావం ఉండదు. అయితే పెట్టుబడి పెట్టే ముందు ప్రస్తుత వడ్డీ రేట్లు, పన్ను నిబంధనలు, ముందస్తు ఉపసంహరణ నిబంధనలను ఎస్‌బీఐ వద్ద నిర్ధారించుకోవడం మంచిది.